Prezident İlham Əliyev indiki Baş Prokuror Kamran Əliyevi vəzifəyə təyin edərkən onunla videokonfrans formatında görüşmüş və üzünü Baş Prokurora tutaraq əslində bütün hüquq mühafizə orqanlarına çox önəmli tapşırıqlar vermişdi.
“Burada sizin üzərinizə böyük vəzifə düşür və ümid edirəm ki, siz bu vəzifənin öhdəsindən gələcəksiniz. İlk növbədə, qanunun aliliyi tam təmin edilməlidir və ədalətli cəmiyyətin qurulması üçün qanunun aliliyi başlıca şərtdir. Əfsuslar olsun ki, biz istədiyimizə hələ də tam nail olmamışıq, o cümlədən hüquq mühafizə orqanları tərəfindən qəbul edilmiş qərarlar bəzi hallarda qanunlara ziddir, sosial ədaləti pozur, insanları haqlı olaraq narazı salır və beləliklə ümumi işimizə böyük ziyan vurur. Bunun səbəblərindən biri qeyri-peşəkarlıq ola bilər, ancaq bəzi hallarda bunun arxasında hansısa maraqlar, şəxsi təmənna dayanır. Bu gün bütün hüquq mühafizə orqanlarının əməkdaşları və rəhbərləri məni eşidirlər. Mənim sözlərim onlar üçün əsas göstəriş olmalıdır ki, Azərbaycanda hüquq mühafizə sistemində islahatlar dərinləşsin və qanunun aliliyi təmin edilsin”.
Prezidentin hüquq mühafizə orqanları üçün əsl manifestə çevrilə biləcək bu nitqinin üzərindən 1 ildən artıq zaman keçir. Gözləmək olardı ki, bu müddət ərzində Azərbaycanın hüquq mühafizə orqanları özlərinə çəki-düzən verəcək və ölkə başçısının da dediyi kimi, ölkəmizdə sosial narazılığın bir nömrəli mənbəyini qurutmağa çalışacaq. Təəssüf ki, redaksiyamıza ünvanlanan şikayət ərizələri bu ümidi doğrultmur.
Şikayətçi İlqar Məmmədovun məktubundan belə anlaşılır ki, Azərbaycanda hüquqi özbaşınalıq təkcə məhkəmə orqanlarının ədalətsiz qərarları ilə məhdudlaşmır. Hətta bu ağır sınaqdan uğurla çıxan vətəndaşlarımız belə, öz hüquqlarını əldə edə bilmirlər. Azərbaycan dövləti adından qərar çıxaran, hakimiyyətin əsas qanadlarından biri olan məhkəmə hökmləri hansısa rayonun İcra və probasiya şöbəsi tərəfindən yerinə yetirilmir.
Şikayətçinin yazdığına görə, 5 il əvvəl Mehdiyev Əli Adil oğlu maşın satmaq adıyla onu aldadıb 12 min ABŞ dollarını mənimsəyib. Bir müddətdən sonra aldadıldığını anlayan İlqar Məmmədov Nizami rayon məhkəməsinə müraciət edir. Məhkəmə şikayəti əsaslı hesab edib İlqar Məmmədovun xeyrinə hökm çıxarır. Hökmdən narazı qalan qarşı tərəf Apellyasiya məhkəməsinə üz tutur. Apellyasiya məhkəməsi də ilk instansiya məhkəməsinin hökmünü qüvvədə saxlayır. Beləcə, çəkişmə Ali Məhkəməyə qədər gedib çıxır. Bütün istansiya məhkəmələrinin hökmü eyni olur və əsl problem də bundan sonra başlayır.
Gəlin, Azərbaycanda məhkəmə hökmlərinin necə icra olunmasının hekayəsini şikayətçinin dilindən eşidək.
“Bu məhkəmə qərarını Nizami İcra şöbəsi qəsdən icra eləmir və böyük ehtimalla qarşı tərəfdən “hörmət” görüb (İddia şikayətçiyə aiddir və Ovqat.com-un mövqeyini əks etdirmir – Red.) ki, 3 ildir işi qərəzli şəkildə uzadıb oyun çıxardır. Açıq-aydın borcluya şərait yaradır ki, borcu ödəməsin.
Əlimdə fakt və sübutlar var: yerli, Apelyasiya və Ali məhkəməyə qədər hamısı birmənalı olaraq mənim xeyrimə qərar verib və 3 ilə yaxındır Nizami İcra şöbəsi bu məhkəmə qərarını icra eləməmək üçün əlindən gələn bütün tədbirləri görür ki, qarşı tərəf yayınsın. Hara şikayət yazıramsa, xeyri yoxdur. İcra Baş İdarəsinin rəisinin belə şəxsən qəbula düşüb görüşmüşəm, hamı söz verir ki, “nəzarətə götürəcəyəm”, amma 3 ildir borclu şəxs əlini, qolunu sallayıb gəzir, 20 min manatdan heç nə ödəmir, heç məhkəmə qərarını da tanımır. Arxayındı yəni.
