Nəsimi rayon icra hakimiyyətinin başçısı Nəsib Məhəməliyev son illərin ən çox narazılıq yaratdan icra başçılarının siyahısına liderlik edir desək, yanılmarıq.
Çünki qanunsuz torpaq satışı, dövlət məmuru ola-ola biznes fəaliyyəti ilə məşğul olmaq, vətəndaşların hüquqlarını addımbaşı pozmaq, yaşıl soyqırımı genişləndirmək kimi saysız hesabsız əməllərinə sahib olan N.Məhəməliyevlə bağlı narazılıq pik həddə çatıb. İş o yerə çatıb ki, artıq onunla bağlı yuxarılar da ciddi narazıdırlar. Belə demək mümkündürsə,N.Məhəməliyev gözdən düşmüş icra başçılarında biridir.
Səkiləri satışa
çıxaran başçı
“Unikal” olaraq, bundan əvvəl də onun qanunsuz əməlləri barədə silsilə yazılar dərc etmişik. Amma icra başçısı konkret faktlara söykənən yazılardan sonrə nəticə çıxarmaq əvəzinə, daha da aqressivləşərək qanunzus əməllərinin sayını artırıb. N.Məhəməliyevin qanunsuz torpaq satışı və digər qaranlıq əməlləri ilə bağlı mətbuatda dəfələrlə sakinlər tərəfindən müraciəti dərc olunub. Vətəndaşların müxtəlif dövlət qurumlarına şikayət etməsinə rəğmən, N.Məhəməliyev Nəsimi rayonunda qanunsuz torpaq satışını davam etdirməkdədir.
Apardığımız müşahidələr də göstərir ki, hazırda rayonda boş yer qalmayıb, səkilərə qədər hər yer satışa çaxırılıb. Ən acınacaqlısı odur ki, rayonun əksər hissələrində ağaclara qarşı divan tutulur və bu işin də başında məhz icra başçısı dayanır. Onun qanunsuz fəaliyyəti və vəzifəsinə yetərincə məsuliyyət göstərməməsi nəticəsində hazırda 3-cü mikrorayan dairəsi yaxınlığında, daha dəqiq desək, Memar Əcəmi metrostansiyasının yaxınlığında, eləcə də digər ərazilərdə ağaclarla dolu olan sahələr hasara alınaraq müxtəlif iş adamlarına satılmaqdadır. Hətta insanların istirahəti və gediş-gəlişi üçün nəzərdə tutulan ərazilər də satılıb.
Yaşıl soyqırımın banisi
Qeyd edək ki, artıq 9 ildir icra başçısı işləyən Nəsib Məhəməliyevin adı bir çox qalmaqallarda halanır.Bir müddət öncə yaşıl soyqırımla bağlı icra başçısının əmri böyük səs-küyə səbəb olmuşdu. Xatırladaq ki, Nəsimi rayonu, 20 Yanvar küçəsi, 22 nömrəli evin qarşısında 16 növdə nadir ağacların budama adı altında kəsilməsi barədə mətbuatda məlumat yayıldıqdan sonra, ölkəninin birinci xanımı, Heydər Əliyev Fondunun prezidenti Mehriban Əliyeva bu xəbərə sərt reaksiya verərək Bakıda ağacların kəsilməsini yolverilməz hal kimi dəyərləndirmişdi. Bundan sonra ərazidə ağacların kəsilməsi dayandırılmış və Heydər Əliyev Fondunun əməkdaşları, dövlət qurumlarının nümayəndələri hadisə yerində olaraq araşdırma aparmışdı.
O hadisədən bir qədər sonra Nəsimi rayon icra hakimiyyətindən bildirmişdilər ki, ağacların kəsilməsini Bakı Yaşıllaşdırma İdarəsi həyata keçirib. Bundan sonra isə Ekologiya və Təbii Srvətlər Nazirliyi tərəfindən Bakı Yaşıllaşdırma İdarəsi 40 min manat cərimələmişdi. Nəsimi rayon İcra Hakimiyyətinin başçısı Nəsib Məhəməliyev bu qalmaqaldan öz yaxasını kənara çəkmək istəsə də, araşdırma zamanı məlum olub ki, icra başçısının ağacların budanma adı altında kəsilməsi haqqında əvvəlcədən məlumatı olub. Yəni ərazidə ağac kəsimi birbaşa icra başçısının “razılığı” ilə həyata keçirilib. Amma bu qədər töhmət və xəbərdarlığa baxmayaraq, Nəsib Məhəməliyev öz işini davam etdirir.
