Ali Məhkəmədə adam oğurluğunda təqsirləndirilən dəstə üzvləri – Ayaz Hümbətov, Ruslan Həsənov və Qabil Məmmədcəfərovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Şahin Yusifovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib.

İttihama görə, dəstə üzvləri Gədəbəy rayonunda dövlət qurumlarından birinin əməkdaşı olan 1991-ci il təvəllüdlü Aysel Kərimovanı (adı, soyadı şərtidir) oğurlamaqda təqsirləndiriliblər.

Müəyyən edilib ki, cinayəti Ruslan Həsənov təşkil edib və o, A.Kərimova ilə evlənmək niyyətində olub. Lakin qızın və ailəsinin buna razı olmayacağını bildiyi üçün əmisi oğlu Ayaz və sürücü Qabillə bu əməli planlaşdırıb. Onlar 32 yaşlı qızı Şəmkirdəki qohumlarının evinə aparsalar da, növbəti gün polis tərəfindən yaxalanıblar.

Gəncə Ağır Cinayətlər Məhkəməsinin hökmü ilə Ruslan Həsənov 9, Ayaz Hümbətov 8 il 6 ay və Qabil Məmmədcəfərov isə 8 il müddətə azadlıqdan məhrum edilib.