Məcburi köçkünlərə dövlət tərəfindən müəyyən imtiyazlar verilib, onların kommunal xidmətlərdən azad olunması istiqamətində addımlar atılıb. Öz yurd-yuvalarından məcburi şəkildə çıxarılan insanlar da bunu hər zaman görür və qiymətləndirirlər. Amma bəzən olur ki, yerlərdə məmurların günahına görə, vətəndaşlar ölkə başçısına, baş nazirə və digər yüksək çinli məmurlara müraciət etmək məcburiyyətində qalırlar.
Belə müraciətlərdən biri də bu günlərdə ölkə başçısına və "Bakıelektrikşəbəkə" ASC-nin sədrinə edilib. Cəbrayıl rayon sakini, hazırda Sabunçu rayonu, Sabunçu qəsəbəsi Anaşkin küçəsi 4 ünvanında yerləşən "Xətai Tikinti Mexanizasiya" ASC-nin Tikinti Mexanikləşdirmə İdarəsində məskunlaşmış Həsənova Adilə Bilal qızı tərəfindən göndərilən müraciətdə vətəndaş qeyd edir: "Hörmətli prezident, bildirmək istəyirəm ki, erməni qəsbkarlarının torpaqlarımızın işğalı nəticəsində 1993-cü ildən Cəbrayıl rayonundan məcburi köçkün düşmüşəm. Və uzun illərdir ki, vaxtilə Dövlət Neft Şirkətinin balansında olan, hazırda isə özəlləşdirilərək ASC kimi fəaliyyəti davam etdirilən Tikinti Mexanikləşdirmə İdarəsində yaşayıram. Bir məcburi köçkün ailəsi olaraq dövlətin qayğı və diqqətini hər zaman görmüşəm. Həyat yoldaşımdan boşanmağıma baxmayaraq, 2 azyaşlı qız övladını ünvanlı sosial yardım və məcburi köçkünlərə verilən çörək pulu ilə dolandırıram.
Möhtərəm, prezident, sizə müraciət etməyim üzləşdiyim problemlə bağlıdır. Yuxarıda qeyd etdiyim kimi, adıçəkilən ASC-nin idarəsində məskunlaşmışam. Dövlət tərəfindən məcburi köçkünlərə verilən imtiyazlardan yararlanaraq kommunal xidmətlərdən istifadə edirik. Bu günə kimi hansısa xoşagəlməz mənzərə ilə rastlaşmamışıq. Amma bu yaxınlarda Sabunçu rayonu Enerji Satışı və Təchizatı İdarəsi tərəfindən bizim yaşadığımız ünvana qəbz gələrək 370 manat borcumuzun olduğunu bildirdilər. Düzü, bu rəqəmi görəndə bir qədər təəccübləndim. Çünki 3 nəfərlik ailənin bu qədər borca sahib olması mümkün deyil. Belə ki, dövlət tərəfindən hər bir məcburi köçkün ailəsi kimi bizə də imtiyazlar şamil edilir. Digər tərəfdən isə, daim enerjiyə qənaət etdiyimə görə, bu rəqəm məni narahat etməyə başladı. Onu da qeyd edim ki, 370 manat borcun qəbzini bizə verilənə kimi, bu yaxınlarda rayon işıq idarəsinin əməkdaşları yaşadığımız ünvana gələrək 1700 manat borcumuzun olduğunu bildirdilər. Haqsızlıqla üzləşdiyimi gördüyümdən, rayon işıq idarəsinə müraciət etdim və məsələnin yerində aydınlaşdırılmasını tələb etdim. Uzun narazılıqdan sonra müraciətim nəzərə alınaraq yaşadığım ünvana mütəxəssislər göndərildi və məlum oldu ki, Sabunçu rayon Enerji Satışı və Təchizatı İdarəsinin əməkdaşlarının günahı və səhlənkarlığı səbəbindən sayğac quraşdırılarkən böyük səhvə yol verilib və qonşunun işlətdiyi enerji bizim adımıza, bizim işlətdiyimiz enerji sərfiyyatı isə qonşunun adına olan sayğacda qeyd olunur. Əlbəttə ki, bu, Sabunçu rayon Enerji Satışı və Təchizatı İdarəsinin əməkdaşlarının tərəfindən işlərində yol verdikləri səhlənkarlıq və biabırçılıq idi. Qeyd edim ki, bu məsələnin üstü açılan zaman böyük narazılıq yarandı və işıq idarəsi əməkdaşlarının günahına görə, qonşularla üz-üzə gəlməli olduq. Bu böyük səhvlə bağlı heç bir AKT tərtib olunmadan sayğac kodları dəyişdirildi. Onu da qeyd edim ki, sayğaclar quraşdırılarkən və yaxud da, kodlarla bağlı problem həll olunarkən sayğacın quraşdırılması ilə bağlı bizimlə müvafiq AKT bağlanmadı. Əslində isə, vətəndaşın yaşadığı ünvana sayğac quraşdırılarkən, abonentlə AKT, yaxud müqavilə bağlanması mütləqdir. Bu zaman isə, vətəndaş üzərinə düşən dövlət rüsumunu ödəməlidir. Amma qeyd etdiyim kimi xəbərimiz olmadan yaşadığımız mənzilə sayğac quraşdırılarkən bizimlə nə müqavilə bağlandı, nə də tələb edildi ki, abunə kodunun açılması, sayğacın quraşdırılması üçün tələb olunan rüsumu dövlət büdcəsinə ödəyək. İndi məlum olur ki, Sabunçu rayon Enerji Satışı və Təchizatı İdarəsinin əməkdaşlarının bizimlə AKT (müqavilə) bağlamamasının səbəbi bizə süni borcun yazılması imiş.
