Azərbaycan və Qazaxıstan Xəzər dənizinin dibi ilə Aktau–Sumqayıt marşrutu üzrə fiber-optik rabitə xəttinin dəniz hissəsinin çəkilişini yekunlaşdırıb.
Teleqraf xəbər verir ki, bu barədə Qazaxıstanın Rəqəmsal İnkişaf Nazirliyi məlumat yayıb.
Məlumata görə, layihəni "Kazakhtelecom" və "AzerTelecom International" şirkətləri həyata keçirir. Sualtı kabel 20 min tondan artıq ağırlığı olan xüsusi gəmi ilə çəkilib, işlərə 70 mütəxəssis cəlb olunub. Hazırda kabel sahil infrastrukturuna qoşulur, qurudakı obyektlərin tikintisi isə payızda başa çatacaq və həmin vaxt sınaqlar keçiriləcək.
Yeni magistral xətt iki ölkənin rəqəmsal sistemini birləşdirməklə yanaşı, Asiya ilə Avropa arasında birbaşa və sürətli internet əlaqəsi yaradacaq. Layihə dövlət büdcəsindən vəsait cəlb edilmədən, tamamilə operatorların öz hesabına maliyyələşdirilib.
