ABŞ prezidenti polislərin hərəkətlərindən narahat olduğunu deyib.
Amerikada qaradərililərə qarşı zorakılıq məsələsi gündəmə gəlib. Həftə ərzində iki qaradərilinin polis tərəfindən öldürülməsi Birləşmiş Ştatlar prezidenti Barak Obamanı bəyanat verməyə vadar edib. Obama bütün amerikalıların artıq qaradərili məsələsinə diqqət göstərməli olduğunu deyib.
ANS TV-nin məlumatına görə, qaradərili insanların müntəzəm olaraq polis əməkdaşları tərəfindən öldürülməsi bütün Amerikalıları narahat edir. Bu fikri Amerika Birləşmiş Ştatlarının prezidenti Barak Obamadan bildirib. NATO sammitində iştirak etmək üçün Polşaya gələn Ağ Ev rəhbəri, verdiyi ilk açıqlamada Minnesota və Luiziana ştatlarında baş verən insidentləri pisləyib.
Çərşənbə günü Minnesotada qaradərili yeməkxana inzibatçısı maşını durdurularaq, polis tərəfindən övladı və yoldaşının gözü qarşısında güllələnib. Ondan bir gün əvvəl isə Luiziana ştatında Elton Sterlinq adlı qaradərili polis tərəfindən qətlə yetirilib.
Qətlə yetrilən Filanda Kastilin yanında olan yoldaşının polisin davranışını və qətl anını sosial mediyada canlı yayması isə hadisəyə daha çox diqqət cəlb edib. Həvəskar çəkilmiş kadrlarda polislərin Alton Sterlinqi həbs etməyə çalışdıqları və elə bu zaman ona atəş açdıqları görülür.
Bu hadisədən sonra ölkənin bütün kütləvi informasiya vasitələri polis zorakılığını pisləyən xəbərlər dərc etməyə başlayıblar. Polisin bu davranışına siyasilərlə yanaşı, sadə insanlar da etiraz etməyə başlayıb. Hər iki insidentin baş verdiyi şatatlarda etiraz aksiyaları keçirlir. Fəallar polis zorakılığına son qoyulmasını tələb edirlər.
