“İstəyir ki, danışsın, nəsə desin, hərf deyir, amma sözləri qura bilmir”.

Bu sözləri Bizim.Media-ya açıqlamasında avtomobil qəzası zamanı aldığı kəllə-beyin travması nəticəsində 6 ildir ki, koma vəziyyətində olan hüquq müdafiəçisi Oqtay Gülalıyevin həyat yoldaşı Firuzə Gülalıyeva deyib.

“Məni eşidir, görür. Hərdən deyirəm ki, Oqtay, məni eşdirsənsə, gözünü yum. Yumur. Deyirəm bir də yum, bir də yumur. İstəyir ki, danışsın, nəsə desin, hərf deyir, amma sözləri qura bilmir. Mən iş görəndə, yanında hərəkət edəndə gözü ilə məni izləyir, başını çevirib baxır. Adını səsləyəndə həmin istiqamət üzrə çönüb mənə baxır.

Hər iki saatdan bir çevirib yerini dəyişirik ki, bədəni yara olmasın. Bu ayın 29-da Oqtay bəyin düşdüyü qəzadan da 6 il ötür. O vaxt desəydilər ki, 6 il yataq vəziyyətində yaşayacaq, inanmazdım. Bu ilin iyununda 51 yaşı oldu. Allahdan ümidimizi üzmürük. İnanıram ki, daha da yaxşılaşacaq”.

F.Gülalıyeva yoldaşının vəziyyətinin düzəlməsi üçün Səhiyyə Nazirliyi tərəfindən dəstək olunmadığını deyib:

“Hazırkı vəziyyətdə ona loqoped lazımdır. Bir xanım var idi. Amma yolu uzaq olduğu üçün artıq gəlmir. Biz Oqtay bəyin xəstəxanada yox, ev şəraitində müalicə olunmasını istəyirik. Nə qədər xəstəxanada qalaq? O da ki bununla bağlı bir iş görən yoxdur, dəstək yoxdur. Ev şəraitində müalicəsi üçün bir loqoped və psixoloqa ehtiyacımız var. Loqopedin bir seansı isə 60 manatdır. Açığı buna da gücümüz çatmadı. Tibb bacıları isə gündəlik olaraq gəlirlər”.

Qeyd edək ki, O. Gülalıyevi 2019-cu ilin oktyabrın 29-da yolu keçən zaman avtomobil vurub. Ona ilkin tibbi yardım göstərildikdən sonra 30 oktyabrda Bakıda əməliyyat olunub. Noyabrın 1-də isə Neyrocərrahiyə Xəstəxanasının Reanimasiya şöbəsinə köçürülüb. Noyabrın 6-da Heydər Əliyev Fondunun yardımı ilə Türkiyəyə aparılıb və "Avrasiya" xəstəxanasına yerləşdirilib. Burada müalicə aldıqdan sonra İstanbulda yerləşən “Amerikan Xəstəxanası”na köçürülüb. Orada da bir neçə əməliyyat olunduqdan sonra Azərbaycana gətirilib. O, hazırda ev şəraitində müalicə alır.