Rusiyalı deputatlar ölkə məktəblərində bir sinifdə bir nəfərdən artıq miqrant uşağın təhsil almasının qadağan olunmasını təklif ediblər.

Bu barədə Rusiya təhsil naziri Sergey Kravtsova ünvanlanan müraciətdə qeyd olunub. Müraciətdə nazirdən təklifin məqsədəuyğunluğunu qiymətləndirməsi və dəstəklədiyi halda Təhsil Nazirliyinin müvafiq departamentlərinə qanunvericiliyə dəyişiklik layihəsinin hazırlanması tapşırığının verilməsi xahiş olunub. Xatırladaq ki, Dövlət Dumasına Rusiyada miqrant uşaqların məktəblərdə pulsuz təhsil almasının qadağan edilməsini və yalnız ödənişli əsaslarla təhsil imkanının tətbiqini nəzərdə tutan qanun layihəsi təqdim edilib.

Bu gün digər ölkə vətəndaşları ilə yanaşı, Rusiyada yaşayan kifayət qədər azərbaycanlılar var. Onların övladları da Rusiyada fəaliyyət göstərən məktəblərdə təhsil alırlar. Hər sinifdə bir miqrant uşağının təhsil alması, eləcə də həmin uşaqlara ödənişli əsaslarla təhsilin tətbiqi orada yaşayan azərbaycanlı uşaqların təhsildən yayınmasına gətirib çıxaracaqmı?

Məsələ ilə bağlı təhsil üzrə ekspert Məzahir Məmmədli “Cebheinfo.az”-a bildirib ki, son günlər Rusiya Dövlət Dumasının atdığı addımlar digər müttəfiqliyə adekvat deyil:

“Yəni həm təhsil sistemi, həm miqrantlarla bağlı problemlər yaşayırlar. O ki qalda birbaşa təhsillə bağlı, Azərbaycanda 340 rus bölməsi olan məktəb var. Onlardan 17-si sırf rus dilində tədris verən məktəblərdir. Məsələ orasındadır ki, bu günə qədər Rusiya dövlətinin heç bir qayğısı olmadan həmin məktəblər fəaliyyət göstərib.

O cümlədən, Azərbaycanda miqrant olan, hətta miqrant olmayan, məsələn, səfirlərin, ölkəmizdə iş quran insanların, beynəlxalq şirkətlərin nümayəndələrinin övladlarına burada təhsil verilir. Onlara heç bir ayrı-seçkilik qoyulmur. Azərbaycan dövləti onların dərs vəsaitləri ilə təminini də öz üzərinə götürür”.

Rusiyanın bu addımına gəldikdə isə ekspert deyir ki, bu, artıq Azərbaycana qarşı kin-küdurətdən irəli gəlir:

“Təxminən orada 2 milyona yaxın azərbaycanlı var. Onların əksəriyyəti ailəvi yaşayır və övladları da var. Bu kimi məsələlər bir qədər də arada olan böhranı, münasibəti gərginləşdirir. Bu, Rusiya- Azərbaycan münasibətlərindən asılı olmayaraq digər ölkələrə də şamil olunur və artıq yaxın qonşu ölkələr üçün də ciddi konflikt mərkəzi olacaq”.

Ödənişli təhsilə gəldikdə isə ekspertin sözlərinə görə, həmin məktəblərlə bağlı heç nə tələb edilmir:

“Ancaq Rusiya nəinki tələb edir, hətta ağırlaşdırıcı şərtlər qoyurlar. Bu şərtlər oradakı miqrant övladları üçün problem yaradacaq. Artıq bu, o deməkdir ki, övladlarına təhsil vermək üçün onlar Rusiyadan getməlidirlər.

Bu gün Azərbaycana Ukraynadan gələn qaçqınlar, Rusiyadan gələn nümayəndələr var ki, onlara ən yaxın məktəblərdə təhsil üçün şərait yaradılır. Ancaq orada uşaqlar təhsildən kənarda qalacaq ki, bu da azərbaycanlıların Rusiyadan tədricən çıxarılmasına səbəb olacaq”.