İyulun 18-də Moskvada MDB İqtisadi Şurasının 106-cı iclasında Azərbaycanın iştirakdan imtina etməsi müzakirələr yaradıb. Qeyd edək ki, adətən MDB-nin iclaslarında Azərbaycanı baş nazirin birinci müavini Yaqub Eyyubov təmsil edirdi.

“Yaqub Eyyubov bu tədbirdə iştirak etməyəcək. Bu qərara səbəb Yekaterinburqda baş verən son hadisələr, ötən ilin sonunda ruslar tərəfindən AZAL təyyarəsinin vurulması və Rusiya tərəfinin bu məsələlərin həlli üçün adekvat addımlar atmaq istəməməsidir”, - hökumətdəki mənbə “Trend”ə bildirib.

MDB-nin baş katibi Sergey Lebedev TASS-a açıqlamasında deyib ki, Azərbaycandan olan nümayəndə heyətinin MDB-nin İqtisadi Şurasının iclasında iştirak etməməsi “müvəqqətidir və tezliklə vəziyyət normallaşacaq”. Lebedev Azərbaycan nümayəndəsinin Moskvadakı tədbirdə niyə iştirak etməməsinin səbəblərini bilmədiyini söyləyib: “Onlar (Azərbaycanın nümayəndələri) bizə məlumat vermədilər, amma mən çox ümid edirəm ki, vəziyyət əvvəlki məcrasına qayıdacaq və Azərbaycan inteqrasiya əməkdaşlığının fəal iştirakçısı olub və elə də qalacaq”.

Azərbaycan Nazirlər Kabinetinin mətbuat xidmətindən TASS-a bildiriblər ki, onlar ölkənin baş nazirinin müavininin iclasda iştirakı və ya iştirak etməməsi barədə məlumatlara malik deyillər.

Musavat.com xəbər verir ki, sözügedən tədbirdə Ermənistan Nazirlər Kabinetindən də heç kim iştirak etməyib. Ermənistanı tədbirdə Moskvadakı deyil, Belarusdakı fövqəladə və səlahiyyətli səfiri Razmik Xumaryan təmsil edib.
Lebedev bu barədə də mövqe bildirib: “Ermənistanın MDB-dən çıxmaq istəyi ilə bağlı heç bir siqnal olmayıb, bu variant istisna edilir”. Lebedev Ermənistanın MDB-nin müxtəlif iclaslarında iştirakını davam etdirdiyini vurğulayıb. "Bu gün Ermənistanın səlahiyyətli nümayəndəsi MDB İqtisadi Şurasının iclasında olub, məsələlərin mahiyyəti barədə danışıb, bir sıra sənədləri imzalamaq səlahiyyətinə malikdir", - MDB sədri qeyd edib.

İclasa isə MDB İqtisadi Şurasına Tacikistan baş nazirinin birinci müavini Xokim Xolikzoda sədrlik edib.
Belarusu baş nazirinin müavini Natalya Petkeviç, Qırğızıstanı Nazirlər Kabineti sədrinin birinci müavini Daniyar Amangeldiyev, Rusiyanı hökuməti sədrinin müavini Aleksey Overçuk, Özbəkistanı iqtisadiyyat və maliyyə naziri Peru Kumanov təmsil edib.

İclasda regional enerji təhlükəsizliyinin təmin edilməsində əməkdaşlıq haqqında bəyannamə layihəsinə baxılıb. Bəyannamə layihəsinin baxılması üçün MDB Dövlət Başçıları Şurasına təqdim edilməsi planlaşdırılır.

İqtisadi Şuranın üzvləri MDB Statistika Komitəsi tərəfindən hazırlanmış üzv dövlətlərin iqtisadiyyatının 2024-cü il üçün əsas makroiqtisadi göstəriciləri haqqında məlumatı nəzərdən keçiriblər.
MDB-yə üzv dövlətlərin Atom Enerjisindən Sülh Məqsədlərində İstifadəsi üzrə Komissiya da öz fəaliyyəti haqqında məlumat təqdim edib. Bu mövzuda “Rosatom”un baş direktorunun müavini Nikolay Spasski məruzə ilə çıxış edərək, Komissiyanın nüvə enerjisi sahəsində əməkdaşlığın ən mühüm sahələrini əhatə etdiyini və MDB-yə üzv dövlətlərin nüvə və radiasiya təhlükəsizliyinin təmin edilməsinə böyük töhfə verdiyini qeyd edib.

İclasda 2030-cu ilədək MDB Üzv Dövlətlərinin Atom Enerjisindən Dinc məqsədlərlə İstifadəsi Sahəsində Əməkdaşlıq Çərçivə Proqramının ikinci mərhələsinin (2026–2030-cu illər) həyata keçirilməsi üzrə Fəaliyyət Planının layihəsi təsdiq edilib. Bu sənəd də baxılmaq üçün MDB Hökumət Başçıları Şurasına təqdim olunacaq.

İclasda, həmçinin 2035-ci ilədək olan dövr üçün MDB iştirakçısı dövlətlərin meşə təsərrüfatı və meşə sənayesi sahəsində əməkdaşlığının əsas istiqamətlərinin layihəsi təsdiq edilib. Sənəddə MDB iştirakçısı olan dövlətlərdə meşə və meşə təsərrüfatının vəziyyəti və inkişaf perspektivləri, bu sahədə əməkdaşlığın məqsədləri, prinsipləri və əsas vəzifələri, onların həlli üçün ən mühüm mexanizmlər barədə məlumatlar öz əksini tapıb.

İclasda MDB-yə üzv dövlətlərin 2030-cu ilədək quş qripi və nyukasl xəstəliyinin qarşısının alınması və onlara qarşı mübarizə üzrə birgə fəaliyyət layihəsi də təqdim olunub. Sənəddə MDB-yə üzv dövlətlərdə və dünyanın digər ölkələrində epizootik vəziyyətin təhlili, birgə tədbirlərin həyata keçirilməsinin əsas istiqamətləri, quşların bu xüsusilə təhlükəli xəstəliklərinin qarşısının alınması və onlara qarşı mübarizə üzrə tədbirlərin siyahısı, proqramın icrası üzrə məqsədli göstəricilər müəyyən edilib.

İqtisadi Şuranın üzvləri çəyirtkə zərərvericilərinin inkişafının qarşısının alınması üzrə MDB-yə üzv dövlətlər arasında əməkdaşlıq haqqında saziş layihəsini də bəyəniblər. Sazişin imzalanması və həyata keçirilməsi çəyirtkələrin vurduğu zərərin azaldılmasına, əlverişli fitosanitar vəziyyətin təmin edilməsinə, MDB-yə üzv dövlətlərdə kənd təsərrüfatının davamlı inkişafı üçün şəraitin yaradılmasına imkan verəcək. Saziş layihəsinin baxılması üçün MDB Şurasına təqdim edilməsi planlaşdırılır.

İqtisadi Şuranın növbəti iclasının gələn ilin sentyabrında Düşənbə şəhərində keçirilməsi planlaşdırılır.

Musavat.com