Bakı şəhəri, Nəsimi rayonu, Süleyman Rüstəm küçəsi, ev 47, mənzil 19 ünvanda yaşayan Adıgözəlova Könül Əlövsət qızı Prezident İlham Əliyevə, Birinci vitse-prezident Mehriban Əliyevaya, Prezidentin köməkçiləri – Fuad Ələsgərova, Kərəm Həsənova və Baş prokuror Kamran Əliyevə müraciət edərək, məhkəmə qərarlarının icra olunmaması və ona məxsus mənzillərin faktiki olaraq “yoxa çıxarılması” barədə məlumat verib.
Sürəti Gununsesi.info-ya təqdim olunmuş müraciətdə bildirilir ki, Könül Adıgözəlova ilə “İnter” MMC-nin direktoru Qabil Əliyev arasında 19 aprel 2019-cu il tarixində bağlanmış müqavilələrə əsasən, Bakı şəhəri, Xətai rayonu, Xocalı prospekti, 1181-ci məhəllədə inşa edilən binada iki mənzil satılıb.
“C” blokunun 22-ci mərtəbəsində yerləşən 195 kvadratmetr sahəsi olan 136 saylı mənzil;
23-cü mərtəbədə yerləşən 80 kvadratmetr sahəsi olan 137 saylı mənzil.
Vətəndaş bildirir ki, hər iki mənzilin dəyəri tam ödənilib və bunu təsdiq edən rəsmi maliyyə arayışı da “İnter” MMC tərəfindən təqdim olunub. Lakin buna baxmayaraq, tikinti şirkətinin rəhbəri Qabil Əliyev mənzilləri təhvil verməkdən yayınıb.
Hüquqları pozulduğu üçün vətəndaş məhkəməyə müraciət edib. Bakı şəhəri Xətai Rayon Məhkəməsinin 4 noyabr 2022-ci il tarixli, 2(011)-3790/2022 saylı qətnaməsi ilə “İnter” MMC-nin sözügedən mənzilləri vətəndaşa təhvil verməsi, habelə həmin mənzillərə dair sahiblik və istifadə hüquqlarına hər hansı maneə yaratmasının qadağan edilməsi qərara alınıb.
Bu məhkəmə qərarı Bakı Apellyasiya Məhkəməsi və Ali Məhkəmə tərəfindən də qüvvədə saxlanılıb.
Lakin bütün instansiyaların qərarlarına baxmayaraq, “İnter” MMC-nin sahibi Qabil Əliyev məhkəmə qətnamələrini icra etməkdən yayınır.
Müraciətdə xüsusilə vurğulanır ki, məhkəmə prosesləri zamanı mənzillərin mövcud olmaması ilə bağlı heç bir iddia irəli sürülməyib. Əksinə, Xətai Rayon Məhkəməsinin hakimi Əminə Abbasova tərəfindən mübahisəli mənzillərə yerində baxış keçirilib, müayinə protokolu tərtib olunub.
Həmin baxış zamanı Qabil Əliyev mənzillərin mövcud olduğunu təsdiqləyib və yalnız təhlükəsizlik səbəbi ilə binaya girişin məhdudlaşdırıldığını bildirib.
Buna baxmayaraq, məhkəmə qərarı icra mərhələsinə çatdıqdan sonra “İnter” MMC bu mənzillərin guya layihədə mövcud olmadığını iddia etməyə başlayıb.
Vətəndaş iddia edir ki, məhz məhkəmə qərarını icra etməmək üçün mənzillərin nömrələri dəyişdirilib, arakəsmələr sökülüb və yenidən tikilib, sahələr manipulyasiya olunaraq “belə mənzillərin mövcud olmadığı” görüntüsü yaradılıb.
Müraciətdə daha bir ciddi fakt diqqətə çatdırılır. Xətai Rayon Məhkəməsinin 19 fevral 2024-cü il tarixli icra vərəqəsinə əsasən, eyni ünvanda yerləşən A-1 blokunun 5-ci mərtəbəsindəki 189 saylı mənzilin özgəninkiləşdirilməsi “İnter” MMC-yə qadağan edilib.
Lakin vətəndaş bildirir ki, bu mənzil də sonradan ortadan yoxa çıxıb və qadağaya baxmayaraq faktiki olaraq icra olunmayıb.
“Mənə heç kim bata bilməz” iddiası
Müraciətdə ən ciddi ittihamlardan biri də budur ki, Qabil Əliyev öz əməllərini ört-basdır etmək üçün hüquq-mühafizə orqanlarının bəzi rəhbər şəxsləri ilə əlaqələrinin olduğunu iddia edir və bu səbəbdən məsuliyyətə cəlb olunmayacağını deyir.
Könül Adıgözəlova qeyd edir ki, bu iddiaların doğru olub-olmadığını bilməsə də, Xətai Rayon Məhkəmə İcra Şöbəsinin əməkdaşlarının faktiki olaraq Qabil Əliyevə qarşı heç bir ciddi tədbir görməməsi onun narahatlığını daha da artırır.
Qanun nə deyir?
Müraciətdə Mülki Prosessual Məcəllənin 15.2 və 15.3-cü maddələrinə istinad edilir. Həmin maddələrə əsasən, qanuni qüvvəyə minmiş məhkəmə qərarları bütün fiziki və hüquqi şəxslər üçün məcburidir və icra olunmaması məsuliyyət yaradır.
Vətəndaş bildirir ki, bütün bu müddət ərzində Qabil Əliyev heç bir məsuliyyət hiss etmir və məhkəmə hakimiyyətinə açıq hörmətsizlik nümayiş etdirir.
Müraciətin sonunda Könül Adıgözəlova Prezident İlham Əliyevdən məsələni nəzarətə götürməyi, məhkəmə qərarlarının icrasının təmin olunmasına və “İnter” MMC-nin rəhbərinin məsuliyyətə cəlb edilməsinə kömək göstərməyi xahiş edir.
Vətəndaş bildirir ki, ən azı tikinti şirkətinin yeni inşa etdiyi binadan mənzil ayrılmaqla belə məhkəmə qərarları icra oluna bilər və bununla da onun Konstitusion hüquqları bərpa edilər.