Bu günə qədər Ombudsmana qədər şikayət yazmışam ki, Nizami rayon İcra və probasiya şöbəsi məhkəmə qərarını qəsdən yerinə yetirmir və bunu üçün əlindən gələn bütün tədbirləri görür. Yazılan bütün şikayət məktubları təzədən bunların üstünə göndərilir, bunlar da bütün məktubları standart cümlələrlə bağlayırlar: “İcra işi ilə bağlı tədbirlərimizi görürük”, vəssəlam. 3 ildir bu sözlərlə yola verirlər işi. Borclu şəxs də əlini qolunu sallaya - sallaya, hətta xaricə gedib gəlir. Görünür, onu arxayın salıblar ki, məhkəmə qərarını icra eləməyib, onun istədiyi yerə qədər uzadacaqlar. Evi - adresi, iş yeri və bütün məlumatları bilinən şəxs keçən il evlərindən birini 70 minə satdı, icra şöbəsinə bunu deyirəm, elə standart bəhanə gətirirlər ki, “narahat olma, həll ədəcəyik”. Bunlara qalsa 50 il də uzadarlar bir qərarın icrasını”.
Şikayətçi məsələ ilə bağlı Azərbaycan Respublikası Ədliyyə Nazirliyi Təşkilat Nəzarət İdarəsinə də yazılı müraciət edib. Müraciətdə bildirilir:
“...İcra haqqında Qanunun 12.1 maddəsinə görə �?icra məmuru icra sənədini aldığı gündən iki ay müddətində bütün zəruri icra hərəkətlərini həyata keçirməlidir’. Lakin Nizami rayonu İcra və probasiya şöbəsi “borclunun ölkədən gətmək hüququnun müvəqqəti məhdudlaşdırılması” ilə bağlı təqdimatı 12.04.2021 tarixində, yəni 3 il sonra mənim israrlı tələbimlə vermişdir. Həmçinin “birgə nigah sorğusu” da 3 il sonra, yenə mənim tələbimlə 12.04.2021 tarixində verilmişdir.
Bu da borclunun borcu ödəməsindən yayınmasına şərait yaratmışdır və İcra və probasiya şöbəsinin təqdimatında da qeyd olunduğu kimi bu müddət ərzində borclu Məhdiyəv Əli Adil oğlu müxtəlif vaxtlarda dəfələrlə rəspublika sərhəddini tərk etmişdir. Borclu şəxs ümumiyyətlə məhkəmə qərarını tanımır, açıq şəkildə deyir ki, borcu ödəmək fikri yoxdur, ödəməyəcək. O, xaricə gedib geri qayıtmasaydı, bunun məsuliyyəti kimdə olacaqdı?
Həmçinin iki dəfə yazılı olaraq xahiş etmişəm ki, bu işlə bağlı icra məmuru Gültac Sadıqova xanım səhlənkarlıq etdiyi və tez-tez məzuniyyətə çıxıb işdə olmaması səbəbiylə başqa bir icra məmuru ilə əvəz edilsin. Lakin yazılı müraciətlərimə İcra və probasiya şöbəsinin rəisi Rəşad Hacıyev müəllim 23.01.2020 cil il tarixli, 17/71-K 48 nömrəli və 29.06.2020 tarixli 17/71-K 1573 nömrəli məktublarla cavab yazaraq bu xahişimi rədd etmişdir. Halbuki icra məmurunun dəyişdirilməsini və işinə məsuliyyətlə yanaşan başqa bir icra məmuru ilə əvəz olunmasını xahiş etmək tələbkar tərəf olaraq mənim hüququmdur, Rəşad müəllim isə bu xahişimi qərəzli şəkildə rədd edir”.
İlqar Məmmədov Ədliyyə Nazirliyinə müraciətində onu vurğulayır ki, icraçı Gültac xanım qəsdən işi icra etmir və ona işlə bağlı doğru məlumatlar vermir.
Şikayətçinin iddiasına görə, Nizami rayon İcra və probasiya şöbəsi borcludan “borcu yaxın vaxtda ödəyəcəyinə dair” bir iltizam alıb ona göstərməklə gözə kül üfləyir: “Sonra da mənə deyirlər ki, cavabdeh bizi aldadıb qaçdı və öz yazdığı iltizamı da qəbul etmir, faktiki yaşayış yerini də bilmirik, təkrar axtarışa vərəcəyik, tədbirlər görəcəyik. Bütün bunlar icra işinin uzadılmasına və cavabdehin məsuliyyətdən yayınmasına xidmət edən tədbirlərdir və icra şöbəsi 3 ildir eyni bəhanələrlə guya tədbir görürmiş kimi işin icrasını qəsdən uzadır.
Məhkəmə qərarları dövlət adından çıxardılır və icrası vacibdir. İcra şöbəsinin Məhkəmə qərarına bu cür məsuliyyətsiz yanaşması və aşkar qərəz nümayiş etdirərək işi illərlə uzatması məni vətəndaş olaraq çox məyus edir”.
Qeyd edək ki, Ovqat.com olaraq, biz Nizamı rayonu İcra və probasiya şöbəsinin rəisi Rəşad Hacıyevlə telefonla danışıb iddialara cavab almaq istədik. Rəşad müəllim işlə bağlı mətbuata hər hansı açıqlama vermək səlahiyyətinin olmadığını bildirdi və bizə Ədliyyə Nazirliyinin Mətbuat şöbəsinə müraciət etməyi məsləhət gördü. Nazirliyin şikayətlə bağlı mövqeyini işıqlandırmağa hazırıq.
Ovqat.com
