Ötən həftə Dövlət Təhlükəsizliyi Xidməti (DTX) Xarici İşlər Nazirliyində əməliyyat keçirib. Əməliyyatın təfərrüatları yalnız dünən açıqlanıb. DTX-nın açıqlamasına əsasən, “XİN-in bəzi vəzifəli şəxsləri öz səlahiyyətlərindən qəsdən qulluq mənafeyinə zidd olaraq istifadə edib, dövlətin qanunla qorunan mənafelərinə mühüm zərər vuran çoxsaylı qanunazidd əməllərə yol veriblər”.
Bəyanatın davamında bildirilir ki, “nazirliyin ayrı-ayrı strukturlarının fəaliyyətinin təmin edilməsi üçün nəzərdə tutulan dövlət vəsaitlərinin ələ keçirilməsi, müxtəlif fəaliyyət istiqamətləri üzrə, eləcə də xarici ölkə vətəndaşlarının viza müraciətləri ilə bağlı rüşvət alınması və s. hüquqazidd əməllərin törədilməsi ilə bağlı əldə edilmiş məlumatlar araşdırılmış, XİN-in İşlər İdarəsinin müdiri, Nazirliyin Tender Komissiyasının sədri Fərhad Molla-zadə, İşlər İarəsinin Təsərrüfat şöbəsinin müdiri Səlim Əlizadə və Konsulluq İdarəsinin konsulluq-hüquq şöbəsinin rəisi Nurupaşa Abdullayev tərəfindən çoxsaylı qanunsuz əməllərə yol vermələrinə əsaslı şübhələr müəyyənləşib”.
Qeyd edək ki, DTX-nın əməliyyatından əvvəl “Facebook” və KİV-də Xarici işlər naziri Elmar Məmmədyarovun oğlunun ABŞ-da 4.2 milyon dollara mülk alması barədə ifşaedici məqalə peyda olub. Nazir Məmmədyarov DTX-ya müraciət edərək özü və övladları haqqında media və sosial şəbəkələrdə səslənən fikirlərə görə təqsirkarların cəzalandırılmasını istəyib.
Müraciəti mətbuatda yayan nazirliyin mətbuat xidməti idarəsinin rəisi Leyla Abdullayeva deyib ki, Xarici İşlər Nazirliyinin rəsmi nümayəndəsi olaraq, şəxsi məsələləri şərh etmir və bu barədə əvvəl də münasibətini sərgiləyib: “Lakin son günlərdə Xarici İşlər Nazirliyinə qarşı bilərəkdən yalan və böhtan kampaniyasının aparıldığını müşahidə edirik. Bu qarayaxma kampaniyasının araşdırılması və müvafiq tədbirlərin görülməsi məqsədilə tərəfimizdən Dövlət Təhlükəsizliyi Xidmətinə rəsmi müraciət edilib".
Leyla Abdullayeva deyib ki, vətəndaşın şərəf və ləyaqəti Konstitusiya və digər qanunvericilik aktları ilə qorunur. Heç bir halda ifadə azadlığı vətəndaşın şərəf və ləyaqətini ləkələmək hüququ vermir. Şəxsi həyata müdaxilə edərək təhqir və böhtan xarakterli məlumatları yayanlar məsuliyyətə cəlb olunmalıdırlar.
“Xarici İşlər Nazirliyinin həyata keçirdiyi vəzifələr strateji əhəmiyyətlidir və bilərəkdən bu mühüm dövlət orqanı barədə yalan və qərəzli məlumatların dövriyyəyə buraxılması dövlətin milli maraqlarını ciddi təhdid etməklə yanaşı, müstəqil respublikamızın beynəlxalq nüfuzuna da xələl gətirir. Bu səbəblərdən qarayaxma kampaniyasının araşdırılmasını və Azərbaycan qanunvericiliynə uyğun olaraq müvafiq tədbirlərin görülməsini zəruri hesab edirik", – deyə Leyla Abdullayeva fikirlərini yekunlaşdırıb.
XİN rəhbəri haqqıda ifşaedici yazılar və nazirlikdə keçirilən DTX əməliyyatından sonra əksər şərhçilər Elmar Məmmədyarovun “kitabının bağlanması”nın labüdlüyünü dilə gətirir. 2 aprel 2004-cü ildən Xarici işlər naziri vəzifəsini icra edən Məmmədyarovun yerini tuta biləcək şəxslərin qeyri-rəsmi siyahısında bir neçə ad var.
Reyting.az öz mənbələrinə istinadla xəbər verir ki, siyahıdakı ilk sıralarda üçlüyü təqdim edir. Namizədlər siyahısında, birinci pillədə duran şəxs Prezident Administrasiyasının xarici əlaqələr şöbəsinin rəhbəri Hikmət Hacıyevdir.
