Fəaliyyətinin məqsədi əsasən ölkə iqtisadiyyatının inkişafına yardımçı olmaq, kiçik və orta sahibkarlığın inkişafına köməklik göstərmək, aqrar bölmənin stimullaşdırılmasını həyata keçirmək, kənd təsərrüfatı sahəsində çalışan fiziki və hüquqi şəxslərə xidmət göstərmək, kredit ittifaqlarının, borcalanlar qrupunun yaradılmasına, inkişaf etdirilməsinə dəstək vermək, onlara kreditlərin verilməsini təmin etmək olan "İcraçı Kredit Agentliyi" (İKA) MMC Bank olmayan Kredit Təşkilatının sədri Arif Əliyevlə bağlı redaksiyamıza tükürpədən məlumatlar daxil olub.
Redaksiyamızın elektron poçt ünvanına məktub göndərən şəxs iddia edir ki, agentliyin rəhbəri kredit təşkilatlarının rəhbərləri ilə əlbir olaraq Dünya Bankından ayrılan milyonlarla vəsaiti başqa istiqamətlərə yönəltməklə məşğul olur bu fəailiyyətini hazırda da davam etdirir. "O, yaxın ətrafına məxsus ayrı-ayrı şəxslərin adına kənd təsərrüfatı və sahibkarlığın inkşafı adı altında bir neçə milyon dollar kredit götürərək həmin vəsaitləri özünün başqa biznesinə yönəldib. Bu əməliyyatların bir çoxu Salyan rayonunda həyata keçirilir. "İcraçı Kredit Agentliyi"nin rayonlarda fəaliyyət göstərən kredit təşkilatlarına ayrılan vəsaitlərdə Arif Əliyevin və Kənd Təsərrüfatı Nazirliyinin nəzdində fəaliyyət göstərən Kənd Təsərrüfatı Kreditlər Üzrə Dövlət Agentliyinin sabiq baş direktoru Razim Vəliyevin də payı var. Bank Olmayan Kredit Təşkilatı məhz Kənd Kreditləşməsi Layihəsi üçün yaradılmış təşkilatdır və uzun illər onun təsisçisi "Azərbaycan Kredit İttifaqları Assosiasiyası" İctimai Birliyi olub. Lakin MMC rəhbəri assosiasiyanın idarə heyətinin sədri Ayaz Quliyevlə əlbir olaraq qeyri-qanuni yollarla Bank Olmayan Kredit Təşkilatını öz və yaxın adamlarının adına özəlləşdirməyə nail olub. İKA-nın qeyri-adi özəlləşdirmə strategiyası ondan ibarətdir ki, agentliyin nizamnamə kapitalındakı payını azaldaraq Arif Əliyev başda olmaqla kənardan naməlum fiziki şəxslər və kredit ittifaqları bu təşkilatın yeni təsisçiləri kimi Vergilər Nazirliyində rəsmi olaraq qeydiyyatdan keçiblər. Bu şəxs hazırda dövlət zamanəti ilə Dünya Bankından alınan 18,8 milyon ABŞ dollarını "özünün özəl təşkilatı"nın vəsaiti kimi istifadə edir və dövlətin büdcəsinə qaytarmağa tələsmir". Məktub müəllifi daha sonra yazır ki, bu vəsaitin ölkəmizə gətirilməsi və İKA vasitəsilə Kİ-lərə paylanılması müvafiq hökumət qurumu, eyni zamanda Dünya Bankı tərəfindən agentliyin təsisçisinin tam olaraq ictimai birlik, yəni "Azərbaycan Kredit İttifaqları Assosiasiyası" olması təqdirində razılaşdırılmışdır. Yəni "İcraçı Kredit Agentliyi" MMC-də 18,8 milyon dolların dövriyyəsindən əldə olunan mənfəət heç bir fiziki şəxsin marağı olmadan ilin sonu nizamnamə kapitalına əlavə olunmalı, layihə bitdikdən sonra isə dövlət büdcəsinə ötürülməli idi. MMC sədri isə mütəmadi olaraq kredit ittifaqlarının sədrlərini öz otağında toplayır, onları bu strategiyanı həyata keçirməyə məcbur edir. Əks halda onları kreditdən məhrum etməklə hədələyirdi. Absurd odur ki, kredit ittifaqları assosiasiyanın üzvü olmalarına baxmayaraq, sədrlərindən pul yığmaqla həmin şəxsləri ikitərəfli təsisçi etmələri heç bir məntiqə sığmır. Həmçinin dövlət layihəsini icra edən və kapitalı dövlət vəsaitindən ibarət olan təşkilatın naməlum fiziki şəxslər tərəfindən özəlləşdirilməsi də bir daha Dünya Bankının vəsaitinin heçç-puça çıxarılmasına ciddi şübhələr yaradır. Layihə çərçivəsində kəndli fermerlər və kiçik sahibkarlar kredit ittifaqları vasitəsilə aldıqları kredit vəsaitlərindən istifadə etməklə öz güzəranlarını yaxşılaşdırmalı idilər. Dövlətə çatası olan mənfəət isə müxtəlif təsisçilərin adı ilə özəlləşdirilərək Arif Əliyev və onu himayə edən şəxsə çatdırılırdı. Bunun həyata keçirilməsində Kənd Təsərrüfatı Kreditləri