ABŞ Prezidenti Donald Trampın Qlobal Media Agentliyində (USAGM) iş yerlərinin ixtisar edilməsi haqqında sərəncam imzaladıqdan sonra “Amerikanın Səsi”nin 1300-dən çox əməkdaşı qeyri-müəyyən müddətə məzuniyyətə göndərilib. USAGM beş böyük Amerika media korporasiyasına nəzarət edirdi ki, bunların içərisində “Amerikanın Səsi”, “Azadlıq” Radiosu da var.

"83 ildə ilk dəfə olaraq əfsanəvi “Amerikanın Səsi” susdu", - deyə media qurumunun direktoru Maykl Abramoviç bildirib. Onun sözlərinə görə, media qurumunun rəhbərliyi islahatlar aparıb və müəyyən irəliləyişlər əldə edib: “Lakin ABŞ-ın yeni administrasiyasının hərəkətləri o deməkdir ki, Amerikanın İran, Çin və Rusiya kimi düşmənlərinin ABŞ-ı gözdən salmaq üçün yalan xəbərlər yaratmaq üçün milyardlarla dollar xərclədiyi bir şəraitdə “Amerikanın Səsi” öz həyati missiyasını daha yerinə yetirə bilməyəcək”.

Abramoviç əlavə edib ki, radiostansiyaya nəzarət edən agentlik “müəyyən formada sağ qalsa” belə, insident “Amerikanın Səsi”nin “diktatura altında yaşayanlara” “obyektiv və balanslı xəbərlər” çatdırmaqla “təhlükəsiz və azad dünya yaratmağa” kömək etmək qabiliyyətinə ciddi ziyan vuracaq.

Beynəlxalq jurnalist təşkilatları, o cümlədən Sərhədsiz Reportyorlar “Amerikanın Səsi”nin müdafiəsinə qalxıblar. Onlar vurğulayırlar ki, Trampın qərarı “dünyada mətbuat azadlığını təhdid edir və Amerikanın sərbəst informasiya axınını dəstəkləmək üçün 80 illik səylərini puça çıxarır”.

Bir gün əvvəl ABŞ Prezidenti 270 milyon dollarlıq büdcəsi olan yeddi federal qurumun, o cümlədən USAGM-nin “qeyri-qanuni komponentlərinin və funksiyalarının mümkün qədər aradan qaldırılmasını” əmr edib.

“Azadlıq” radiosunun rəhbəri və baş direktoru Stiven Kapus da vəziyyəti şərh edib. Bildirib ki, “iranlı ayətullahlar, Çin kommunist liderləri və Moskva ilə Minskdəki avtokratlar 75 il sonra “Azadlıq” radiosunun süqutunu bayram kimi” qeyd edəcəklər: "Rəqiblərimizə qələbə qazandırmaq onları daha da gücləndirəcək, Amerikanı isə zəiflədəcək".

Ağ Ev “Amerikanın Səsi” ilə bağlı bir sıra iddialar irəli sürüb, o cümlədən radiostansiyanı jurnalist standartlarını pozmaqda və daim məsuliyyətdən yayınmaqda ittiham edib. Adminstrasiyadan qeyd edilib ki, 2020-ci ilin oktyabrında nəşr ABŞ-ın keçmiş Prezidenti Co Baydenin oğlu Hunter Baydenin noutbuku ilə bağlı qalmaqalda Rusiyanın mümkün rolu barədə məlumat yayıb. Tramp administrasiyası bunu “həqiqəti gizlətmək” cəhdi kimi qiymətləndirib. Ağ Ev həmçinin qeyd edib ki, “Amerikanın Səsi” rəhbərliyi işçilərindən “rəsmi bəyanatlara istinad edənlər istisna olmaqla” HƏMAS terrorçusu adlandırmamağı xahiş edib. Bundan əlavə, “Amerikanın Səsi”nin müxbirlərinin qərəzsizlik siyasətinə baxmayaraq, “X” sosial şəbəkəsindəki peşəkar hesablarında Tramp əleyhinə şərhlər dərc etmələri ABŞ-ın yeni hakimiyyət orqanlarının xoşuna gəlməyib. Prezidentin qərarını şərh edən Ağ Evdən bildirilib ki, amerikalı vergi ödəyiciləri artıq “radikal təbliğat çəngində olmayacaqlar”.

Tramp ikinci dəfə hakimiyyətə gəldikdən dərhal sonra iş adamı, “SpaceX”ın qurucusu və “X”ın sahibi İlon Maskın rəhbərlik etdiyi Hökumətin Səmərəliliyi Departamentini (DOGE) yaradıb. Agentlik müxtəlif federal agentliklərdən on minlərlə əməkdaşın işdən çıxarılmasını nəzərdə tutan ABŞ hökumətində islahatlara başlayıb. Digər məsələlərlə yanaşı, Mask “Amerikanın Səsi” və “Azadlıq” radiosunu ləğv etməyi təklif edib. Onun iddiasına görə, bu media qurumlarına "artıq heç kim qulaq asmır". İş adamı radiostansiyaları “öz-özünə danışan çılğın solçu radikallarla” və “Amerika vergi ödəyicilərinin cibindən ildə bir milyard dollar oğurlayanlar”la müqayisə edib.

Ayna.az