Hikmət Hacıyev 1979-cu ildə Gəncə şəhərində anadan olub və BDU-nun beynəlxalq münasibətlər və beynəlxalq hüquq fakültəsinin bakalavr və magistr pillərini bitirib. NATO-nun Müdafiə Kolleci, Təhlükəsizlik məsələlərinin tədqiqi üzrə Corc Marşal Mərkəzi və Belçikanın ULB universitetinin magistr pilləsinin məzunudur.
Hikmət Hacıyev 2000-ci ildən Azərbaycan Xarici İşlər Nazirliyi sistemində, o cümlədən müxtəlif illərdə Azərbaycanın NATO nümayəndəliyində, Azərbaycanın Küveytdəki səfirliyində çalışıb. 2008-ci ildən isə Hikmət Hacıyev Xarici İşlər Nazirliyində təhlükəsizlik problemləri departamentinin 2-ci katibi vəzifəsini, 2011-ci ildən isə Azərbaycanın Misirdəki səfirliyində müşavir vəzifəsini tutub. 2013-cü ilin avqustunda Azərbaycan Respublikasının Misirdəki səfirliyinin müşaviri kimi uzunmüddətli xarici xidməti ezamiyyətini başa vuraraq, Xarici İşlər Nazirliyinə dönüb. 2014-cü ildən 2018-ci ilə qədər XİN-in mətbuat xidmətinin rəhbəri vəzifəsini icra edib.
O, 18 sentyabr 2018-ci ildən Prezident Administrasiyasının xarici əlaqələr şöbəsinin rəhbərinin müavini vəzifəsini icra edib, 26 noyabr 2018-ci ildə isə bu şöbənin rəhbəri vəzifəsinə təyin olunub.
XİN rəhbəri vəzifəsinə ikinci namizəd Azərbaycan Respublikasının ABŞ-dakı səfiri Elin Süleymanovdur. Süleymanov 1970-ci ildə Bakıda anadan olub. O, BDU və Moskva Dövlət Universitetinin məzunudur. 1992-ci Ohayoda (ABŞ), Toledo Universitetinin dövlət idarəetməsi fakültəsinin magistatura pilləsinə daxil olub və 1994-cü ildə oranı bitirib. Elin Süleymanov, həmçinin Massaçusets ştatında yerləşən Fletçer Hüquq və Diplomatiya Məktəbinin beynəxalq təhlükəsizlik və beynəlxalq hüquq ixtisasında təhsil alıb.
Diplomatik xidmət orqanlarında fəaliyyətə başlamazdan əvvəl o, Birləşmiş Millətlər Təşkilatının Qaçqınlar üzrə Ali Komissarlığı və 1995 1997-ci illər ərzində Praqada, Açıq Media Araşdırma İnstitutunda çalışıb.
Xarici İşlər Nazirliyində diplomatik fəaliyyətə qəbul edildikdən sonra Azərbaycanın ABŞ səfirliyində mətbuatla əlaqələr attaşesi təyin edilib. Daha sonra Prezident Administrasiyası xarici əlaqələr şöbəsində baş məsləhətçi vəzifəsində çalışıb.
Elin Süleymanov 14 noyabr 2005-ci ildə fövqəladə və səlahiyyətli elçi diplomatik rütbəsiylə Azərbaycan Respublikasının Los-Ancelesdə yeni açılan Baş Konsulluğuna ilk baş konsulu təyin edilib və 2011-ci ilə qədər bu vəzifəni tutub. 26 oktyabr 2011-ci ildə Azərbaycan Respublikasının Amerika Birləşmiş Ştatlarında fövqəladə və səlahiyyətli səfiri təyin olunub.
XİN rəhbərliyinə üçüncü namizəd energetika naziri Pərviz Şahbazovdur. O, 1969-cu il noyabrın 24-də Bakı şəhərində anadan olub. 1986-1992-ci illərdə Azərbaycan Dövlət Neft Akademiyasını bitirib. 1991-ci ildən diplomatik xidmətə qəbul olunub. 1991-1992-ci illərdə Xarici İşlər Nazirliyinin beynəlxalq iqtisadi münasibətlər şöbəsində, 1992-1996-ci illərdə Azərbaycanın Almaniyadakı səfirliyində çalışıb. 1996-1997-ci illərdə Xarici İşlər Nazirliyində ikinci katib, 1997-1998-ci illərdə birinci katib, habelə 1998-2001-ci illərdə Xarici İşlər Nazirliyində bir sıra digər vəzifələrdə işləyib.
O, 1998-2001-ci illərdə Azərbaycan Respublikasının Avstriyadakı səfirliyində müşavir, 2005-ci ildə ATƏT-in Təhlükəsizlik Əməkdaşlıq Forumunun sədri olub. 2005-ci ilin avqust ayından 2016-cı ilin sentyabrına qədər Azərbaycanın Almaniyadakı fövqaladə və səlahiyyətli səfiri vəzifəsini tutub.
Pərviz Şahbazov 12 oktyabr 2017-ci ildə Azərbaycan Respublikasının energetika naziri təyin edilib.
