Musavat.com xəbər verir ki, Rusiya Xarici İşlər Nazirliyi Azərbaycanla münasibətlərin gərginləşdiyi bir vaxtda yumşaq tonda açıqlama verib.

Nazirliyin sözçüsü Aleksey Fadeev brifinqdə bildirib ki, Moskva hazırda Bakıda həbsdə olan Rusiya vətəndaşlarının azad olunması variantları üzərində işləyir.

Qeyd edək ki, iyul ayının əvvəlindən etibarən Bakıda “Sputnik Azərbaycan” agentliyinin rəhbəri İqor Kartavyx və baş redaktor Yevgeni Belousov həbsdə saxlanılır. Onlar Rusiya vətəndaşlarıdır. Bundan əvvəl isə bir qrup rusiyalı narkotik tranziti və kiberfırıldaqçılıq ittihamı ilə saxlanılmışdı.

Rusiya XİN-in açıqlamasında vurğulanıb:

“Azərbaycanda saxlanılan rusiyalıların azad edilməsi dövlətlərarası münasibətlərin sabitləşməsi prosesində əhəmiyyətli addım olardı.”

Musavat.com xatırladır ki, son aylar Rusiya ilə Azərbaycan arasında münasibətlər kəskinləşib. Rusiyanın özündə Azərbaycan diasporuna qarşı təzyiqlər, səbəbsiz həbslər, Yekaterinburqda Səfərov qardaşlarının öldürülməsi, tanınmış diaspora liderləri Şahin Şıxlinski və oğlu Mütəvalinin həbsi kimi hadisələr bu gərginliyi artırıb.

Azərbaycanda isə “Sputnik”in rəhbərliyi agentura fəaliyyəti və kəşfiyyat iddiaları ilə saxlanılıb. Buna baxmayaraq, Moskvanın son açıqlaması qarşı tərəfə münasibətdə daha yumşaq ton seçməsi və kompromis istəyi kimi dəyərləndirilir.

Musavat.com-un şərhi

Azərbaycan tərəfi həmişə qonşularla, hətta münasibətlərin gərgin olduğu hallarda belə, konstruktiv mövqeyini qoruyub. Rəsmi Bakı humanitar və diplomatik kanalları açıq saxlayır. Lakin Azərbaycanın əsas şərti dəyişməzdir — dekabr 2024-də vurulan sərnişin təyyarəsinə görə Rusiya rəsmi üzr istəməli, kompensasiya ödəməli və məsul şəxsləri, generallardan tutmuş sıravi icraçılara qədər, məsuliyyətə cəlb etməlidir. Bu baş verdiyi halda, Bakı münasibətlərin normallaşması istiqamətində irəli addımlar ata bilər.