Gəncə Ağır Cinayətlər Məhkəməsində həyat yoldaşını xüsusi amansızlıqla qəsdən öldürməkdə təqsirləndirilən Arif Hacıyevin cinayət işinin bəzi detalları məlum olub.

Pravda.az-ın əldə etdiyi məlumata görə, hakim Mikayıl Məmmədzadənin sədrliyi ilə keçirilən prosesdə ittiham aktı elan olunub.

İttihama görə, təqsirləndirilən şəxs qısqanclıq zəminində arvadına küçənin ortasında çoxsaylı bıçaq zərbələri endirərək onu azyaşlı oğlunun gözü qarşısında qətlə yetirib.

İş materiallarına əsasən, hadisə 2025-ci il oktyabrın 6-da Şəmkir rayonunun Şiştəpə kəndində qeydə alınıb.

Belə ki, Arif Hacıyev həyat yoldaşı, zərərçəkmiş Röyalə Hacıyevanın başqa şəxslə sevgi münasibətində olduğunu düşündüyü üçün onu öldürmək qərarına gəlib.

Bildirilir ki, hadisə günü saat 16:50 radələrində Şiştəpə kəndində yerləşən "Paşa Məscidi"nin yaxınlığındakı dördyol kəsişməsində ər-arvad qarşılaşıb. Onların arasında əvvəlcə sözlü mübahisə yaranıb. Mübahisə zamanı qadının onu evə buraxmaması, şəxsi əşyalarını verməməsi və əlindəki paketlə ona zərbələr endirməsi təqsirləndirilən şəxsi hiddətləndirib. Bu zaman paketin içərisindən yerə düşən məişət təyinatlı mətbəx bıçağını götürən Arif arvadına ardıcıl şəkildə çoxsaylı bıçaq zərbələri endirib.

Ekspertiza rəylərinə əsasən, zərərçəkmişə boyun və döş qəfəsi nahiyələrinə həyat üçün təhlükəli olan deşilmiş-kəsilmiş yaralar yetirilib.

Xüsusilə boynun ön hissəsində arteriya və venaları zədələyən, qırtlaq boşluğuna keçən yara, eləcə də ürək və sol ağciyəri zədələyən döş qəfəsi yarası ölümə səbəb olan əsas xəsarətlər kimi qiymətləndirilib.

Bundan başqa, Röyalə Hacıyevanın bədəninin müxtəlif nahiyələrində – sol qol, dirsək, said və döş qəfəsində çoxsaylı kəsilmiş yaralar, diz nahiyəsində isə sıyrıq xəsarətləri aşkarlanıb.

Cinayət azyaşlı uşağın gözü qarşısında törədilib və bu hal xüsusi amansızlıq əlaməti kimi qiymətləndirilib.

Məhkəmədə ifadə verən Arif Hacıyev özünü ittiham üzrə qismən təqsirli bildiyini deyib.

Onun sözlərinə görə, mərhum həyat yoldaşı ilə uzun illər evli olub və onların üç övladı var.

Təqsirləndirilən şəxs bildirib ki, son illər Röyalə Hacıyevanın ona xəyanət etdiyindən şübhələnib. O, ailənin dolanışığı üçün Şəki rayonunda maldarlıqla məşğul olduğunu, heyvanlarını sataraq əldə etdiyi təxminən 27 000 manatı ailəsinə göndərdiyini deyib.

Arif ifadəsində qeyd edib ki, sonradan həyat yoldaşının başqa şəxslə yazışmalarını aşkarladığını iddia edib, bu səbəbdən ailədə ciddi problemlər yaranıb və boşanmaq üçün məhkəməyə müraciət edib.

Təqsirləndirilən şəxsin sözlərinə görə, həyat yoldaşı əvvəl istifadə etdiyi telefonu sındırıb, daha sonra isə aldığı yeni mobil telefona şifrə qoyub.

O bildirib ki, sonradan "WhatsApp" yazışmalarını bərpa etdirərək Röyalə Hacıyevanın başqa kişi ilə münasibətdə olduğunu öyrənib və bu barədə qadının yaxınlarına da məlumat verib.

Arifin iddiasına görə, ailə üzvləri əvvəlcə qadını evdən aparacaqlarını desələr də, sonradan bunu etməyiblər.

Hadisə gününü xatırlayan təqsirləndirilən şəxs bildirib ki, həmin gün təsadüfən həyat yoldaşı ilə qarşılaşıb və ondan evdə qalan paltarlarını verməsini istəyib: “Röyalə isə buna etiraz etdi, nalayiq ifadələr işlətdi və əlindəki sellofan paketlə baş nahiyəsinə zərbə endirdi. Həmin vaxt paketin içərisində olan mətbəx bıçağı yerə düşdü. Mən isə bıçağı götürərək ona bir neçə dəfə zərbə vurdum. Lakin bunu əvvəlcədən planlaşdırmamışdım və həyat yoldaşımı öldürmək niyyətim yox idi.

Məhkəmədə Arif Hacıyev qeyd edib ki, hadisə anında özünü müdafiə etdiyini düşündüyündən bıçaqdan istifadə edib.

Təqsirləndirilən şəxs neçə zərbə endirdiyini xatırlamadığını, həmin an özünü idarə edə bilmədiyini və hadisədən sonra polis şöbəsinə gedərək könüllü təslim olduğunu deyib.

Onun sözlərinə görə, hadisə yerini tərk edərkən həyat yoldaşı və oğlu sərbəst şəkildə ev istiqamətində hərəkət ediblər. Sonradan qadının xəstəxanada vəfat etdiyini öyrəndiyini bildirib.

Təqsirləndirilən şəxsə Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə ittiham verilib.