Ermənistanda seçkilər yaxınlaşdıqca və regionda sülhə doğru real addımlar atıldıqca, bu prosesi pozmaq istəyən qüvvələr açıq şəkildə aktivləşib. Bu baxımdan Azərbaycan Milli Məclisinin Avropa Parlamenti və Avronest Parlament Assambleyası ilə əməkdaşlığı dayandırması sadəcə diplomatik addım deyil.

Bunu Teleqraf-a Milli Məclisin deputatı Azər Badamov deyib.

O qeyd edib ki, bu, açıq şəkildə qərəzə, ikili standartlara və siyasi sifarişlərə verilən sərt və prinsipial cavabdır: “İllərlə Azərbaycana qarşı kampaniya aparan, reallıqları təhrif edən bu qurumlar artıq özlərini obyektiv platforma kimi təqdim etmək imkanını itiriblər. Daha da ciddi məqam ondan ibarətdir ki, Azərbaycanın daxili işlərinə kənardan müdaxilə cəhdləri beynəlxalq hüququn kobud və açıq şəkildə tapdanmasıdır. Dövlət suverenliyi prinsipi Birləşmiş Millətlər Təşkilatı sisteminin təməl sütunlarından biridir və bu prinsipin pozulması heç bir halda qəbul edilə bilməz. Buna baxmayaraq, bəzi beynəlxalq dairələr açıq şəkildə bu normaları heçə sayaraq siyasi manipulyasiya alətinə çevriliblər.

Son illərdə Avropa Parlamenti ətrafında "partlayan" korrupsiya qalmaqalları bu qurumun nə dərəcədə təsir altına düşdüyünü açıq şəkildə ortaya qoyur. Rüşvət, lobbiçilik və gizli maliyyə axınları artıq təsadüfi hallar deyil. Bu, sistemli problemdir və bu Azərbaycana qarşı qərəzli qərarların qəbulunda da özünü göstərir”.

Deputat hesab edir ki, Beynəlxalq Cinayət Məhkəməsinin keçmiş prokuroru Luis Moreno Okamponun və onun ətrafının Azərbaycan əleyhinə kampaniyanı müzakirə edərkən faktiki olaraq özlərini ifşa etdikləri video yazılardan ibarət silsilə materiallar onların necə bir bataqlığa düçar olduğunun bariz nümunəsidir:

“Bu çirkli mexanizmin tərkib hissəsi kimi Okampo və onun oğlu Tomas Okamponun adı da ön plana çıxır. Onların erməni lobbi dairələri ilə əlaqələri, bu dairələrdən maliyyə aldıqları barədə iddialar və müxtəlif korrupsiya ittihamlarının gündəmə gəlməsi təsadüfi deyil. Bu, konkret sifarişlərin icrasıdır. Xüsusilə, son günlərdə yayılan və bu şəxslərlə əlaqələndirilən videogörüntülər artıq vəziyyətin nə qədər dərin və təhlükəli olduğunu göstərir. Bu görüntülər sadəcə bir qalmaqal deyil, həm də beynəlxalq institutların necə manipulyasiya etdiyinin açıq sübutudur. Bu cür faktlar bir daha göstərdi ki, söhbət təkcə fərdlərdən deyil, bütöv bir korrupsiyalaşmış şəbəkədən gedir”.

Azər Badamov bildirib ki, Josef Borrell kimi fiqurların Azərbaycana qarşı davamlı qərəzli mövqeyi isə artıq təsadüf kimi qiymətləndirilə bilməz: “Bu, sistemli yanaşmadır və məqsəd Azərbaycanı təzyiq altında saxlamaq və regionda balansı pozmaqdan ibarətdir.

Bütün bunlar fonunda aydın görünür ki, erməni lobbi şəbəkələri və onlarla əlaqəli beynəlxalq dairələr maliyyə, media və siyasi alətlərdən istifadə edərək Cənubi Qafqazda sülh prosesini sabotaj etməyə çalışırlar. Bu isə təkcə Azərbaycana deyil, bütövlükdə regionun sabitliyinə qarşı yönəlmiş açıq təhdiddir.

Azərbaycan isə bu təzyiqlərə baxmayaraq, öz prinsipial mövqeyindən geri çəkilməyəcək. Suverenliyinə qarşı yönələn hər hansı müdaxiləyə qarşı sərt və adekvat cavab vermək hüququnu özündə saxlayır və bunu açıq şəkildə nümayiş etdirir”.