Ermənistanın paytaxtı İrəvan şəhərində 8-ci Avropa Siyasi Birliyi Zirvə Görüşü keçirilir.

Modern.az xəbər verir ki, sammitdə İrakli Kobaxidzenin rəhbərlik etdiyi Gürcüstan nümayəndə heyəti də iştirak edəcək.

Ümumilikdə tədbirdə dövlət və hökumət başçıları, beynəlxalq təşkilatlar daxil olmaqla 50-yə yaxın nümayəndə heyətinin iştirakı gözlənilir.

Azərbaycan üçün diqqətçəkən məqam sammit çərçivəsində keçiriləcək panel müzakirələrlə bağlıdır. Belə ki, “Cənubi Qafqaz dönüş nöqtəsində: sülh və əməkdaşlıq perspektivləri” adlı paneldə Azərbaycandan Topçubaşov Mərkəzinin direktoru Rusif Hüseynov, Türkiyənin Ermənistanla münasibətlərin normallaşdırılması üzrə xüsusi nümayəndəsi Serdar Kılıç, Ermənistan parlamentinin vitse-spikeri Ruben Rubinyan, Avropa Birliyinin Cənubi Qafqaz üzrə xüsusi nümayəndəsi Maqdalena Qrono, Gürcüstan xarici işlər nazirinin müavini Laşa Darsaliya vəs. şəxslər iştirak edəcəklər.

Mayın 6-da isə “Yaxın Şərqdə geosiyasi qarışıqlıq: qlobal nəticələr və ikinci dərəcəli təsirlər” mövzusunda panel müzakirəsi keçiriləcək. Müzakirələrdə İran və Hörmüz boğazı ətrafındakı vəziyyətin regional və qlobal təsirləri diqqət mərkəzində olacaq.

Qeyd edək ki, Avropa Siyasi Birliyi 2022-ci ildə Emmanuel Makronun təşəbbüsü ilə yaradılıb. Platformanın əsas məqsədi Avropa ölkələri arasında siyasi dialoqu və təhlükəsizlik sahəsində əməkdaşlığı gücləndirməkdir. Birliyə 27 Aİ üzvü ilə yanaşı Böyük Britaniya və daha 19 Aİ-yə daxil olmayan dövlət daxildir.