Ermənistanda sentyabrın 4-də keçirilmiş mətbuat konfransında törətmiş olduqları cinayətlərə görə məhkum olunmuş erməni əsilli şəxslər Azərbaycanda dini mənsubiyyətinə görə ayrı-seçkiliyə məruz qaldıqları, onların üzərində işgəncə törədilməsi, xristian dini simvollarının məhv edilməsi, "İncil"dən istifadəyə imkan verilməməsi və "Quran" oxumağa məcbur edilməsi barədə əsassız iddialar səsləndirilib.

Qeyd edək ki, qərəzli iddialar erməni hüquq müdafiəçisi Siranuş Saakyan tərəfindən İrəvanda keçirilən mətbuat konfranslarında, eləcə də erməni mediasına və beynəlxalq təşkilatlara təqdim etdiyi hesabatlarda səsləndirilib.

Maraqlıdı, Ermənistan hüquq müdafiəçisinin səsləndirdiyi bu iddialar sülh danışıqlarının pozulmasına yönəlib?

Məsələ ilə bağlı millət vəkili Elman Nəsirli "Cebheinfo.az"-a bildirib ki, Azərbaycan-Ermənistan danışıqları dinamik tempə malikdir və sülh müqaviləsinin imzalanmasını şərtləndirən çox ciddi amillər var:

"Vaşinqtonda sülh müqaviləsi paraflanıb. Hər ikin dövlət və xalq arasında etimad mühitinin formalaşması istiqamətində ciddi işlər görülməkdədir. Vətəndaş cəmiyyəti institutları arasında birbaşa təmaslar mövcuddur.

Azərbaycandan keçməklə Ermənistana yüklərin çatdırılmasında olan məhdudiyyətlər tamamilə aradan qaldırılıb. Rusiyadan, Qazaxıstandan və digər ölkələrdən gələn məhsullar Azərbaycandan keçməklə Ermənistana çatdırılır.

Azərbaycanla Ermənistan arasında ticarət əlaqələri artıq yaranmaqdadır. Ölkəmizin neft və neft məhsullarının Ermənistana satışı həyata keçirilir. Eyni zamanda da məlum olub ki, Ermənistandan Azərbaycana ixrac ediləcək məhsulların siyahısı müəyyən edilib və bu istiqamətdə müvafiq hüquqi addımlar formalaşıb.

Yaxın zamanda Ermənistandan Azərbaycana xüsusilə kənd təsərrüfatı məhsullarının ixracı gözlənilir. Bütün bunlar onu göstərir ki, artıq atılan addımlar etimad mühitinin daha da möhkəmləndirilməsi mənafeyinə xidmət edir.

Belə olan halda Ermənistanda referendum keçirildikdən və yeni konstitusiya qəbul edildikdən və həmin konstitusiyada Azərbaycana qarşı ərazi iddiaları tamamilə sonra sülh müqaviləsinin imzalanması labüd ola bilər. Bu prosesin 2027-ci ildə məntiqi sonluğa çatacağı ilə bağlı fikirlər mövcuddur".

Onun sözlərinə görə, ancaq Ermənistanda müəyyən siyasi dairələr, müxalif, radikal düşərgənin təmsilçiləri müxtəlif üsullardan istifadə edirlər ki, həmin prosesə arxadan zərbə endirsinlər:

"Bu məqsədlə müxtəlif üsullardan, vasitələrdən istifadə edirlər ki, həmin üsullardan biri də Azərbaycanda törətdikləri konkret cinayət əməllərinə görə, məhkum olunmuş erməni əsilli şəxslərdir.

Azərbaycanda məhkumluq həyatı yaşamış həmin erməni əsilli şəxslərdən istifadə edirlər ki, bu mövqeyi cəmiyyətə sırıyın. Bu o mövqedir ki, guya Azərbaycanda dini ayrı-seçkiliyə məruz qalıblar, məhkumların üzərində işgəncələr törədilib, xristian dini simaların məhv edilməsi prosesi gedir.

Söyləyin ki, "İncil"dən istifadə etməyə imkan vermirlər, ancaq “Quran”ı oxumağa məcbur edirlər kimi iddialar irəli sürürlər. Təbiətən cinayətkar olan, Azərbaycan xalqına qarşı çox ağır cinayətlərə imza atmış bu şəxslər də həmin tapşırıqları yerinə yetirirlər.

Məqsəd bu iddialar əsasında sülh danışıqlarının pozulmasına nail olmaqdır. Hesab edirəm ki, onlar üçün qatar artıq gedib. Sülh prosesində çox güclü, əsaslı addımlar atılıb və geridönməz bir prosesdir.

Ermənistan siyasi rəhbərliyi yaxşı bilir ki, Ermənistanın nicatı sülhdən, Azərbaycan və Türkiyə ilə münasibətlərdən, eləcə də iqtisadi ticarət əlaqələrinin qurulmasından keçir. Həmçinin bu şəxslər Ermənistanda faktiki olaraq “Dağlıq Qarabağ klanı”nın əlində alət olmuş şəxslərdir.

Həmin klanın da bu gün zərərsizləşdirilməsi prosesi dinamik hal alıb. Ermənistanın keçmiş prezidentləri Köçəryan və Sarkisyan həmin qəbildəndir və hər ikisinə qarşı cinayət işi açılıb. Onlar son güllələrini atırlar. Son güllə kimi də erməni əsilli cinayətkarlardan istifadə edirlər".