Cənab prezident, sizə müraciət etməyim onunla bağlıdır ki, bizə əsassız olaraq yazılan borcun araşdırılmasına müvafiq göstəriş verəsiniz. Xahiş edirəm, komissiya təşkil olunsun və araşdırılsın görək, 3 nəfər ailə üzvünə görə bu qədər borcun yazılması doğrudurmu? Qeyd edim ki, 3 nəfər ailə üzvünə görə aldığım çörək pulu və ünvanlı sosial yardımla birtəhər dolandığım bir vaxtda, əlavə maddi imkanın yoxdur ki, 370 manat işıq pulu borcunu ödəyim. Çünki əks halda elektrik enerjisinin verilişinə məhdudiyyət qoyulacağı bildirilir".
Vətəndaşın müraciətində böyük həqiqət var. Çünki Sabunçu rayon Enerji Satışı və Təchizatı İdarəsinin əməkdaşları böyük qanunsuzluğa yol veriblər. Elə bunun özü adıçəkilən idarənin əməkdaşlarının işlərinə nə dərəcədə məsuliyyətli yanaşmalarını göstərir. Məlumdur ki, vətəndaş əgər bir ünvanda yaşayırsa, həmin rayonun müvafiq qurumları bundan xəbərdar olur. Digər tərəfdən də, vətəndaş kommunal xidmətlədən istifadəyə görə, rayonun müvafiq qurumlarına müraciət edir və sayğac quraşdırmasını tələb edir. Əgər vətəndaşın müraciətinə "MƏCBURİ KÖÇKÜNDÜR" deyilərək baxılmırsa, onun yaşadığı ünvana sayğac quraşdırılmırsa, bunun məsuliyyətini həmin vətəndaş daşımamalıdır. Başqa bir məqama da diqqət yönəldilməlidir, əgər hansısa vətəndaşın yaşadığı mənzilə sayğac quraşdırılmaq nəzərdə tutulursa, bu zaman həmin vətəndaşdan tələb olunmalıdır ki, lazım olan dövlət rüsumunu ödəsin və qəbzi işiq idarəsinə təqdim etsin. Bundan sonra, həmin vətəndaşın mənzilinə sağac quraşdırılması həyata keçirilməlidir. Yoxsa vətəndaşın iştirakı olmadan, onun mənzilinə gəlməli olan naqillərə sayğac quraşdırılırsa və bu zaman vətəndaşla müqavilə bağlanmırsa və sonradan məlum olursa ki, həmin vətəndaşın ayağına külli miqdarda borc yazılıb, bunun günahını görəsən kim daşıyır?
Qeyd edək ki, mövzu ilə bağlı araşdırmalarımız davam edir, növbəti saylarımızda Sabunçu rayon Enerji Satışı və Təchizatı İdarəsində şahidi olduqlarımız, "Bakıelektrikşəbəkə" ASC-nin məsul əməkdaşı Tofiq Abdullayevlə şikayətçinin görüşü və bu görüş zamanı ortaya çıxan mətləblər, o cümlədən adıçəkilən qurumun məsul şəxsinin əməkdaşımıza mövzu ətrafında hansı məqamlara toxunmasına aydınlıq gətirəcəyik. Bizi izləyin...
