İsrailin Baş naziri Benyamin Netanyahu ilə "Hizbullah"ın rəhbərliyi arasında Livanda atəşkəsin əldə olunmasına dair razılıq əldə edilib.

Bu barədə məlumat verən ABŞ Prezidenti Donald Tramp bildirib ki, baş nazir Benyamin Netanyahu ilə məhsuldar söhbəti olub.

Onun sözlərinə görə, İsrail qoşunları daha Beyruta doğru irəliləməyəcək.

Tramp həmçinin əlavə edib ki, "Hizbullah" nümayəndələri də hərbi əməliyyatları dayandırmağa razılaşıb.

Bu əsasda Tramp Livan ətrafında vəziyyətin normallaşdığı və İranla atəşkəsin müddətini uzatmaq və Hörmüz boğazını tamamilə yenidən açmaq barədə sazişin yaxın bir həftə ərzində əldə oluna biləcəyini də diqqətə çatdırıb. O, həmçinin bu sazişi "hərbi qələbədən daha dəyərli" adlandırıb.

Atəşkəs pozulsa da, danışıqlar davam edir...

ABŞ və İran arasında qarşılıqlı zərbələr yenidən başlayıb. ABŞ Mərkəzi Komandanlığının məlumatına görə, İranın buraxdığı raket və pilotsuz uçuş aparatlarının bir hissəsi zərərsizləşdirilib, daha sonra Qəşm adasındakı idarəetmə obyektlərinə zərbələr endirilib. İran isə buna cavab olaraq regiondakı ABŞ hərbi obyektlərini və Vaşinqtonla əlaqəli gəmiləri hədəf aldığını bildirib. Eyni zamanda, Küveytdəki Amerika qüvvələrinə qarşı həyata keçirilən növbəti PUA hücumunun da qarşısının alındığı açıqlanıb.

Bütün bunlara baxmayaraq, ABŞ Prezidenti Donald Tramp bu gün yayımlanan müsahibəsində yenidən sülh mesajları verib. O, hətta İranın Ali lideri Müctəba Xamenei ilə görüşmək ehtimalını da istisna etməyib.

Savaş başa çatır?

Mövzu ilə bağlı Bizim.Media-ya açıqlamasında politoloq Tofiq Abbasov bildirib ki, prosesin bundan sonra necə cərəyan edəcəyi yenə də ABŞ Prezidentindən asılı olacaq:

“O müttəfiqi İsraili cilovlamalı, onun qarşısında sərt tələb qoymalıdır ki, prosesə maneə olmasın. Bu baş verərsə, İran bəlkə də ABŞ ilə dil tapsın və onlar münasib çıxış yoluna gələ bilsinlər.

Digər tərəfdən, İsrail ilkin razılaşma və şərtləri ciddi şəkildə pozur. İran “Hizbullah”ın müttəfiqi olduğunu heç zaman gizlətməyib. Bu əsasda da tələb edir ki, atəşkəs elan olunursa, İsrail də Livandan çıxmalıdır. Bu olmasa, danışıqlardan çıxacağını bildirib. Livan isə dəfələrlə İsrail tərəfindən işğala məruz qalıb. Razılaşmalara rəğmən İsrail yenidən Livanın cənubuna hücum etdi.

Yəni həmin ərazidə vəziyyətin kritik olması bilavasitə İsrailin yürütdüyü siyasətlə bağlıdır. Livanın cənubunda yaşayanlara gəldikdə onlar da yerli insanlardır, gəlmə deyil və onlara proksi qüvvələr demək olmaz. “Hizbullah”la vuruşmaq İsrail üçün çətindir. Çünki ilk növbədə relyef “Hizbullah”ın müttəfiqidir”.

Müsahibimiz düşünür ki, problemin həllinin açarı indi İranın əlindədir:

“Çox güman Babel-Mandeb keçidini də İran Husilərin əli ilə bloklayacaq. Bu baş verərsə, dünya iqtisadiyyatı hava çatışmamazlığı ilə üz-üzə qalacaq, qiymətlər kəskin artacaq. ABŞ-nin yüksək rütbəli generalları, Petreus, Duqlas Marqreqr, Mərkəzi Kəşfiyyat İdarəsinin keçmiş rəisi Leon Panetta Amerikanın müharibədə məğlub olduğunu bildirirlər. Bu da Trampın yanlış siyasətinin nəticəsidir. Məsələnin həllinin açarı indi, demək olar ki, İranın əlindədir”.