Rusiya və Avrasiya İqtisadi Birliyinin (AİB) digər ölkələrinin liderləri Qərb yolunu seçməyin və AİB-dən çıxmağın ağır iqtisadi nəticələri barədə açıq şəkildə xəbərdarlıq edərək İrəvana qarşı ritorikalarını sərtləşdirdilər. AİB ölkələri liderlərinin mayın 29-da Astanada keçirilən sammitində İrəvana yönəlik bəyanatı Ermənistanda əsas müzakirə mövzusudur. Belə ki, AİB ölkələri digər üzv olan Ermənistan qarşısında konkret şərt qoydu: Avropa İttifaqını (Aİ) seçirsənsə, AİB-də qala bilməzsən. Eyni zamanda, bəyanatda Ermənistanı açıq şəkildə təhdid elementləri də mövcuddur. Və hazırda AİB-lə, konkret desək, Rusiya ilə Ermənistan arasında münasibətlərdə ciddi gərginlik hökm sürür.

Ermənistan mediasının məlumatına görə, erməni siyasi elitası gərginliyi azaltmağa və ixracın Avropaya yönəlməsinin dəyərini hesablamağa çalışarkən, Ermənistan fermerləri artıq Rusiya bazarında faktiki məhdudiyyətlərin ilk ağır zərbələrini alırlar.

AİB-in çağırışı və seçim qiyməti

“Verelq” nəşri yazır ki, 29 mayda Qazaxıstanda keçirilən AİB sammitindən sonra Rusiya Prezidenti Vladimir Putin Ermənistanın inteqrasiya strukturlarından çıxması halında onu gözləyən "qırmızı xətləri" və iqtisadi itkiləri açıqladı. Moskva açıq şəkildə sərt geosiyasi mövqe tutur. Putin mətbuat konfransında bildirib ki, "əgər Ermənistan AİB-dən çıxsa, vətəndaşlar Rusiyada işləmək üçün iş icazəsi almağa məcbur olacaqlar". O iqtisadi əlaqələrin kəsilməsinin kənd təsərrüfatı məhsulları bazarlarının bağlanmasına da səbəb olacağını vurğulayıb: "Azad ticarət müqavilələrində iştirak dayandırılacaq".

Rusiya lideri Qərbin vədlərinə şübhə ilə yanaşaraq vurğulayıb: "Avropa Ermənistana yalnız 2,5 milyard avro investisiya vəd edir, Rusiya isə artıq ölkə iqtisadiyyatına xeyli investisiya qoyub". Lakin onun ən sərt xəbərdarlığı enerji ilə bağlıdır. Putinin sözlərinə görə, Rusiya enerjisinin qiymətlərinin artması Ermənistana ÜDM-in təxminən 14 faizinə başa gələ bilər.

Bu arada, Astanada keçirilən Ali Avrasiya İqtisadi Şurasının zirvə toplantısında AİB liderləri Ermənistanın Aİ üzvlüyü ilə bağlı referendum keçirməsinə çağıran birgə bəyanat yayıblar. Bununla onlar İrəvana geosiyasi istiqamətini aydınlaşdırmaq üçün koordinasiyalı təzyiq göstərirlər. Putin çıxışını birmənalı olmayan mesajla başa vurub: "Ən yaxşı hesab etdiyinizi edin... Necə istəyirsinizsə, elə də olsun".

İrəvanın reaksiyası: Aİ bazarı hələ alternativ deyil

Rəsmi İrəvan sərt etirazlardan və vəziyyəti gərginləşdirmədən çəkinərək müzakirəni sakit saxlamağa çalışır. Hakim “Mülki Müqavilə” Partiyası bildirir ki, Aİ-yə daxil olmaq üçün həyata keçirilən islahatlar uyğun olduğu müddətcə Ermənistan AİB üzvü olaraq qalacaq.

“Verelq” nəşrinin yazdığına görə, lakin iqtisadçılar dolayı yolla etiraf edirlər ki, bu mərhələdə Avropa bazarı, ilk növbədə rəqabətsiz istehsal xərcləri səbəbindən Rusiya bazarını əvəz edə bilmir. Ermənistanın iqtisadiyyat naziri Gevorq Papoyan deyib ki, Ermənistan məhsulları keyfiyyət baxımından Avropa standartlarına cavab versə də, qiymət baxımından daha aşağıdır.

