“Rusiya Federasiyası Ermənistandan gətirilən 70 mindən çox içməli su şüşəsi və qazlı içkilərin satışını dayandırıb. Rəsmi şərhə görə, istehsalçı göstərilən məhsullarla bağlı tələb olunan öhdəlikləri pozub. Ona görə də “Rusiya vətəndaşlarının həyatına və sağlamlığına mümkün zərərin qarşısını almaq” üçün məhsullar mağaza rəflərindən yığışdırılmalı olub”.

“Cebheinfo.az” xəbər verir ki, “Kommersant” nəşri belə yazıb.

“Beləliklə, 2026-cı ilin avqust ayının əvvəlindən etibarən Ermənistan Respublikasından demək olar ki, bütün əsas kənd təsərrüfatı və ərzaq məhsullarının ixracı qadağan edilib.

Səbəb yuxarıda qeyd edildiyi kimi, fitosanitar və digər oxşar standartların pozulmasıdır. Eyni zamanda, bu yaxınlarda, 2 avqust 2026-cı ildə Prezident Vaahn Xaçatryan respublika qanunvericiliyinə uyğun olaraq Nikol Paşinyanın ölkənin Baş naziri vəzifəsinə yenidən təyin edilməsi barədə fərman imzalayıb. Beləliklə, baş verənləri təntənəli tarixə özünəməxsus hədiyyə saymaq olar.

Bundan əvvəl hökumət başçısı Rusiyanın daha çox ultimatuma bənzəyən tələblərini yerinə yetirmək və Avropa ilə Avrasiya İqtisadi İttifaqı arasında seçim etmək niyyətində olmadığını açıq şəkildə bildirmişdi. Üstəlik, köhnə - yeni baş nazir təşkilatın qaydalarına istinad edərək sonuncunu tərk etməkdən imtina edib.

Sənəddə qeyd edilir ki, onun razılığı olmadan heç kim iştirakçını inteqrasiyadan kənarlaşdıra bilməz. Buna baxmayaraq, Nikol Paşinyan Ermənistan dəmir yolunun icarəsi üçün Rusiyadan ildə 2 milyard dollar tələb edə biləcəyini açıqlayıb. Rusiya Dəmir Yolları da qəzəblənib”, - deyə “Kommersant” nəşri qeyd edir.

Rusiyanın iqtisadi təzyiqlərinin artması Ermənistanın 2026-cı ilə dair ümumi daxili məhsulunun həcmində və növbəti ilin büdcə göstəricilərində öz təsirini göstərə bilər.

Artıq Ermənistandan kənd təsərrüfatı və ərzaq məhsullarının idxalı tamamilə dayanıb. Ermənistan Mərkəzi Bankının sədr müavini Ovannes Xaçatryan bildirib ki, Rusiyaya ixracın azalacağı və ya dayandırılacağı təqdirdə, ölkə iqtisadiyyatı üçün ciddi problemlər yaranacağını deyib.

Onun sözlərinə görə, Ermənistan iqtisadiyyatının ÜDM-in təxminən 1,5-2 faizinə bərabər olan hissəsi risk altına düşəcək. Söhbət təchizat azalarsa, digər bazarlara yönləndirilərsə və ya daha aşağı qiymətlərlə satılarsa, iqtisadiyytaın həssas ola biləcək hissəsindən gedir.

Risk kateqoriyasına çiçək, mineral sular, bəzi spirtli içki növləri, tərəvəz, meyvə, giləmeyvə, üzüm, kartof, quru meyvə, süd məhsulları diri balıq və balıq məhsulları aiddir.

Qeyd edilən siyahıya nəzər saldıqda, həmin məhsulları Azərbaycanın da istehsal və ixrac etdiyini görmək olar. Yəni Ermənistan məshullarının Rusiya bazarından sıxışdırılması Azərbaycan üçün əlverişli satış imkanı yarada bilər.

Üstəlik, Ermənistanla müqayisədə Azərbaycanın iqlim şəraitinin daha əlverişli olması məhsulların keyfiyyətinə müsbət təsir göstərməklə yanaşı, Rusiya bazarında ona tələbatı da artırır.

Moskvanın Ermənistana tətbiq etdiyi iqtisadi qadağalar artan xətt üzrə getdiyindən Azərbaycan üzərindən göndərilən tranzit məhsullarının da dayandırılacağı istisna olunmur.

Söhbət benzin, gübrə, taxıl, ərzaq buğdasından gedir. Bu da öz növbəsində, Ermənistanda daxili siyasi vəziyyətin gərginləşdirilməsinə hesablanıb.

“Güclü Ermənistan” partiyasının sədri Samvel Karapetyanın “Məhdudiyyətlər əhalini yoxsullaşdırır. Yoxsul əhalini isə idarə etmək asandır. Mən baş nazir olsam belə olmazdı” - deməsi Rusiyanın təzyiqlərinin revanşist müxalifətinin əlinin gücləndirilməsinə xidmət etdiyini göstərir.

Rusiyanın Azərbaycanla münasaibətlərdə belə siyasi problemləri olmadığından ticarət əməliyyatlarına mane olacaq səbəb də yoxdur.

Ona görə də Azərbaycan Rusiya üçün Ermənistanla müqayisədə alternativ tədarükçü kimi çıxış edə bilər.