Senator Qrehemin təşəbbüsü ilə Rusiyaya qarşı yeni sanksiyalar hazırlanıb, məğzi də budur ki, Rusiyadan neft-qaz, neft məhsulları və digər təbii sərvətlər alan ölkələrə 500%-lik tarif tətbiq edilməlidir. Çox vahiməli səslənsə də, içiboş, mənasız və yerinə yetirilməsi mümkünsüz olan məsələdir.
Axar.az xəbər verir ki. bu sözləri iqtisadçı ekspert Natiq Cəfərli qeyd edib.
O bildirib ki, Rusiyadan ən çox qaz alan ölkə Avropada Fransadır, neft-qaz alan ölkələr sırasında Macarıstan, Slovakiya, İtaliya, hətta Almaniya və s. dövlətlər var:
“ABŞ onlara 500% tarif tətbiq edəcək?! Və ya, ən çox neft alan ölkə Hindistandır, onlara 500%-lik tarif necə tətbiq olunacaq?! Bəs Çin – indi Vaşinqtonla Pekin Londonda görüşür, tarif anlaşması olacaq, o zaman Çinə 500%-lik tarif necə tətbiq edilə bilər axı?! Əgər belə bir qanun qəbul edilsə, o zaman ABŞ özü-özünə də sanksiya qəbul etməlidir – ABŞ urana olan tələbatının, az qala, yarısını Rusiyadan alır. Absurddur, deyilmi?! Amma insanlar dərin analiz edə bilmir, qəhrəman Ukrayna xalqında illuziyalar yaranır ki, bu sanksiyalarla Rusiyanı çökdürmək mümkün olacaq”.