“Erməni fermer çiyələk tinglərini fransız fermeri ilə yanaşı, Hollandiya mağazasından alır. Lakin erməni fermer bu tingləri Ermənistana daşınması üçün pul ödəyir və sonra bu çiyələklərin Hollandiyaya və ya Fransaya daşınması üçün əlavə ödəniş edir. Üstəgəl gömrük rüsumları və nəqliyyat xərclərini ödəməlidir”, - deyə Papoyan “CivilNet”ə verdiyi müsahibədə qeyd edib və bildirib ki, Avropa fermerləri dövlətdən 50 faizə qədər kompensasiya və müxtəlif subsidiyalar alırlar.

Nazirin sözlərinə görə, Aİ daxilində, eləcə də digər ölkələrdə (Türkiyə, Mərakeş) qeyri-mütənasib dərəcədə ucuz istehsalçılar var.

Hökumət həmçinin itkilərin kompensasiyasının potensial xərclərini hesablayıb. Nazirin sözlərinə görə, təkcə gül, pomidor və bibər ixracının subsidiyalaşdırılması və yönləndirilməsi ilin sonuna qədər təxminən 20-30 milyon dollar tələb edəcək. Nazir iddia edir ki, “bu, dözülə bilən bir yükdür”, lakin fermerlərin reallığı bunun əksini sübut edir.

Fermerlərin narahatlıqları: milyonlarla itki və kredit

Yüksək səviyyəli siyasi və seçki elanlarının kölgəsində erməni fermerlər özlərini çöküş vəziyyətində tapıblar. Rusiya bazarına qoyulan məhdudiyyətlər və ağır yük maşınlarının sərhəddən geri qayıtması fonunda daxili bazar həddindən artıq dolub və məhsulların qiymətləri ucuzlaşıb. Ararat vadisindəki bir gül yetişdiricisi, öz məhsulunu ümidsizcə təsvir edərək, itkilərini belə təsvir edib: "İndi hər şey bağlanıb. Zərər milyonlarla dollara çatır. Əvvəllər biznesimizi davam etdirmək üçün ucuz kreditlər götürürdük, amma indi yeni, daha bahalı kreditlər götürməyə məcburuq... Və bu, yalnız güllər üçün problem deyil: göyərti və çiyələk də sərhəddən geri qaytarılır".

Fermer Avropaya ixrac perspektivini qeyri-real sayır: "Biz Avropadan gül şitilləri gətiririk, indi onlara satacağıq? Avropa ən seçilmiş, ən sağlam çiçəklərimizdə yüzlərlə qüsur tapacaq. Və Rusiya yolu bağlıdır. Daxili qiymətlər o qədər düşüb ki, 5-6 dəstə gül 1000 drama satılır ki, bu da artan sellofan qiymətinin xərcini belə ödəmir”.

Tərəvəz yetişdiriciləri də eyni böhranı yaşayırlar. 40 milyon dramlıq kredit götürən (faizlə birlikdə 43 milyon dram) istixana sahiblərindən biri istixanasında yığılan 4-5 ton pomidorun xarab olduğunu bildirib. Bazarda ucuz İran malları mövcud olduğu və ixracın olmadığı üçün pomidorun qiyməti 1000 dramdan 200 dramına düşüb.

"Borc hər gün artır... Kreditləri ödəmək və ailələrimizi dolandırmaq üçün məhsulumuzu sata bilmirik", - deyə fermer narahatdır.

O hökumətin məhsulu İrəvanda kiçik pərakəndə satış məntəqələrində satmaq təklifini gülünc hesab edir: "Kimsə gəlib 1 kiloqram alır, mən isə 100 kiloqram satıram. 99 kiloqramını zibilə atım? Ermənistanda mallarımızı sata bilməyəcəyik, mümkün deyil... Onsuz da gündəlik çörəyimizlə bağlı problemimiz var".

Enerji problemi

Əsas təsir gücü - enerji qiymətləri, xüsusən də qaz – bahalaşdanda ​​vəziyyət kulminasiya nöqtəsinə çatacaq. Ermənistan kənd təsərrüfatı, xüsusən də istixana təsərrüfatı, ucuz Rusiya qazı və dövlət subsidiyaları istehlakı modelinə əsaslanır. Bazarın bağlanmasına, ixracın azalmasına və fermerlərin kredit yükünə qaz qiymətinin artması əlavə olunarsa, "mükəmməl fırtına" üçün bütün zəruri maddələr yaranacaq. Alternativ rəqabətli bazarlar və işləyən sığorta sistemi olmadan ölkənin kənd təsərrüfatı sektoru ciddi problemlərlə üzləşə bilər ki, bu da yaxın aylarda İrəvan üçün ciddi sosial-iqtisadi çətinlik yarada bilər.