Xəbər verdiyimiz kimi, Bakı Qızlar Universitetinin fəaliyyəti dayandırılıb.

Gələcəkdə oxşar halların təkrarlanmaması üçün digər ali təhsil sistemində hansı islahatların həyata keçirilməsinə ehtiyac var?

Redaktor.az-a mövzu ilə bağlı fikirlərini bölüşən təhsil eksperti Məzahir Məmmədli bildirdi ki, Qızlar Universitetinin bağlanması digər ali təhsil müəssisələri üçün ciddi siqnaldır:

"Xüsusilə bəzi özəl universitetlər öz imkanlarını yenidən qiymətləndirməli, təhsil proqramlarını nəzərdən keçirməli, professor-müəllim heyətinin potensialını təhlil etməli və fəaliyyətlərini ən azı mövcud akkreditasiya standartlarına uyğunlaşdırmalıdırlar. Çünki plansız fəaliyyət, eləcə də akkreditasiya standartlarına uyğun olmayan yanaşmalar müəyyən problemlər və boşluqlar yaradıb. Görünən odur ki, bu məsələlərə Elm və Təhsil Nazirliyi və Nazirlər Kabineti tərəfindən artıq güzəşt edilməyib. Əgər bu cür uyğunsuzluqlar davam edərsə, Elm və Təhsil Nazirliyinin də vurğuladığı kimi, təhsildə güzəştə yer yoxdur. Nə qədər ki, güzəştlər davam edəcək, ali təhsil müəssisələrimizin nüfuzu və beynəlxalq reytinqlərdə mövqeyi zəifləməkdə davam edəcək. Hazırda görürük ki, cəmi bir neçə universitetimiz dünya reytinqlərində yer ala bilir. Buna görə də ali təhsil sisteminin daha operativ və keyfiyyətli şəkildə inkişafı üçün belə radikal addımların atılmasına ehtiyac var".