Nizami Rayon Məhkəməsində xuluqanlıqda təqsirləndirilən Akif Balayev və Nazim Hikmətovun (hər ikisinin adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Emin Axundovun sədrliyi ilə keçirilən prosesdə hökm oxunub.

Məhkəmənin hökmü ilə Akif Balayev 2 il 5 ay 22 gün və Nazim Hikmətov isə 1 il 8 ay 6 gün müddətinə azadlığın məhdudlaşdırılması cəzasına məhkum olunub.

İttihama görə, Akif Balayev dostu Nazim Hikmətovla birlikdə ictimai qaydanı kobud surətdə pozaraq, cəmiyyətə açıq hörmətsizlik nümayiş etdirib və zərərçəkmiş şəxsə qarşı zor tətbiq etməklə xuliqanlıq əməli törədib.

Hadisə 2024-cü ilin iyul ayında səhər saat 05 radələrində Bakı şəhəri, Nizami rayonu, Qara Qarayev prospektində yerləşən “Beer Coin” pubda baş verib.

Belə ki, Akif Balayev həmin vaxt dostu ilə birlikdə pubda olarkən, obyektdə müştəri qismində olan zərərçəkmiş Sahilə Yusifova (adı, soyadı şərtidir) ilə arasında mübahisə yaranıb. Mübahisə zamanı zərərçəkmiş şəxsin onun ünvanına nalayiq ifadələr işlətməsini bəhanə edən Akif dostu ilə Nazimlə birlikdə aqressiv davranış nümayiş etdirərək ictimai qaydanı kobud şəkildə pozub. Onlar öz hərəkətləri ilə həm obyektin normal fəaliyyətini pozub, həm də orada olan digər müştərilərin narahatlığına səbəb olublar.

İttihama əsasən, Akif əvvəlcə zərərçəkmiş qadının üz nahiyəsinə əl ilə bir dəfə şillə vuraraq ona fiziki ağrı yetirib. Hadisənin qarşısını almaq istəyən digər müştərilər müdaxilə etsələr də, qarşıdurma bununla yekunlaşmayıb.

Belə ki, pubda olan digər qadın baş verənlərin qarşısını almağa çalışarkən, Nazim onu kənara itələyərək müdaxiləyə mane olub. Bundan sonra Akif Sahilənin saçından tutaraq onu yerə yıxıb, daha sonra isə yerlə sürüyüb.

Məhkəmə materiallarına görə, zərərçəkmiş şəxsə vurulan zərbələr nəticəsində onun sağ təpə nahiyəsində şişkinliklə müşayiət olunan əzilmə, sağ bazu oynağında hərəkət məhdudluğu yaradan əzilmə və sol bud nahiyəsində hematoma əmələ gəlib. Məhkəmə-tibbi ekspertizanın rəyinə əsasən, həmin xəsarətlər sağlamlığın qısa müddətə pozulmasına səbəb olan yüngül bədən xəsarətləri kimi qiymətləndirilib.

Araşdırma zamanı müəyyən olunub ki, təqsirləndirilən şəxslərin hərəkətləri təsadüfi mübahisə çərçivəsini aşaraq ictimai qaydaya açıq hörmətsizlik nümayiş etdirməklə müşayiət olunub. Onlar insanların sıx olduğu ictimai məkanda ətrafdakı şəxslərin təhlükəsizliyini və rahatlığını nəzərə almadan zor tətbiq edərək qərəzli hərəkətlərə yol veriblər.

Məhkəmə iş üzrə toplanmış sübutları, zərərçəkmiş və şahid ifadələrini, eləcə də digər materialları araşdıraraq nəticəyə gəlib ki, təqsirləndirilən şəxsin əməli Cinayət Məcəlləsinin 221.2.1-ci maddəsində nəzərdə tutulan, bir qrup şəxs halında törədilmiş xuliqanlıq cinayətinin tərkibini yaradır.

Beləliklə, təqsirləndirilən şəxslər bir qrup şəxs halında ictimai qaydanı kobud surətdə pozan, cəmiyyətə açıq hörmətsizlik ifadə edən və şəxslərə qarşı zor tətbiqi ilə müşayiət olunan qərəzli hərəkətlər törətməkdə təqsirli bilinib.