Hərbi-siyasi ekspert Telman Qasımovun Rusiyada yaşayan azərbaycanlılarla bağlı çıxışı müzakirələrə səbəb olub. Onun bəzi azərbaycanlılar haqda “Bura gəlməyin, sizin kimi əqidəsiz insanların Azərbaycana gəlməyinə ehtiyac yoxdur, orada qalın. Sizin Rusiyada hansı vəziyyətdə yaşadığınızı çox gözəl bilirik. Rus polisinin qarşısında necə əyilirsiniz, necə diz çökdüyünüzü bilirik” deməsi sərt tənqid edilib.
Mövzu ilə bağlı Pravda.az-a açıqlama verən T.Qasımovun sözlərinə görə, səsləndirdiyi fikirlər təhrif olunmuş formatda verilib.
O bildirib ki, Rusiyada yaşayan bəzi azərbaycanlılar Rusiya hakimiyyətindən daha çox Rusiyaya sədaqət, bağlılıq hissini nümayiş etdirməyə çalışırlar, bu fikirləri məhz onlar haqqında səsləndirib: “Mən müsahibəni başqa formada vermişəm. Həmin kanal baxış sayını artırsın deyə o yeri kəsib. Mən də öz etirazımı kanala bildirdim, üzrxahlıq etdilər. Ukrayna-Rusiya müharibəsi ilə bağlı sual verəndə danışmışdım. Sonra dedim ki, Rusiyada yaşayan bəzi azərbaycanlılar Putinin əleyhinə çıxış edəndə, qınayanda, Ukraynanın Rusiyada uğurlarından danışanda sosial şəbəkələrdə bizi söyürlər ki, aranı qızışdırmayın, Putin əladır, Ukraynanın heç bir uğuru yoxdur, heç bir pilotsuz təyyarə burada uçmur, özünüzdən yalandan məlumatlar icad etməyin... Mən də dedim ki, həmin adamlar o səviyyəsiz şəxslərdir ki, elə bil onlar heç azərbaycanlı deyillər, Azərbaycan dövlətini orada təmsil etmirlər, milli kimlikdən uzaq düşürlər, müharibədə iştirak edirlər, bütün günü rusun, rus polisinin qabağında baş əyirlər. Həmin şəxslərdən nə gözləmək olar ki? Amma elə təbəqələr var ki, məni dəstəkləyirlər. Bildirirlər ki, düz deyirsən, baxmayaraq ki, biz Rusiyada yaşayırıq Putin belə-belədi... Kanal isə götürüb aləmi qatmışdı bir-birinə. Xaricdə yaşayan bəzi dairələr də çıxışı təhrif edərək başqa şəkildə təqdim ediblər. Mən də həmin kəsilmiş çıxışa baxsam, söyərəm”.
T.Qasımov belə çıxışlarına görə ona vəsait ödənildiyini deyənləri sərt tənqid edib: “Bu paket neçə ildir, yoldadır hələ gəlib mənə çatmayıb... Xaricdə oturan bloqer özündən icad etdi ki, guya mənə paket verirlər, danışıram. Belə şey olar?! Dövlət o səviyyəyə düşüb ki, mənə paket versinlər, mən də çıxım televiziyada bütün Rusiya azərbaycanlılarını təhqir edim? Bu, mümkün deyil. Mən 37 ildir siyasətdə olan müstəqil adamam, deputat deyiləm, vəzifəm yoxdur... Ehtiyatda olan hərbçiyəm. Nə paket alacam mən? Rusiyada qohumlarım, dostlarım yaşayır, heç elə çıxış edərəm? Mümkün deyil. Etirazımı kanala kəskin formada bildirdim. Həmin materialı dərhal çıxardılar. Amma nə fayda... Paylaşıldı. Yenidən silsələr də, başqa səhifələr paylaşıb. Mən bilirəm ki, bu zərbə mənə hansı tərəfdən gəlir, nənəsi erməni, erməni ilə qarışığı olanlar... Milli adam heç zaman milli adama bunu etməz. Vətənpərvər adam əsla belə hərəkət etməz. Necə oldu o qədər yaxşı çıxışlar edirəm, uşaq puluna, deputatların hərəkətinə toxunuram... Onda məni heç tərifləmirlər. Mənə dedilər ki, gərək insanlar ona tam formatında baxardılar. Dedim hamının ağlı kəsir ki oturub tam baxa. Bunun savadlısı, savadsızı, tanımayanı var. Kimdi düşüb onu axtaran? Reytinq xətrinə belə etdilər”.
