Rusiya Ukrayna ilə ətraflı sülh danışıqları aparmaqda maraqlı deyil, müharibəni uzatmaq və ya genişləndirmək üçün çalışır.

Teleqraf xəbər verir ki, bu barədə Müharibə Araşdırmaları İnstitutunun (ISW) hesabatında deyilir.

Analitiklər vurğulayırlar ki, Rusiyaya qarşı iqtisadi təzyiqlərin artırılması əsasən siyasi siqnaldır və bu, Rusiya Prezidenti Vladimir Putini danışıqlar masasına gətirməyə kifayət etməyəcək. Onların fikrincə, yalnız Qərbin Ukraynaya davamlı hərbi dəstəyi Putini öz “qələbə vizyonunu” yenidən gözdən keçirməyə məcbur edə bilər.

ISW-nin hesabatına görə, Putin hesab edir ki, Rusiya ordusu döyüş meydanında tədricən uğurlar əldə etməyə davam edə biləcək, Ukrayna qüvvələri isə müdafiədə davam gətirə bilməyəcək və Qərb Ukraynaya dəstəyi dayandıracaq. Buna görə də o, ABŞ və Ukrayna ilə sülh danışıqlarında iştirak etməyi planlaşdırmır.

Hesabatda vurğulanır ki, Ukraynada sülhün əldə olunması üçün Rusiyanın davamlı itkilər verməsi və ya əhəmiyyətli geri çəkilməsi zəruridir. Çünki məhz itkilər Rusiyanın ordusunun, işçi qüvvəsinin və iqtisadiyyatının zəifləməsinin əsas amilidir.

“Xüsusilə ABŞ tərəfindən böyük həcmdə və sürətlə təmin edilən silah sistemləri vasitəsilə Qərbin yardımı Ukrayna qüvvələrinin mövqelərini daha yaxşı qorumasına, Rusiya irəliləməsinin yavaşlamasına və Rusiya hərbçilərinə daha ağır zərbələr vurulmasına imkan yaradır. Rusiya üçün itkilərin yüksək və qeyri-stabil formada olması Putinin daxildən dəstək saxlamaq səylərini ciddi təhlükə altına qoyur”, – ISW hesabatında qeyd olunub.