üzrə Dövlət Agentliyinin keçmiş baş direktoru, hazırda Maliyyə Nazirliyində Dövlət Borcunun İdarə Edilməsi Agentliyinin rəhbəri vəzifəsində çalışan Razim Vəliyev səbəbkardır. Beləliklə sədr İKA-nı məhz özünə qulluq etmək üçün özəlləşdirərək qanunsuz işlərinə davam edir. Kredit ittifaqları hələ 1999-cu ildə ulu öndər, mərhum prezidentimiz Heydər Əliyevin qərarı və dəstəyi ilə yaradılıb. Onların əsas məqsədi dünyanın bütün ölkələrindəki kimi beynəlxalq prinsiplərə əsaslanaraq yoxsul təbəqənin həyat tərzini yaxşılaşdırmaqdan ibarətdir. Lakin Arif Əliyevin Dünya Bankı tərəfindən ayrılan vəsaitləri özəlləşdirməsi böyük problemlər yaradıb. Bu da ölkəmizin beynəlxalq imicinə zərbə vura bilər. Ötən il Dünya Bankı ilə imzalanan sazişə əsasən yeni kredit xətti ayrılanda bankın nümayəndələri kredit ittifaqlarının vasitəsilə işləməkdən qəti şəkildə imtina ediblər. Buna baxmayaraq, İKA öz strategiyasında 2015-ci ildə beynəlxalq donor təşkilatları ilə əməkdaşlıqdan bəhs edir. Bunlar hansı əməkdaşlıqdan bəhs edirlər? Halbuki, dünyanın ən böyük donor təşkilatı olan Dünya Bankı üç ildən çoxdur ki, bunlardan üz döndərmiş, layihənin saxlanmasını tələb etmiş və hətta onların çirkin əməllərindən Azərbaycanın rəsmi dairələrinə şikayət edərək tədbir görməyi tövsiyə etmişdir. Belə ki, agentlik Dünya Bankından alınan kreditləri tam büdcəyə geri qaytarmadan özlərinin gəlir əldə etməsi üçün yararlanır. Gələcəkdə bu borc hökumətin üzərində qala bilər. Kredit ittifaqlarını müflis edən Arif Əliyev, həmçinin başqa yollarla Kredit İttifaqları Assosiasiyasının İdarə Heyətinin sədri vəzifəsinə seçilən Ayaz Quliyev bu əməlləri ilə kimə nə demək istəyir? MMC sədri "Aşıxlı", "Tərəkəmə", "Yüzbaşlı-2", "Aran", "Ləman", "Masallı", "Hindarx" kredit ittifaqlarının və digərlərinin adı ilə təşkilatdan külli miqdarda pullar çıxarıb və onlara az miqdarda kredit göndərir. Salyan rayonunun Alçalı, Bəydili, Arbatan, Ərəbqardaşbəyli, Qızılağac və Salyan şəhərinin 19 nəfər sakininin əmlakı satışa çıxarılıb. Göstərilən vətəndaşların böyük əksəriyyəti əslən salyanlı olan "İcraçı Kredit Agentliyi"nin sədrinin qohumları və ona yaxın olan şəxslərdir. Məhkəmə qərarları faktiki olaraq formal xarakter daşıyır. Çünki mülkləri satışa çıxarılan sakinlərin hamısı həmin evlərdə bu gün də yaşayır, biznes sahələrindən istifadə edirlər. İKA-nın regional nümayəndəsi, sədrin yaxın qohumu Vaqif İslamov "ümidsiz kreditlər" sayəsində milyonerə çevrilib. Onun bütün maliyyə işlərində yaxın dostu "Dollar Rüstəm" kimi tanınan məşhur sələmçi iştirak edir. Faktiki olaraq agentliyin yüz minlərlə vəsaiti sələmçilər tərəfindən dövriyyəyə buraxılıb. Vaqif İslamov bu biznesdən böyük gəlir əldə edir. Kreditlərin isə MMC rəhbərinin şəxsi pulu olduğu deyilir". Məktubda qeyd olunan məqamları araşdırmaq məqsədilə "İcraçı Kredit Agentliyi" MMC-nin (012) 464-83-34 nömrəli əlaqə telefonuna zəng vurduq. Dəstəyi qaldıran xanım Arif Əliyevin yerində olmadığını, işə nə vaxt qayıdacağını isə bilmədiyini söylədi. Günün ikinci yarısında qeyd olunan nömrəyə bir daha zəng vurduq, amma yenə də sədri işdə tapa bilmədik. Növbəti sayımızda Şimal-Şərq (Xaçmaz-Quba-Qusar), Şimal-Qərb (Şəmkir-Tovuz-Qazax) və Cənub (Lənkəran-Astara) bölgəsi üçün ayrılan 50 milyon manatın hansı işlərə xərclənməsi və MMC sədrinin sabiq kənd təsərrüfatı naziri İsmət Abasovla birlikdə gördüyü işlər haqqında şok faktları açıqlayacağıq. Bizi izləməyə davam edin.
P.S. Bildiyiniz kimi, son vaxtlar maliyyə xəyanətində ittiham olunan bir neçə iri iş adamı, böyük şirkətlərin sahibləri həbs olunublar. Fikrimizcə, məqalədə qeyd olunan faktlar müvafiq orqanlar tərəfindən dərinliyinə qədər araşdırılsa, adıçəkilən şəxslərin də həbsi reallaşa bilər.
(Ardı var)
"Gündəlik Bakı"nın araşdırma qrupu
