Sentyabrın 25-dən 26-na keçən gecə İsveçin Karlskrona arxipelaqı üzərində ölkənin əsas hərbi-dəniz bazasının yerləşdiyi ərazidə iki naməlum pilotsuz təyyarə aşkarlanıb.

Moderator.az Ukrayna mediasına istinadla xəbər verir ki, bu haqda yerli "SVT" saytı məlumat yayıb.

Nəşr qeyd edir ki, polis Mökklosund körpüsünə gedib və təyyarəni səmada aşkarlayıb. Yerli sakinlər həmçinin dronun qırmızı və yaşıl işıqlarının yanıb-söndüyünü gördüklərini bildiriblər.

Polis sözçüsü Mattias Lundqren deyib: "Bu, əvvəllər Danimarka və Skone əyaləti üzərində aşkar edilmiş versiyaya bənzəyən daha böyük versiyadır. Nə baş verdiyi hələ də aydın deyil, lakin biz Aviasiya haqda qanunu pozduğuna görə şikayət vermişik".

Məqalədə bildirilir ki, uçan obyektlərin heç biri vurulmayıb və ya ələ keçirilməyib, polis şübhəli kimisə saxlamayıb. Bununla belə, qeyd edildiyi kimi, polis Danimarka və Norveçdə baş verən son hadisələrlə, xüsusən də Kopenhagen beynəlxalq hava limanı olan Kastrup üzərində pilotsuz uçuş aparatlarının aşkar edilməsi ilə aydın əlaqə görür.

Komanda mərkəzinin sözçüsü Evelina Olsson "İndi patrullar öz müşahidələrini təqdim etməlidirlər və biz şahidlərin ifadələrini toplayacağıq və bu məlumat əsasında davam edə bilib- bilməyəcəyimizi görəcəyik" deyə bildirib.