Ermənistan Zəngəzur dəhlizində Azərbaycan yüklərinə maneəsiz yol verilməsi imkanlarını öyrənir. Bu barədə Ermənistan parlamentinin hakim Mülkü Müqavilə fraksiyasının katibi Artur Ovannisyan danışıb. Onun sözlərinə görə, hazırda Ermənistanın müəyyən orqanlarının köməyi ilə icra ediləcək texniki imkanlar müzakirə edilir. Ovanisyan həmçinin qeyd edib ki, ölkə ərazisindən müvafiq orqanların bilmədiyi yük daşına bilməz. Xatırladaq ki, bundan öncə Ermənistan parlamentinin spikeri Alen Simonyan yolların açılması ilə bağlı bütün məsələlərə dair, o cümlədən yük və sərnişinlərin yoxlanılması rejimi ilə bağlı Azərbaycana təkliflər verildiyini və müzakirə etməyə hazır olduqlarını bildirib. Parlament sədri qeyd edib ki, bütün qərarlar qarşılıqlılıq prinsipinə əsaslanmalıdır.

Ermənistan parlamentinin deputatı Geqam Manukyan deyib ki, Azərbaycana Ermənistan ərazisindən yüklərin yoxlama olmadan daşınmasına imkan yaradılacağı istisna deyil. Siyasətçi bildirib ki, bugünlərdə Ermənistan Baş naziri Nikol Paşinyan bəyan elədi ki, (yolların açılması ilə bağlı) Azərbaycana təklif veriblər: "Hakimiyyətin fikrincə, Azərbaycan bundan imtina etməz. Bu, nə deməkdir? İki gün əvvəl də Ermənistan parlamentinin sədri Alen Simonyan açılacaq yollardan yüklərin fasiləsiz daşınmasından danışıb. Nə barədə danışdıqlarını təsəvvür etmək mümkündür. İstisna edilmir ki, Ermənistan hökuməti Azərbaycana ölkəmizin ərazisindən yüklərin yoxlama olmadan daşınmasını təklif edib”. Manukyan Azərbaycanın əsas hissəsi ilə Naxçıvan Muxtar Respublikası arasında maneəsiz keçidin təmin edilməsi üçün İrəvanın Bakıya şifahi razılıq verdiyini istisna etmir.

Millət vəkili Soltan Məmmədov deyib ki, Zəngəzur dəhlizinin açılması 2020-ci ildə Azərbaycan, Rusiya və Ermənistan arasında imzalanmış üçtərəfli bəyanatın müddəalarından biridir. Deputatın sözlərinə görə, Ermənistan tərəfi bu sənəddə üzərinə götürdüyü öhdəlikləri yerinə yetirməyə borcludur:

"Ermənistan hakimiyyəti daha əvvəl də üçtərəfli bəyanatda əksini tapmış bəzi öhdəliklərinə məsuliyyətsiz yanaşıb və nəticədə daha çətin vəziyyətlə qarşılaşıb. Ermənistan tərəfinin dörd ildən çoxdur məsələyə qeyri-konstruktiv mövqe sərgiləməsi və 10 noyabr kapitulyasiyasından sonra üzərinə götürdüyü öhdəlikləri yerinə yetirməməsi bu ölkənin reallıqları düzgün qiymətləndirə bilmədiyini göstərir. Azərbaycan dəfələrlə bəyan edib ki, heç bir ölkəyə qarşı ərazi iddiası yoxdur. Lakin hər bir ölkə imza atdığı sənədin məsuliyyətini anlamalıdır. Qırx dörd günlük müharibədən sonra regionda tamamilə fərqli reallıqlar yaranıb. Sülh üçün unikal imkanlar mövcuddur. Azərbaycanın məqsədi bu imkanları reallığa çevirməkdir".

Parlament üzvü vurğulayıb ki, Zəngəzur dəhlizinin açılması Cənubi Qafqazda yeni iqtisadi imkanlar yarada bilər:

"Bu dəhlizin fəaliyyət göstərməsi nəticə etibarilə Ermənistanın iqtisadiyyatına da ciddi dəstək verəcək. Eyni zamanda, uzun illər region xalqlarını narahat edən mübahisəli məsələlərin gündəlikdən çıxmasına səbəb olar. Təcrübə göstərir ki, iqtisadi maraqlar əsasında qurulan münasibətlər daha davamlı və etibarlı olur. Ermənistan bölgədə ənənəvi destruktiv rolundan imtina etməlidir".