"Beyin axını" son illər Azərbaycanda da müzakirə olunan əsas məsələlərdən birinə çevrilib.
Belə ki, savadlı və ixtisaslı kadrların xaricə üz tutması, yəni “beyin axını” problemi çox ciddi vəziyyət alır. Hətta bu mövzu "Yeni Klinika"nın İqtisadi məsələlər üzrə sabiq direktor müavini Ravil Tağıyevin vəzifəsindən ayrılması fonunda yenidən gündəmə gəldi.
Ravil Tağıyev bildirib ki, “qrin kart” proqramının qalibi olduğu və böyük övladı ABŞ-də ali təhsil alacağı üçün ölkəni tərk etmək qərarına gəlib.
“Cebheinfo.az”-a danışan deputat Vüqar Bayramov bildirib ki, "beyin axını" qlobal problemdir və əksər ölkələrdə müşahidə edilir:
“Xüsusən də nisbətən zəif inkişaf etmiş və ya inkişaf etməkdə olan ölkələrdən daha inkişaf etmiş ölkələrə "beyin axını" baş verir. Əslində, pozitiv mənada "beyin axını"nın ən çox müşahidə olunduğu ölkə ABŞ-dir. Yəni ABŞ-yə digər ölkələrdən daha çox intellektual potensiala malik insanlar gedlir.
Eyni zamanda, Asiya və Afrikada da neqativ "beyin axını" müşahidə olunur. Bu qitələrdə yerləşən bir sıra dövlətlərdən inkişaf etmiş ölkələrə köç edənlərin sayında kəskin artım qeydə alınır”.
Vüqar Bayramovun sözlərinə görə, daha yaxşı həyat və yüksək maaş "beyin axını"nın əsas səbəblərindən biridir:
“Tədqiqatlar da göstərir ki, məhz bu amillər beyin axınını stimullaşdıran başlıca faktorlardandır. Ümumiyyətlə, nəzərə alsaq ki, həm qlobal, həm də milli iqtisadiyyatın strukturu getdikcə innovativləşir, insan kapitalına ehtiyac da artır. İnsan kapitalı formalaşdıqca isə qlobal miqyasda beyin axınını daha aydın müşahidə edirik”.
Deputat bildirib ki, Azərbaycan xarici təhsil proqramı çərçivəsində gənclərimizin xaricdə, xüsusən də aparıcı universitetlərdə təhsil almasını dəstəkləyir və maliyyələşdirir. Məqsəd isə ölkəmizin insan kapitalının daha da inkişafına nail olmaqdır:
“Bu baxımdan məqsəd mövcud imkanlardan, eyni zamanda xaricdəki aparıcı universitetlərin və bəzi hallarda şirkətlərin resurslarından istifadə etməklə insan kapitalını formalaşdırmaq, xüsusən də növbəti dövrün çağırışlarına uyğun olaraq iqtisadiyyatın innovativ ekosistemini daha da gücləndirməkdən ibarətdir.
Ona görə də Azərbaycan üçün insan kapitalı hesab edilən vətəndaşlarımızın ölkədə qalıb işləməsi və bu istiqamətdə dövlət tərəfindən yaxından dəstəklənməsi ilə bağlı siyasət getdikcə daha da genişlənir”.
