Şuşaya səfər edən bəzi turistlərin şəhərdə və şəhər ətrafında qayaların üzərinə adlarını və müxtəlif yazıları həkk etməsi ciddi narazılıq yaradıb. Bundan sonra yazıların silinməsi ilə bağlı aidiyyəti qurumlar tərəfindən tədbirlər görülüb. Silinən adlar arasında şəhid Xudayar Yusifzadənin adı da olub. Bəzi jurnalistlər iddia ediblər ki, şəhidin anası buna etiraz edir.
“Bakupost” məsələ ilə bağlı Radə Yusifzadə ilə əlaqə saxlayıb.
Şəhid anası bildirib ki, onun etirazı Xudayarın adının silinməsi ilə bağlı olmayıb:
“Mən etiraz etməmişəm ki, niyə silinib. Mənim etirazım bu olub ki, o ərazidə milyonlarla ad yazılıb. Niyə məhz Xudayar və Turqutun adını prim toplamaq üçün paylaşıblar? Mənim etirazım bu olub. Gəlin, sizə göstərim, orada o qədər sözlər var -“Ayşə" , "Gülşən, səni sevirəm", "filankəs"...Bir də o adı mən yazdırmamışam. Onu 2021-ci ildə hansısa hərbçilər yazıblar. Mən heç tanımıram ki, o hərbçilər kimdir.
Mən sabah Şuşa Qoruğunun rəhbəri Səmayə xanımı məhkəməyə verəcəyəm. Eyni zamanda bəzi jurnalistləri də. Samir adlı jurnalist yazıb ki, Xudayarın adına Abşeron rayonunda küçə verilib. And olsun Allaha, mən o küçəni heç görməmişəm, xəbərim yoxdur. Bunu haradan çıxarırlar? Bir şəhid anası da mənə ağlaya-ağlaya yazıb ki, Radə xanım, mənim şəklimi qoyub sizin haqqınızda yazıblar. Çox maraqlıdır, heç Xudayarın anasını tanımırlar, başqa adamın şəklini qoyub mənim haqqımda yazıblar.
Allah cənab Ali Baş Komandanımıza can sağlığı versin. Onun sayəsində bu torpaqlarımızı alıblar. Cənab Ali Baş Komandan şəhidlərimizin adının əbədiləşdirilməsini hər tərəfdən bəyan edib. Xudayarın oxuduğu məktəbdə büstü qoyulub. Xankəndidə Zəfər muzeyində onun adına pilləkən qoyulub. Bu gözəllikləri yaradan cənab Prezidentdir. Mən niyə hansısa qayanın üstündə silinən ada etiraz edim? Mənim sadəcə etirazım budur ki, niyə orada yüzlərlə ad yazılıb, amma Xudayarın və Turqutun adını prim toplamaq üçün paylaşaraq şou yaradırlar?
Bəzi saytlar paylaşım edərək məni təhqir etdirdilər. Şəhid anası kimi onların hamısına minnətdaram. Beləcə erməni qanlı şəxslərin hansı saytlarda olduğu üzə çıxdı: şəhid anasını təhqir etdilər, bunların xoşuna gəldi.
O qayalığa gələn erməni qanlılar başqa ehtiyaclarını ödəyirlər. Mənə lazımdır orada oğlumun adı? Mənim oğlumun adı tarixə yazılıb. Daşdan silmək olar, tarixdən əsla".
