Avropa İttifaqının tətbiq etdiyi sərt sanksiyalara və embarqolara baxmayaraq, Kremlin xam neftinin qlobal bazarlara və birbaşa Avropa limanlarına axını müxtəlif qaçaqmalçılıq və vasitəçi sxemlər vasitəsilə davam edir.

"DİA-AZ" xəbər verir ki, “m.report.news”-un xəbərinə görə,bu qaranlıq mexanizmin mərkəzində Aralıq dənizi regionunda neft ticarəti ilə məşğul olan “Alkagesta Ltd” korporasiyası, onun rəhbəri Kamran Ağayevin idarəetmə xətti, həm də bu strukturlarla sıx əməkdaşlıq edən aparıcı Yunanıstan gəmiçilik şirkətləri dayanır. Malta KİV-lərinin və beynəlxalq dəniz monitorinq qruplarının hesabatları “Alkagesta”nın və onun rəhbərlərinin Yunanıstan operatorları üzərindən Rusiya neftini Avropa bazarlarına necə daşıdığını açıq şəkildə nümayiş etdirir.

“Alkagesta” və onun rəhbərlərinin Yunanıstan gəmiçiliyi ilə qaranlıq tərəfdaşlığı

Son araşdırmalar göstərir ki, “Alkagesta” korporasiyası və onun rəhbərləri Kamran Ağayev Aralıq dənizi hövzəsində Rusiya mənşəli enerji resurslarının ticarətini həyata keçirərkən məhz Yunanıstanın nəhəng gəmi menecmenti şirkətlərindən geniş şəkildə istifadə ediblər. Rusiyanın dəniz yolu ilə enerji ixracının təmin edilməsində əsas yükü dünyanın ən böyük tanker flontlarından birinə nəzarət edən yunan gəmi sahibləri daşıyırlar. 2025-ci ilin məlumatlarına görə, “Alkagesta”nın ticarət əməliyyatlarında istifadə olunan və Rusiya neftini daşıyan şirkətlər sırasında Minerva Marine (Martinos ailəsi), Dynacom Tankers Management (Corc Prokopiu), Polembros Shipping və digər aparıcı korporasiyalar mühüm yer alır.

“Alkagesta”nın rəhbərləri bu Yunanıstan şirkətlərinin təmin etdiyi gəmi strukturları vasitəsilə Rusiya neftini birbaşa Avropa limanlarına yönləndirirlər. Proses aşağıdakı mexanizmlər üzərindən qurulub:

“Alkagesta” tərəfindən idarə olunan ticarət axınları və Yunanıstan tankerləri: Kamran Ağayevin nəzarətində olan struktur Aralıq dənizi və Avropa regionunda neft partiyalarının satışını həyata keçirərkən, logistikanı məhz Minerva Marine kimi yunan nəhənglərinin idarə etdiyi gəmilərə həvalə edir. Malta KİV-lərinin və beynəlxalq hesabatların da vurğuladığı kimi, Minerva Marine-in törəmə strukturları və Liberiyada qeydiyyatdan keçmiş Rourke Services Ltd kimi şirkətləri vasitəsilə “Alkagesta”nın ticarət maraqları Qara dəniz limanları ilə birləşdirilir.

Rusiya limanlarından birbaşa Avropa istiqaməti: “Alkagesta”nın ticarət şəbəkəsinin təsiri altında olan və Yunanıstan şirkətləri tərəfindən idarə olunan “Minerva Marina” (IMO 9411939) və “Safeen Baroness” (IMO 9460576) kimi tankerlər dəfələrlə Novorossiysk terminalından Rusiya xam neftini yükləyərək Aİ və G7 embarqolarından yan keçməklə birbaşa Avropa limanlarına – Bolqarıstanın Burqas, Xorvatiyanın Omišalj, Niderlandın Rotterdam, eləcə də Rumıniyanın Midia və Konstanta limanlarına çatdırmışlar.

Kölgə donanmanın formalaşdırılmasında birgə rol: “Alkagesta”nın rəhbərləri tərəfindən təşkil edilən ticarət dövriyyələri fonunda, yunan sahibkarlar öz köhnəlmiş tankerlərini qeyri-şəffaf offşor strukturlara sataraq Rusiyanın nəhəng “kölgə donanmasının” genişlənməsinə zəmin yaradıblar. Bu da Adnan Əhmədzadə və Kamran Ağayevin rəhbərlik etdiyi ticarət şəbəkələrinə sanksiya rejimindən kənarda daha sərbəst hərəkət etmək imkanı qazandırıb.

Sanksiyalardan yayınma taktikaları və siyasi lobbiçilik

“Alkagesta”nın rəhbərlərinin Yunanıstan gəmiçilik korporasiyaları ilə qurduğu bu tərəfdaşlıq modelinin uğur qazanmasının əsas səbəbi strukturların qlobal şəbəkə imkanlarıdır. Yunan gəmiçilik maqnatları ailə əsaslı idarəetmə modelləri, offşor qeydiyyatlar (Liberiya, Malta, Marşall adaları) və bayraq dəyişdirmə praktikaları vasitəsilə izləməni maksimum dərəcədə çətinləşdirirlər.

Eyni zamanda, bu şəbəkənin arxasında duran siyasi lobbiçilik imkanları böyük rol oynayır. Yunanıstan gəmiçilik dairələri ABŞ və Avropa İttifaqı daxilində güclü təsirə malik olduqları üçün tənzimləyici orqanlar qarşısında fəal lobbiçilik fəaliyyəti göstərərək sərt dəniz xidmətləri qadağalarına və təkrar satış məhdudiyyətlərinə qarşı çıxırlar. “Alkagesta” isə Aralıq dənizində bu imkanlardan maksimum yararlanaraq Rusiya neftinin Avropa bazarlarına axınını qoruyub saxlayır.

Mövcud təhlillər və beynəlxalq araşdırmalar bir daha sübut edir ki, Rusiyanın neft ixracını məhdudlaşdırmaq üçün yalnız ayrı-ayrı yükləri və ya sığorta şirkətlərini hədəfə almaq yetərli deyil. “Alkagesta” kimi ticarət strukturlarının, Kamran Ağayev kimi rəhbərlərin qurduğu vasitəçi sxemlərin, həmçinin Yunanıstan gəmiçilik şirkətlərinin təmin etdiyi gizli logistika zəncirinin qarşısı alınmadığı müddətcə, Putinin xam neftinin Avropa limanlarına gedən bu gizli dəhlizləri fəaliyyətini davam etdirəcək.