“Nika Qvaramiyanın səsləndirdiyi fikirlər bir neçə gün əvvəl onun öz partiyasının nümayəndəsi Baramidzenin ifadə etdiyi kontekstlə üst-üstə düşür. Bu, ölkənin milli maraqlarına xəyanətdir. Sxinvali və Abxaziya münaqişələrini Ermənistan nümunəsi ilə necə müqayisə etmək olar?
Teleqraf xəbər verir ki, bunu “Qaxariya - Gürcüstan naminə” partiyasının üzvü, deputat Ketivan Bakaradze deyib.
“Mənim üçün, bu ölkənin sıravi vətəndaşlarından biri və Abxaziya icmasının nümayəndəsi kimi, bu, tamamilə qəbuledilməzdir və ölkənin milli maraqlarına xəyanətdir. Bu ay – ölkəmiz üçün çox ağrılı avqustda Papuaşvili və Kobaxidze tərəfindən tez-tez guya (Rusiya ilə) müharibəni bizim ölkəmizin başladığı barədə fikirlər səsləndirilir. Bu, ən böyük cinayət, ən böyük ittihamdır və ölkəmizin suverenliyinə, milli maraqlarına ziddir.
Bu cəfəng fikirlərin Kobaxidze-Papuaşvili, yoxsa Qvaramiya-Baramidze dueti tərəfindən səsləndirilməsinin bizim üçün fərqi yoxdur. Ölkəmin ərazi bütövlüyünün bərpasına zidd olan hər şey tamamilə qəbuledilməzdir, milli maraqlara xəyanətdir”, - Bakaradze vurğulayıb.
“Müxalifət Alyansı”nın liderlərindən biri Nika Qvaramiya bundan əvvəl “Formula” telekanalının efirində bildirmişdi:
“Paşinyana ona görə heyranam ki, o, travmaların öhdəsindən gəlməyi bacardı. Bu, Qarabağın təhvil verilməsi idi, elə deyilmi? Müharibə oldu, ardınca (müharibədə uduzduqdan sonra - red.) Ermənistan bəyan etdi ki, “məni bundan xilas edin, aparın”.
Xatırladaq ki, Ermənistan Nikol Paşinyan 44 günlük müharibə zamanı və ora qədər Qarabağın Azərbaycana məxsus olduğunu bildirməyib. Müharibədən təxminən iki il sonra Qarabağ da daxil Azərbaycanın ərazi bütövlüyünü tanıdığını, çox sonralar da bunun “Ermənistan üzərində yük” olduğunu bəyan edib. Ona qədər isə məsələyə Ermənistan dövlətinin işğalçı-separatçı konsepsiyası çərçivəsində baxıb. Bu mövqeyin dəyişib-dəyişmədiyi isə Azərbaycana qarşı ərazi iddiasının yer aldığı Ermənistan Konstitusiyasınında dəyişiklik edilib-edilməyəcəyi ilə məlum olacaq. Bu, yekun sülh sazişinin imzalanması üçün rəsmi Bakının tələbidir.
Müharibə isə Nikol Paşinyanın “Qarabağ Ermənistandır” təxribatına və ora qədər 30 il davam edən işğala Azərbaycanın ən haqlı reaksiyası idi. Bu, Qarabağın Ermənistan tərəfindən Azərbaycana təhvil verilməsi prosesi yox, Ermənistanın davam edən işğalının və diplomatik həll prosesindən boyun qaçırmasının doğurduğu nəticəydi. Yekunda da Azərbaycan işğal edilmiş ərazilərini və ərazi bütövlüyünü bərpa etdi.
