"Zabrat yolu Bakı kəndlərini mərkəzlə birləşdirən əsas yollardan biridir. Sabunçu qovşağından Zabrat dairəsinədək məsafə cəmi 6 km olsa da, adam bu yolu 40-45 dəqiqəyə keçəndə sevinir..." "DİA-AZ" xəbər verir ki, bunu özünün sosial şəbəkə hesabında tanınmış jurnalist Samir İsmayıl yazıb.

O daha sonra fikrini belə davam etdirir: "Azərbaycan Yerüstü Nəqliyyat Agentliyinin məlumatına görə gündə bu yolla avtobuslar vasitəsilə 110 min sərnişin daşınır, 18 müntəzəm avtobus marşurutu var. Gün ərzində 1600 avtobus keçişi qeydə alınır. Bu yoldan ən azı gündə 110 min nəfər sərnişin də öz avtomobili və taksi ilə keçir. Bəs belə bir strateji yol niyə belə bərbad gündədir? Yol örtüyü yararsız vəziyyətdədir. Piyada səkiləri ya yoxdur, ya da istifadəyə yararsızdır. Belə bir vəziyyətdə olan yolun ətrafında isə bəzək işləri aparılır. Layihə haqqında məlumat yoxdur. İcraçı və sifarişçi məlum deyil. Divara yapışdırılan plitələrin bir hissəsini bir həftədən sonra söküblər. Səbəbi bilinmir..."