Sumqayıt Apellyasiya Məhkəməsində dələduzluqda təqsirləndirilən Əjdər Tağıyevin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, sonuncu keçirilən prosesdə qərar elan olunub.

Qərara əsasən, apellyasiya şikayəti təmin edilməyib.

İttihama görə, təqsirləndirilən şəxs etibardan sui-istifadə və aldatma yolu ilə özgənin əmlakını qanunsuz olaraq ələ keçirmək məqsədilə zərərçəkmiş D.D.-ni Yasamal rayonu ərazisində yerləşən MİDA sosial yaşayış komplekslərində 3 və 4 otaqlı mənzillərin alınmasına köməklik göstərə biləcəyinə inandırıb.

İstintaq materiallarına əsasən, o, tanışlarının vasitəsilə zərərçəkmişlə əlaqə yaradaraq dövlət proqramı çərçivəsində mənzil əldə etməsi üçün xüsusi imkanlarının və əlaqələrinin olduğunu bildirib. Əjdər Tağıyev mənzilin rəsmiləşdirilməsi və müxtəlif prosedurların həyata keçirilməsi adı altında D.D.-dən mərhələli şəkildə pul tələb edib.

Müəyyən olunub ki, ilk ödənişlərdən biri Sumqayıt şəhərinin 45-ci məhəlləsində yerləşən "Unibank" filialının qarşısında həyata keçirilib. Həmin vaxt zərərçəkmiş ona 700 ABŞ dolları, həmin günün məzənnəsi ilə 1 190 manat ekvivalentində və əlavə olaraq 4 850 manat nağd pul verib.

Sonrakı dövrlərdə zərərçəkmiş müxtəlif tarixlərdə "Emanat", "Mpay" və "MilliÖn" ödəniş terminalları, eləcə də mobil bank tətbiqləri vasitəsilə təqsirləndirilən şəxsin Kapital Bank hesabına dəfələrlə pul köçürüb.

Bundan başqa, Sumqayıt şəhərinin müxtəlif ərazilərində yerləşən marketlərin, bank filiallarının və digər məkanların qarşısında ona bir neçə dəfə nağd şəkildə də pul təqdim edib.

Cinayət işi üzrə araşdırma zamanı məlum olub ki, köçürülən və nağd şəkildə verilən məbləğlər arasında 200, 300, 400, 650, 800, 850, 1000, 1100, 1800, 2000, 4000 və digər məbləğlər, eləcə də 1000 və 500 ABŞ dolları ekvivalentində ödənişlər olub.

Beləliklə, Əjdər Tağıyev D.D.-dən ümumilikdə 27 690 manat məbləğində pul alaraq onu mənimsəyib. İstintaqla müəyyən edilib ki, o, üzərinə götürdüyü öhdəliyi yerinə yetirmək niyyətində olmayıb, vəd etdiyi mənzillərin alınmasını təmin etməyib və əldə etdiyi vəsaiti şəxsi məqsədləri üçün istifadə edib.

Toplanmış sübutlar əsasında onun əməli etibardan sui-istifadə və aldatma yolu ilə xeyli miqdarda maddi ziyan vurmaqla törədilmiş dələduzluq kimi qiymətləndirilib.

Sumqayıt Şəhər Məhkəməsi təqsirləndirilən şəxsi Cinayət Məcəlləsinin 178.2.4-cü (dələduzluq) maddəsi ilə təqsirli bilib və ona 3 il 4 ay müddətinə azadlıqdan məhrum etmə cəzası təyin edib.

Bundan əlavə, Cinayət Məcəlləsinin 66.5-ci maddəsinə əsasən, Sumqayıt Şəhər Məhkəməsinin əvvəlki hökmü ilə təyin edilmiş, lakin icra olunmamış 4 500 manat məbləğində cərimə cəzası hazırkı hökmlə müəyyən edilən cəza ilə tam toplanılıb. Nəticədə məhkəmə Əjdər Tağıyevə 3 il 4 ay müddətinə azadlıqdan məhrumetmə və 4 500 manat məbləğində cərimə cəzaları təyin edib. Hökmə əsasən, o, azadlıqdan məhrumetmə cəzasını ümumi rejimli cəzaçəkmə müəssisəsində çəkəcək.