Dünən Milli Məclisin üzvü Eldəniz Səlimovun toxunulmazlıq hüququ ləğv edilərək barəsində məhkəmənin qərarıyla üç aylıq həbs qəti imkan tədbiri seçildi. E.Səlimovun Xaçmaz rayonunu təmsil etməsi diqqətimi yenidən bu rayona çəkməyimə səbəb oldu. Yəni polisə qarşı zorakılıq etməsi, üstəlik təmsil olunduğu ərazidə külli sayda ağac kəsilməsində iştirakının olması ilə gündəmə gəlməsi onun xarakterində ciddi dəyişikliyin olmasını üzə çıxardı. E.Səlimovun müəyyən mənada qanuna və vətəndaşa hörmət qoymaması ilə bağlı utancverici hərəkəti Xaçmazla bağlı üzləşdiyim bir məqamı ictimailəşdirməyə bir növ təkan verdi.
Bizim iyirmi illik fəaliyyətimizdə əsas məqsədimiz Ulu Öndər Heydər Əliyevin təşəbbüsü və iştirakıyla təsis edilən bələdiyyə sisteminin inkişafına dəstək vermək, fəaliyyətlərini təbliğ etmək, qarşılaşdıqları problemləri ictimailəşdrimək olub. Bunun üçün təsis etdiyimiz QHT-nin və Belediyye.info saytının imkanlarından da yetərincə istifadə etməyə çalışırıq.
Bununla yanaşı biz daim digər bələdiyyələr kimi Xaçmaz bələdiyyəsinin də fəaliyyətini izləyir, hətta vergi sistemində tətbiq edilən yeniliklərin ictimailəşdiriməsinə çalışmışıq. Bununla bağlı 2014-cü ildə sənədsiz mənzillərlə bağlı sədri olduğum QHT-nin layihəsi çərçivəsində təşkil edilən seminarın birini məhz Xaçmaz bələdiyyəsinin inzibati binasında keçirmişik. Və həqiqətən də maraqlı bir görüş alınmışdı.
Lakin 2019-cu il seçkilərindən sonra formalaşan yeni tərkib bələdiyyə üzvləriylə əlaqələrin qurulmasına çalışsaqda təəssüf ki, qarşı tərəfin etinasızlığı və bəlkə də məsuliyyətsizlyi ucbatından alınmamışdı. Təəssüf edirik ki, 14 aylıq fəaliyyətdən sonra Tural İbrahimov vəzifəsini tərk edib və hazırda barəsində pandomiya dövründə saxta sənəd verdiyinə görə cinayət işinin açıldığı deyilir. Bu məlumatın nə qədər həqiqətə uyğun olub olmadığı deyə bilmərik, amma onu bilirik ki, T.İbrahimovun heç də könüllü istefa vermədiyi göz qabağındadır. Birmənalı olaraq.
Bir müddət öncə isə yeni seçilən bələdiyyə sədri Tural Məlikov olduğunu öyrəndik, çətinliklə də olsa nömrəsini tapıb, zəng etdik. Təbrik etdik və ilk gündən fəaliyyətinin təbliğ olunmasını, altıaylıq hesabatını ictimailəşdirilməsini və sonda saytdakı rubrika üçün kabinet şəklinin və tərcümeyi-halını göndərməyi xahiş etdik. Razılaşdıq. Söhbətdən razı qaldım və ümid etdim ki əvvəlki sədrdən fərqli olaraq yeni sədr ictimaiyyəti üçün daha açıq olacaq. Sonra isə Xaçmaz bələdiyyəsində sədr dəyişikliyi ilə bağlı məlumatı sayta yerləşdirdik. Əldə etdiyimiz məlumatları isə olduğu kimi təqdim etdik. Dərhal ard-arda zənglər gəldi. Və sədrin təhsili ilə bağlı məqamların heç də həqiqətə uyğun olmadığı deyildi. Hətta bununla bağlı diqqətli olmağımızı və düzəliş etməyimiz xahiş olundu. Əslində isə sədrin ali təhsil alıb-almaması və fəaliyyəti növbəti yazının mövzusu olacaq. Çünki bu istiqamətdə ilkin araşdırmalarımız ortada bəzi qaranlıq məqamların olduğunu üzə çıxarıb. Nə isə...
Üstündən, 10 gün keçər-keçməz Votsap vasitəsiylə sədrə müraciət edərək salamdan sonra xatırlatma yazaraq danışığımıza uygun cavab göndərməyi xahiş etdik.
Yazışmanı olduğu kimi oxucuların müzakirəsinə təqdim edirəm. Lakin bəzi detala bir qədər geniş toxunmaq istərdim. Hər kəsin oxumasını xahiş edirəm:
- Salam, dediklərimizdən bir xəbər çıxmadı: hesabat, cv, kabinet şəkli və birdə əməkdaşlıq. Sonda sizdə familiyanız İbrahimovdur ya Məlikov.- mənim bu sözümə sədrin cavabına sədrin cavabı:
- “Gələcəkdə nəzərə alarıq, hal-hazırda vəsait olmadığı üçün mümkün deyil. Özümüz əlaqə saxlayarıq”
- Mənə hesabatınızı göndərməyiniz daha vacibdir. Bu haqda söz yazmamışam axı. Yazdığımıza cavab gəlmədi. Narazı qalıram. Son olaraq əleykə salam yazıb sonra mətləbə keçmək lazım idi.
- Sədrin cavabı: - Mənə nə isə öyrətməyə ehtiyac yoxdur. Biz vacib orqanlara hesabatımızı göndəririk. Özünüzü müstəntiq kimi, məni də cinayətkar kimi görməyin.
Bəli, bu qısa yazışmadan qənaətim ondan ibarətdir ki, sədrin təcrübəsi sıfıra bərabərdir. Yəni müəmmalı təhsil alan, cəmi üç illik iş təcrübəsi olan sədr yerli orqanda çalışdığı müddətdə bələdiyyə qanunvericiliyini yaxından öyrənməliydi. Bilməliydi ki, hesabatın təqdim edildiyi əsas istiqamət ilk olaraq ona səs vermiş 3268 nəfər şəhər sakinləridir. Məhz bu təqdimatdan sonra hesabat bələdiyyə binasının qarşısında xüsusi lövhələrdə yerləşdirilməli, habelə elan, bülleten, vərəqə, yerli mətbuat, internet saytı və digər vasitələrlə əhaliyə çatdırılmalıdır. Bununla yanaşı sədr Tural Məlikov bələdiyyə üzvünün etik-davranış qaydalarını oxumuş olsaydı, onda istənilən şəxslə, vətəndaşla və xüsusən də media orqanın təmsilçisiylə hansı məzmunda danışmalı olduğunu bilməliydi.
Bu davranışdan gənc sədrin oxuyub öyrənməsi bir yana, təcrübə qazamağı bir yana özünü həmyerlisi Eldəniz Səlimov kimi aparması və hökmlü sədr kimi göstərmək istəyində olması hiss olunur. Amma sədrə demək istəyirəm ki, bu xarakterlə çox da uzağa getmək olmaz.
Hər halda millət vəkilinin hərəkəti Xaçmaz sakinlərinə heç bir hörmət-izzət gətirmədiyi kimi, sədrin bu davranışı da bələdiyyə üzvlərinə hörmət gətirmir...
P.S. Mövzunu diqqətdə saxlayacağıq.
P.S.S. Qarşı tərəfin fikrini və məsələ ilə bağlı arqumentlərini verməyə hazırıq.
Vüqar Tofiqli
Demokrat.az
