Ermənistanın növbəti geosiyasi dönüşə hazırlaşdığı ilə bağlı iddialar gündəmə gəlib.

KONKRET.az xəbər verir ki, bu barədə yayılan təhlillərdə bildirilir ki, Avropa Komissiyasının Prezidenti Ursula fon der Leyenin regiona səfəri fonunda Ermənistanın Baş naziri Nikol Paşinyan Rusiyanın Baş naziri Mixail Mişustinlə telefon danışığı aparıb.

Məlumata görə, söhbət Ermənistan tərəfinin təşəbbüsü ilə baş tutub.

İddialara əsasən, tərəflər son dövrlər gərginləşən Rusiya-Ermənistan münasibətlərini müzakirə ediblər. Danışıqların məzmunu açıqlanmasa da, bəzi müşahidəçilər bunu Paşinyanın Avropa İttifaqı ilə mühüm təmaslar öncəsi Moskvanın mövqeyini öyrənmək cəhdi kimi qiymətləndirirlər.

Bununla yanaşı, Ermənistan xarici işlər nazirinin müavini Mnasakan Safaryan parlamentdə çıxışı zamanı bildirib ki, ölkə hazırda Avrasiya İqtisadi İttifaqının (Aİİ) üzvüdür və ölkə ərazisində bu qurumun tranzit qaydaları qüvvədədir.

Onun sözlərinə görə, həmin qaydalar TRIPP layihəsinə də şamil olunur. Safaryan layihənin detalları barədə əlavə məlumat verməyərək, onun Ermənistan və ABŞ tərəfindən həyata keçirildiyini qeyd edib.

Xatırladaq ki, bundan əvvəl Rusiyanın xarici işlər nazirinin müavini Mixail Qaluzin də TRIPP layihəsinin Aİİ qaydalarına uyğun tənzimlənməsinin vacibliyini və layihənin icrası zamanı Rusiyanın maraqlarının nəzərə alınmalı olduğunu bildirmişdi.

Təhlildə vurğulanır ki, TRIPP layihəsinin Aİİ-nin gömrük qaydalarına tabe edilməsi mübahisəli məsələdir. Bildirilir ki, söhbət yalnız Ermənistan ərazisindən keçən dəmir yolundan deyil, Azərbaycanın əsas hissəsi ilə Naxçıvanı birləşdirəcək beynəlxalq nəqliyyat marşrutundan gedir və buna görə də fərqli hüquqi mexanizmlər tətbiq olunmalıdır.

Məqalədə həmçinin 2013-cü ildə Ermənistanın keçmiş prezidenti Serj Sərkisyanın Avropa İttifaqı ilə Assosiasiya Sazişi imzalamaq planından imtina edərək Aİİ-yə qoşulması xatırladılır.