Şirvan Apellyasiya Məhkəməsində dələduzluqda təqsirləndirilən Nağı Malikovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Yaşar Həşimovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti qismən təmin edilib, Kürdəmir Rayon Məhkəməsinin hökmü cəza təyini və mülki iddiaya dair hissələrdə dəyişdirilib. Təqsirləndirilən şəxsə 1 il 1 ay 22 gün müddətə azadlığın məhdudlaşdırılması cəzası təyin edilib. Nağı Malikov barəsində seçilmiş həbs qətimkan tədbiri ləğv olunub və o, saxlanıldığı Ədliyyə Nazirliyi Penitensiar Xidmətin Umbakı Penitensiar Müəssisəsindən həbsdən dərhal azad edilib.
İttihama görə, təqsirləndirilən şəxs etibardan sui-istifadə və aldatma yolu ilə ayrı-ayrı şəxslərə məxsus iri həcmdə taxıl və arpa məhsullarını ələ keçirərək onlara ümumilikdə 28 200 manat məbləğində maddi ziyan vurmaqda ittiham olunub.
Araşdırma zamanı müəyyən edilib ki, Kürdəmir rayonunun Şilyan kəndində fəaliyyət göstərən MMC-nin layihə rəhbəri olan Nağı Malikov əvvəlcə zərərçəkmiş O.İsfəliyevlə razılığa gəlib. O, iki gün ərzində pulunu ödəyəcəyini vəd edərək müəssisənin anbarında saxlanılan ümumilikdə 24 560 kiloqram taxıl məhsulunu götürüb. Təqsirləndirilən şəxs taxılı başqa şəxslərə sataraq əldə etdiyi vəsaitdən yalnız müəyyən hissəsini – ümumilikdə 3 650 manat zərərçəkmişə göndərib. Qalan 8 630 manatı isə şəxsi ehtiyaclarına sərf edərək mənimsəyib.
Cinayət işi üzrə digər epizodda isə o, daha bir fermeri eyni üsulla aldadıb. Belə ki, zərərçəkmişə məxsus 9 min kiloqram arpa və 33 400 kiloqram taxılı pulunu sonradan ödəyəcəyini bildirərək təhvil alıb.
İstintaq materiallarında qeyd olunub ki, həmin məhsullar da sonradan müxtəlif şəxslərə satılıb. Nağı Malikov əldə etdiyi vəsaitdən cəmi 3 300 manat ödəyib, qalan 19 570 manatı isə mənimsəyib.
Beləliklə, hər iki epizod üzrə zərərçəkmişlərə vurulan ümumi maddi ziyanın 28 200 manat təşkil etdiyi müəyyən olunub.
Toplanmış sübutlar əsasında məhkəmə təqsirləndirilən şəxsin əməlini Cinayət Məcəlləsinin dələduzluğa dair müvafiq maddələri ilə tövsif edib.
Hökmə əsasən, Nağı Malikov 2 il 1 ay 28 gün müddətinə azadlıqdan məhrumetmə cəzasına məhkum olunmuşdu. Məhkəmə həmçinin onun barəsində seçilmiş başqa yerə getməmək haqqında iltizam qətimkan tədbirini ləğv edib, həbs qətimkan tədbiri seçərək təqsirləndirilən şəxsin məhkəmə iclas zalındaca həbs olunması barədə qərar vermişdi.
