ABŞ prezidenti Donald Tramp milyarder İlon Maskı Demokratlar Partiyasını maliyyələşdirəcəyi təqdirdə “çox ciddi nəticələrlə” qarşılaşacağı barədə xəbərdar edib. “NBC News”a müsahibəsində Tramp Maskı prezidentlik institutuna hörmətsizlikdə ittiham edib və onların şəxsi münasibətlərinin artıq başa çatdığını bildirib.
Tramp deyib ki, əgər Mask Demokratlara dəstək versə, bu, onun şirkətlərinin, xüsusilə də “SpaceX”in hökumət müqavilələrindən kənarlaşdırılması üçün əsas ola bilər. O, həmçinin federal büdcənin ən böyük qənaətinin Mask üçün nəzərdə tutulan subsidiyaların ləğvi olacağını vurğulayıb və Baydenin bunu etmədiyinə təəccüb etdiyini qeyd edib.
Qeyd edək ki, Mask bu yaxınlarda Respublikaçıların təqdim etdiyi büdcə qanun layihəsini sərt şəkildə tənqid edib və “X” platformasında Trampın impiçmentinə çağırış edən paylaşım edib (sonradan silinib). ABŞ-ın vitse-prezidenti Cey Di Vens isə Maskın bu addımını “nüvə zərbəsi” adlandıraraq, onun artıq Trampın siyasi düşərgəsinə qayıda bilməyəcəyini bildirib. Tramp və Mask arasında gərginlik mayın 5-də açıq qalmaqalla nəticələnib. Tramp Maskdan “məyus olduğunu” bildirərək onu “dəli” adlandırıb. Mask isə cavabında bu ifadəni “açıq yalan” və “kədərlidir” kimi dəyərləndirib. Mübahisənin fonunda İlon Mask yeni siyasi partiya yaratmaq niyyətini də açıqlayıb.
Siyasi şərhçi Azər Həsrət Sherg.az-a bildirib ki, Amerika Birləşmiş Ştatlarında qeyri-sabitliyin olması heç də dünyanın, o cümlədən bizim xeyrimizə deyil:
“Çünki bu dövlət həqiqətən də dünyanın hər tərəfində, xüsusilə də münaqişə bölgələrində əsas söz sahibidir. Təəssüflər olsun ki, Donald Trump prezidentliyə başladıqdan sonra ABŞ bu roldan faktiki olaraq imtina etməyə başlayıb. Rusiyanın Ukraynaya təcavüzü qarşısında ABŞ təslimçi mövqe nümayiş etdirir. Bu fonda İlon Mask ilə Donald Trump arasında yaranan münaqişə ABŞ-ni daxildən ciddi şəkildə sarsıda bilər. Artıq İlon Mask özünün siyasi partiyasını qurmaq təşəbbüsünü elan edib. Sorğular da göstərir ki, əgər o bu partiyanı yaratsa, cəmiyyətin ciddi dəstəyini qazana bilər. Yəni ABŞ vətəndaşları İlon Maskı siyasi lider kimi qəbul etməyə hazır görünürlər. Bu isə ölkə daxilində dərin təlatümlərə səbəb olacaq. Eyni zamanda, İlon Maskın dünyaya təsir imkanlarını da nəzərə alsaq, belə bir vəziyyətin yaxşı nəticələrə gətirib çıxarmayacağını demək mümkündür. Faktiki olaraq, texnologiya şirkətləri vasitəsilə dünyanın hər yerində təsir imkanlarına sahib olan, kosmosdan belə Yer kürəsinin böyük bir hissəsinin idarə olunmasına təsir gücü olan bir şəxsin ABŞ kimi qlobal gücün prezidenti ilə münaqişəyə girməsi yalnız həmin ölkənin deyil, digər dövlətlərin və xalqların da taleyinə təsir edə bilər. Biz arzu edərdik ki, bu gərginlik dərinləşməsin. Əslində İlon Mask əvvəlki fəaliyyəti ilə, yəni texnologiya və innovasiya sahəsində gördüyü işlərlə məşğul olsa, bu həm ABŞ, həm də dünya üçün daha faydalı olar. Əgər o, siyasətə, özü də iddia etdiyi kimi, sürətlə daxil olmağa qərar verərsə, artıq dünya ciddi təlatümlərə hazır olmalıdır”.
