Uşaqpulu tənqidi ilə gündəmə gələn naxçıvanlı jurnalist Elnurə Cəfərova bu dəfə də NDU-ya görə töhmət alıb.

O, dövlət orqanı sayılan “Şərq Qapısı” qəzetinin əməldaşıdır.

NDU-nu yeni bitirən jurnalist Facebook profilində universitetdə təşkil olunan məzun gününü sərt tənqid edib.

O, paylaşımında tədbirin təşkilatçılığını “tam məsuliyyətsizlik nümunəsi” adlandırıb, könüllülərin düzgün məlumatlandırılmadığını və koordinasiya çatışmazlığı səbəbindən məzunların səhnəyə aidiyyəti olmayan ixtisaslarla birlikdə çıxarıldığını bildirib.

Cəfərova həmçinin mühafizəçilərin tələbələrə qarşı kobud və aqressiv davrandığını yazıb. Onun sözlərinə görə, məzun günündə əsas diqqət məzunlara verilməli olduğu halda, “7-dən 70-ə hər kəs səhnədə, hər kəs mərkəzdə idi”, məzunlar isə öz günlərini kənardan izləməyə məcbur qalıblar.

Redaksiyadan verilən məlumata görə, həmin statusdan dərhal sonra baş redaktor Rəmzi Tahirli jurnalisti yanına çağırıb və həmkarlarının yanında onunla təhqiramiz tonda danışıb.

Mənbənin sözlərinə görə, baş redaktor jurnalisti otağında da danlayıb, ona yenidən şiddətli töhmət verib və son xəbərdarlıq edib:

“Dedi ki, statusu silməsən, işdən qovulacaqsan. Bundan sonra statusu sildirdi. Baş redaktorun bu hərəkəti təkcə Elnurəyə qarşı deyil, həm də redaksiyada çalışan digər əməkdaşlarda qorxu yaratmaq məqsədi daşıyır. Bu, bizim ifadə azadlığımızın kobud şəkildə pozulmasıdır”.

Qeyd edək ki, Elnurə Cəfərovanın bundan əvvəl də sosial şəbəkədə tənqidi paylaşımına görə cəzalandırıldığı bildirilirdi. O, Günay Ağamalıyevanın uşaqpulu ilə bağlı fikirlərini tənqid etdikdən sonra baş redaktor Rəmzi Tahirli tərəfindən statusu silməyə məcbur edildiyi və şiddətli töhmət aldığı iddia olunurdu.

Redaksiya əməkdaşlarının sözlərinə görə, həmin hadisədən sonra qəzetdə çalışanlara tənqidi fikir paylaşacaqları halda işdən çıxarılacaqları barədə xəbərdarlıq edilib.

"Gündəlik Naxçıvan"