ADP sədri Sərdar Cəlaloğlu, Rusiya-Azərbaycan münasibətlərindəki hazırki gərginliklə bağlı danışıb. Partiya sədri bir çox məsələlərdə Rusiyanın Azərbaycana təzyiq göstərəcəyini bildirib.
S.Cəlaloğlu Sitat.info-ya açıqlamasında qeyd edib ki, Rusiyanın təzyiqləri bir neçə istiqamətdən ola bilər: "Rusiya bir neçə məsələdə Azərbaycana təzyiq göstərəcək - miqrantlar, Azərbaycandan Rusiyaya aparılan məhsullara qadağa qoyulması, Azərbaycanda yaşayan etnik azlıqların separatizmə cəlb edilməsi və s. Dövlətin buna qarşı müdafiə addımları olmalıdır. Düşünmürəm ki, Rusiya bu mövzuda səssiz qalacaq".
Sərdar Cəlaloğlu həmçinin bildirib ki, Rusiya ilə əvvəlki münasibətlərin yaradılması artıq mümkün deyil: "Ancaq Rusiyanın hazırda müharibə vəziyyətində olduğunu nəzərə alsaq, Azərbaycana qarşı Ukrayna və Ermənistanla davrandığı kimi davarana bilməyəcək. Bir şey aydın oldu ki, Rusiyanın həqiyətən də düşmən dövlət olduğu ortaya çıxdı. Biz neçə ildir Rusiyanın Azərbaycana düşmən olduğunu deyirdik, düşünürdük ki, Rusiya bizi xalq olaraq görmür. Rusdilli məktəblərin açılması, mədəniyyət mərkəzlərinin yaradılması onlar tərəfindən təsir-təzyiq vasitəsi kimi qurulmuş strukturlardır. Heç kim bizə inanmırdı. Nəhayət ki, Rusiyanın Azərbaycana olan düşmən münasibəti aydın şəkildə göründü və hakimiyyət orqanları da artıq Rusiya ilə əvvəlki münasibətlərin yaradılmasının mümkün olmadığının qənaətindədir".
Partiya sədri vurğulayıb ki, Azərbaycan bir çox ciddi addımlar atmalıdır, Rusiya ilə münasibətlər müttəfiqlik münasibətləri səviyyəsindən aşağı salınmalı, qonşuluq münasibətləri olmalıdır: "Bu əməkdaşlıq və qonşuluq münasibətləri qarşılıqlı faydalılığa əsaslanmalıdır. Bu əməkdaşlıqda Rusiya nəyi tələb edirsə, biz də onu Rusiuadamn tələb etməliyik. Paralel olaraq Azərbaycan özünün əsl strateji müttəfiqləri ilə işi düzgün qurmalıdır. Türkiyə, Pakistan və Amerika ilə münasibətlər yeni səviyyəyə qaldırılmalıdır. Azərbaycanın hərbi təhlükəsizliyi bu ölkələrlə əməkdaşlıq sayəsində yüksək səviyyəyə qaldırılmalıdır. Müttəfiq, dost ölkələrlə lazım gələrsə yeni müqavilələr bağlanmalıdır. İndiki halda isə Rusiyanın Azərbaycana qarşı ciddi bir addım atacağını, hərbi xarakterli hansısa addımların olacağını gözləmirəm.
Sərdar Cəlaloğlu, eyni zamanda, miqrantların kütləvi şəkildə geri qayıtması məsələsinə də toxunub. Onun sözlərinə görə, hər bir dövlət öz vətəndaşını sərhədləri daxilində bütün imkanlarla təmin etməlidir. "Bu gün azərbaycanlılar 2 səbəbdən kütləvi şəkildə Rusiyaya köçürlər. Birincisi, Qarabağ işğal olunduqdan sonra orada yaşayanlar Rusiyaya köç etdi və düşünürəm ki, onların ölkəyə qayıtması üçün bütün imkanlar yaradılmalıdır. İkinci qrup isə işsizlər və işi bəhanə edib ailəsini atıb Rusiyada gedib orada vaxt keçirənlərdir. Qarabağda geniş quruculuq işləri gedir və onlar geri qayıdarsa, işlə təmin edilə bilərlər".
