Teleməkanda son günlər baş verən dəyişikliklər – bir sıra aparıcı və müğənnilərə, eləcə də sosial layihələrə tətbiq olunan qadağalar müsbət qarşılansa da, bu addımların cəmiyyətin ümumi maraqları naminə yetərli olduğunu demək çətindir. Belə ki, bəzi bayağı ifaçılar efirdən uzaqlaşdırılsa da, kənarda keçirilən tədbirlərdə daha böyük auditoriya qarşısında çıxış edirlər. Nəticədə, cəmiyyətin estetik zövqünün korlanması, milli-mənəvi dəyərlərə zərbə vurulması və musiqi mədəniyyətimiz haqqında mənfi rəyin formalaşması prosesi davam edir.

Konkret desək, insanlar gündəlik həyatlarında, xüsusilə toylarda, restoran və kafelərdə, ictimai nəqliyyatda və digər məkanlarda hələ də zövqsüz musiqilərin “əsiri” olaraq qalırlar. Bu isə göstərir ki, yalnız televiziya üzərindən tətbiq olunan məhdudiyyətlər musiqi mühitini qorumaq üçün kifayət deyil.

Mövzu ilə bağlı KONKRET.az-a danışan əməkdar artist, bəstəkar-müğənni Elza Seyidcahan bildirib ki, cəmiyyətin musiqi zövqünü qorumaq üçün peşəkar senzura mexanizmi mütləq tətbiq olunmalıdır. Onun sözlərinə görə, ictimai nəqliyyatdan restoranlara qədər bütün məkanlarda səslənən musiqilərə nəzarət edilməlidir.

Sənətçi hesab edir ki, yüksək Avropa standartlarına uyğun, estetik baxımdan “məbəd” ab-havasında qurulan restoranlarda səslənən musiqi də bu səviyyəyə uyğun olmalıdır:

“Belə məkanlarda sənət əsərləri, xalq mahnıları, aşıq havaları, caz musiqisi və keyfiyyətli estrada üstünlük təşkil etməlidir. Ola bilər ki, bu, ilk mərhələdə dinləyicilərə tam xoş gəlməsin, lakin zamanla onlar buna alışacaq və hətta təşəkkür edəcəklər”.

Elza Seyidcahanın fikrincə, süni intellektin sürətli inkişafı da bu sahədə müəyyən xaos yaradıb:

“Bu gün hər yerdə, hətta radio dalğalarında belə, süni zəka ilə hazırlanmış musiqilərin səsləndirildiyini görürük. Bəstəkar əsərlərinin dəyişdirilərək təqdim olunması isə musiqimizi uçuruma aparan ciddi problemdir”.

Bəstəkar vurğulayır ki, qeyri-peşəkarlığı təşviq edən halların qarşısını almaq üçün konkret tədbirlər görülməlidir:

“Yollarda ən xırda qayda pozuntusuna görə sürücülər cərimələnir. Bəs niyə eyni yanaşma incəsənət sahəsində tətbiq olunmur? Niyə bu sahədəki hərc-mərclik məsuliyyət doğurmur?

Yollarda təhlükənin qarşısını almaq üçün qaydalar sərtləşdirilir, amma cəmiyyətin zövqünə daha dərin təsir edən, “trend” adı ilə yayılan bayağı musiqilərə qarşı heç bir mexanizm yoxdur. Halbuki bu sahədə də cərimələr tətbiq olunsa, müəyyən nizam-intizam yarana bilər.

Ümid edək ki, aidiyyəti qurumlar bu uçurumun qarşısını almaq üçün yaxın zamanda konkret addımlar atacaqlar”, – deyə Seyidcahan fikrini yekunlaşdırıb.