Gədəbəy rayonunda yaşananları eşitdikcə o halda bilib başa düşürük ki, icra başçısı Ramiz Yediyarovun və maliyyə idarəsinin “şefi” Namiq Məmmədovun “girov”luqda saxladıqları bu rayonun, hələ də dərdi uzun, yaraları isə sağalmazdır. Buna səbəb, təqribən dörd il bundan əvvəl bu rayona rəhbər təyin edilən Ramiz Yediyarovun, şəxsi maraqlarının həlli naminə tətbiq etdiyi idarəçiliyin varlığıdır. Sosial problemlərin tüğyan etdiyi, haqsızlığın baş alıb getdiyi, həddi-hüdudu bilinməyən qanunsuzluqların meydan suladığı Gədəbəy rayonunda, bu gün sözün həqiqi mənasında qanun şah deyil, şah qanundur yanaşması mütləqi hakimdir. Əgər bu belə olmasaydı, o halda vəzifəsinin icraasına başladığı vaxtdan az sonra, çoxsaylı sahibkarlara qənim kəsilən Ramiz Yediyarov, gədəbəyliləri dilənçi adlandırmaqdan ehtiyat edərdi. Amma, o, o halları nəzərə almayıb ki, Gədəbəy rayonu yaxın tariximizdə qəhrəmanlıq göstərən, ermənilərdən torpaq alan, saf əqidəli, sağlam düşüncəli övladları ilə xüsusi ad-san çıxaran rayonlardan biridir. Odur ki, heç bir məhkəmə qərarı, hər hansı əsaslandırıcı sənəd olmadan sahibkara məxsus obyekti viran etdirən Ramiz Yediyarov, probleminin həllini tələb edən sahibkara “bu dilənçilərin əlindən zinhara gəlmişəm” deməsi, bu gün də hər kəsi düşündürməkdədir. Çünki, dilənçi adı nə Gədəbəyə, nə də ki, bütöv gədəbəylilərə şamil oluna bilməz. Buna səbəb odur ki, hələ sovet dönəmində də Gədəbəy rayonu ərazisində bir nəfər olsun belə dilənçi olmayıb. Digər tərəfdən, gədəbəylilər həmişə əməli addımları ilə şan-şöhrətli ad qazanıblar, belə bir ada layiq görülüblər. Bu gün Gədəbəyin çoxsaylı sosial problemlərinin varlığı müzakirə olunarkən, Əliyev Oqtay Qara oğlunun üz-üzə qaldığı problem də, diqqəti cəlb edən problemlərdən biri hesab olunur. Belə ki, o, “Gündəm Xəbər”in əməkdaşı ilə söhbətində bildirir ki, “mən 16 mart 2011-ci il tarixdə “Rabitə Bank” ASC-dən 50 min manat kreditə pul götürmüşdüm. Həmin vaxt 14 saylı Ərazi Vergilər İdarəsinin rəisi olan Ramiz Yediyarov, bir sahibkar olaraq məni qanunsuz cərimə etdirdi. Fantastik məbləğdə cərimə olunduğumdan, bank faizlərini ödəyə bilmədim və son anda “Rabitə Bank” məni məhkəməyə verməyə məcbur oldu. İlk olaraq işə Binəqədi rayon Məhkəməsində 26 fevral 2013-cü il tarixdə baxılsa da, son anda ekspertin vermiş olduğu rəy əsas götürüldü və məhkəmə qətnaməsində mağazamın 50 min manata dəyərləndirilməsi, eyni zamanda hərraca çıxarılması barədə məhkəmə hokmü də elan olundu. Çıxarılmış qətnamədən narazı qalan bank tərəfi, Bakı Apelliyasiya Məhkəməsinə apelliyasiya şikayəti versə də, 14 avqust 2014-cü il tarixdə keçirilən məhkəmə prosesində (iş в„– 2(103)-3900/2014) Binəqədi rayon Məhkəməsinin qərarı qüvvədə saxlanıldı. Belə bir addımdan sonra çıxarılmış məhkəmə qərarı icra şöbəsinə, icra şöbəsindən isə “Əmlak İxtisaslaşdırılmış Hərrac Mərkəzi” MMC-ə rəsmi məktub ünvanlanır. Çox keçmir ki, “Əmlak İxtisaslaşdırılmış Hərrac Mərkəzi” MMC-dən ünvanıma bildiriş göndərdilər ki, “hərrac 27 fevral 2015-ci il tarixdə Bakı şəhəri M.Müşfiq küçəsi-2A ünvanında