Avqustun 8-də Ağ Evdə Azərbaycan, ABŞ və Ermənistan liderlərinin gözlənilən görüşü çərçivəsində sülh sazişinə dair sənəd imzalanacaq.
Teleqraf xəbər verir ki, bu barədə “Joqovurd” qəzeti mənbələrə istinadla məlumat yayıb.
Nəşr xatırladır ki, həftəsonu Vaşinqtonda Azərbaycan Prezidenti İlham Əliyev, Ermənistan Baş naziri Nikol Paşinyan və ABŞ Prezidenti Donald Tramp arasında görüş planlaşdırılır:
“ABŞ mediası və analitiklərinin məlumatına görə, tərəflər Ermənistan və Azərbaycan arasında sülhün bərqərar olmasına yönəlmiş anlaşma memorandumu imzalamağa hazırlaşır. Görüşdən əvvəl komandası ilə görüşən Nikol Paşinyan bildirib ki, indiki mərhələdə heç bir ilkin şərt olmadan sülhə hazırdır. Baş nazir vurğulayıb ki, Vaşinqtonda keçiriləcək görüş çərçivəsində müəyyən bir sənəd imzalanacaq.
Mənbələrə görə, ABŞ Sünik probleminin (Zəngəzur dəhlizi məsələsinin) həlli üçün müəyyən nəzarət elementlərini nəzərdə tutan həll təklif edib”.
Xatırladaq ki, bir neçə gün əvvəl ABŞ-nin Türkiyədəki səfiri Tomas Barak Vaşinqtonun yolu 100 illik icarəyə götürmək və özəl şirkət vasitəsilə idarə etmək istədiyini açıqlamışdı.