Saxta qızıl biznesi və
qanunsuz torpaq alveri
“Unikal”ı məlumatlandıran şəxsin sözlərinə görə, rayonun 3-cü mikrarayon dairəsi və Memar Əcəmi metrosu yaxınlığındakı, eləcə də 3-cü və 4-cü mikrarayonlardakı ərazilərdə torpaqların satılması daha geniş vüsət alıb. Hətta demək olar ki,orda bir sm belə yer qalmayıb. Daha bir maraqlı məqam ondan ibarətdir ki, icra başçısının torpaqları satmasında əsas rolu onun qardaşı Yusif Məhəməliyevin oynadığı bildirilir. Bu yöndəki məlumatlar ondan ibarətdir ki, qardaşların iki əsas gəlir yeri var: bunlardan biri torpaqlar, digəri isə qızıl biznesidir. Nəsimi rayonunun bir neçə yerində onlara məxsus qızıl mağazalarının olmasına diqqət çəkilən iddialarda o da vurğulanır ki, həmin qızıllar Dubaydan gətirilir, buradan mağazalara paylanılır, mağazalardan isə xüsusi müştərilər vasitəsilə Gürcüstana aparılır. Hesablamalara görə, Nəsib Məhəməliyev təkcə qızıl biznesindən ildə 10 milyonlarla dollar pul qazanır. Hətta onun və qardaşının nəzarət etdiyi qızıl sexlərində saxta yolla hazırlanan əşyalar elə Azərbaycanda satışa çıxarılır. Həmin saxta zinət əşyaları isə icra başçısının sahib olduğu dükanlarda baha qiymətə camaata sıranır.
Onu da nəzərə çatdıraq ki, Nəsimi rayonunda baş verən bu qədər qanunsuz əməllər sakinləri cana doyurub. Ona görə də sakinlər həm mətbuata, həm də müvafiq qurumlara şikayət edirlər. Belə ki, Nəsimi rayonu, 4-cü mikrorayon 20 yanvar küçəsində yaşayan vətəndaşların şikayətində bildirilirdi ki, icra başçısı həmin mikrarayonda xeyli əraziləri iş adamlarına satıb.Məsələn,111 saylı orta məktəbə bitişik boş ərazi bu gün hasara alınıb. Sonradan məlum olub ki, həmin ərazi bir sahibkara satılıb və orada fərdi yaşayış binasının təməli qoyulub. Bundan başqa orada olan yaşıllıq məhv edilir. Mətbuatda da işıqlandırılan şikayətin müəllifləri qeyd edirdilər ki, həmin ərazini Nəsimi rayon icra hakimiyyətinin başçısı Nəsib Məhəməliyev sahibkara 200.000 manata satıb.
Malikanələr kralı
Nəsib Məhəməliyevin əməlləri bununla bitmir. Bəlkədə o yeganə icra başçısıdır ki, adı mətbuatda bütün qanunsuz əməllərlə yanaşı hallanır. İcra başçısının torpaq satmaq sevdası o qədər böyükdür ki, hərbi hissələrin ərazilərinə belə müdaxilə edir. Belə ki, icra başçısı bir müddət öncə hərbi hospitalın yaxınlığında yerləşən hərbi şəhərcikdə özü və qardaşı üçün villalar tikdirirdi. El arasında “Papanin” kimi tanınan yaşayış massivindəki hərbi şəhərciyin ərazisi artıq başçının tikdirdiyi malikanələrin məskəninə çevrilib. Həmin saraylar konkret olaraq rayonun Azər Əliyev küçəsində ucaldılır.
A.Əliyev küçəsi, 9A binasında yaşayan sakinlərin isə gecəsi-gündüzü yoxdur. İcra başçısı sözügedən ünvandakı yaşayış binasına məxsus həyəti də zəbt edib və qanunsuz olaraq çəpərləyib. Həmin yerdə tikinti işləri aparılır - başçı özü üçün bağça salır. Sakinlərin isə istirahət etməsi, avtomobillərini saxlaması üçün artıq yer qalmayıb. Bu barədə redaksiyamıza binada yaşayan sakinlər məlumat verib. Bu tipli məlumatlar dəfələrlə müxtəlif mətbuat orqanlarında işıqlandırılıb.Ancaq Nəsib Məhəməliyev öz niyyətindən nə geri çəkilib, nə də ki, onun bu əməllərinə “dur” deyən tapılır. Göründüyü kimi, Nəsimi rayonunda baş verən qanunsuzluqlara və Nəsib Məhəməliyevin əməllərinə son qoyulması üçün qəti qərarın verilməsinin zamanı çatıb. Əldə etdiyimiz məlumata görə, artıq N.Məhəməliyevlə bağlı “yuxarılar” da ciddi narazıdır və onun karyerasını bitirmək üçün münasib zaman gözlənilir. Yəqin ki, yaxın günlərdə onun barəsində qəti qərar veriləcək və vəzifəsi ilə vidalaşmalı olacaq. Onun sadəcə olaraq, işdən çıxarılaraq yaxasını qurtarması isə onun üçün mükafat ola bilər. Çünki törətdiyi əməllərə görə qanun qarşısında da cavab verə bilər.