keçiriləcək". Elə ki, hərracın keçirildiyi gündən bir-iki gün keçdi, mən alıcı müştəri ilə Gədəbəy rayonuna getdim. O zaman gördüm ki, “Rabitə Bank”a girovluğa qoyduğum mağazam tarmar edilib. Yəni, heç bir məhkəmə qərarı, hər hansı əsaslandırıcı sənəd olmadan, hətta adicə mənə xəbərdarlıq edilmədən belə darmadağın edilib. Belə olan halda bank tərəfinin şikayəti əsasında çıxarılmış qətnaməni icra etmək mümkün olmadı. Çünki, yuxarıda qeyd etdiyim kimi mağazamın 12 mart 2015-ci il tarixdə Gədəbəy rayon İcra Hakimiyyətinin başçısı Ramiz Yediyarovun vermiş olduğu şifahi tapşırıq əsasında, Şahbaz Bayramovun isə rəhbərliyi altında qeyri-qanuni yolla darmadağın edilməsi oldu. Hərracın keçirilməsi baş tutmadığından, bank tərəfi Bakı Apelliyasiya Məhkəməsinin qərarından da Ali Məhkəməyə müraciət etdi. Bu zaman əsas iddia tələbi ikinci girovluğa qoyduğum mənzil oldu. 31 may 2016-cı il tarixdə (iş в„– 2 (102)-3206/2016) Ali Məhkəmədə ikinci girovluqda olan mənzillə bağlı işə baxılarkən, Bakı Apelliyasiya Məhkəməsinin çıxarmış olduğu qərar yenidən qüvvədə saxlandı. Bu günədək bir neçə məhkəmə instansiyasını keçsəm də, məhkəmənin təyin etdiyi ekspert rəyi əsasında mağazam 50 min manata qiymətləndirilsə də, hələ də Gədəbəy rayon İcra Hakimiyyətinin rəsmi şəxsləri, o cümlədən icra başçısı Ramiz Yediyarov nə məhkəmə qərarına məhəl qoyur, nə də ki, üz-üzə qaldığım problemin həllini həyata keçirir. Faciəli hal odur ki, mənə vurulmuş maddi ziyana görə ödəməli olduqları kompensasiyanı ödəmək barədə, bir kəlmə olsun belə söz demirlər, ünvanladığım məktublara, müraciətlərə ümumiyyətlə cavab vermirlər. Adicə bir halı da vurğulamaq istəyirəm ki, 11 iyul 2016-cı il tarixdə qəbula düşməklə bağlı ayrı-ayrı dövlət qurumlarına teleqrammalar vursam da, həmin qurumlardan cavablar alsam da, hələ də Gədəbəy rayon İcra Hakimiyyətindən səs-soraq yoxdur. Bu da onu söyləməyə əsas verir ki, Gədəbəydə qanun şah deyil, şah qanundur. Hal-hazırda ailəlikcə Bakı şəhərində yaşasam da, yenə də haqqımı tələb edirəm, mübarizəmi davam etdirirəm. Çünki, mübarizəmi aparmağa, haqqımı tələb etməyə mənim də haqqım çatır. Ramiz Yediyarovun atdığı addım, bu gün məni bankla üz-üzə qoyub. İndi öz-özümə sual edirəm ki, səbəb nədir ki, vaxtilə 21 nəfər haqqımıza qovuşmaq uğrunda mübarizə aparırdıq, bu gün meydanda cəmi 3 nəfər qalmışıq. Yəni, 18 nəfər narazı qalan şəxslərin problemləri həllini tapır, amma biz 3 nəfərin problemləri isə, hələ də problem olaraq qalmaqdadır. Diqqəti cəlb edən başqa bir məqam da var ki, vaxtilə 14 saylı Ərazi Vergilər İdarəsində Ramiz Yediyarovla çiyin- çiyinə çalışan, bu gün isə Bakı Vergilər Departamentində vəzifə sahibi olan şəxs (etika naminə hələlik adını çəkmirəm) məni şantaj etmək yolunu tutub. Çünki adını çəkmədiyim həmin şəxs, mənimlə bağlı 17-ci polis bölməsinə şikayət etdiyini bildirir ki, guya vaxtilə mən ondan borca pul almışam və bu gün də həmin pulu qaytarmaqdan imtina edirəm. Yaxın günlərdə həmin şəxsin əməlləri ilə bağlı açıqlamalarla çıxış edəcəyəm”. Araşdırmamız davam edəcək.
Akif Quliyev GundemXeber.az
