Bir müddətdir sosial şəbəkələrdə Bakıda fəaliyyət göstərən və vətəndaşları aldadaraq xarici ölkələrdə işə düzəltmək adı altında dələduzluq edən “Topstaff LTD” Məhdud Məsuliyyətli Cəmiyyətinin əməlləri barədə məlumatlar dərc olunur. “Təzadlar”ın əməkdaşı bu dələduzluğu araşdıran və artıq müəyyən hüquqi nəticəyə gələn Neftçilərin Hüquqlarını Müdafiə Təşkilatı İctimai Birliyinin sədri Mirvari xanım Qəhrəmanlı ilə əlaqə saxlamışdır... M.Qəhrəmanlının sözlərindən bəlli oldu ki, sən demə, bu şirkət bir qrup müəllimlərin dələduz fəaliyyətinin məhsuludur.
M.Qəhrəmanlı olduqca ilginc faktlar açlqladı:
- “Topstaff LTD” Məhdud Məsuliyyətli Cəmiyyəti insanların səmimiyyətindən sui-istifadə edərək onların işə düzəltmə adı ilə külli miqdarda pullarını ələ keçirib. Dələduzluqla məşğul olduğu şübhə doğurmayan bu şirkət indiyədək paytaxtın bir neçə yerində fəaliyyət göstərib. Hər dəfə əməlinin üstü açılanda kirayələdikləri ofisi bağlayıblar...
-Mirvari xanım, mu MMC-nin belə açıq şəkildə fəaliyyət göstərməsi nə əcəb hüquq mühafizə və vergi orqanlarının diqqətini cəlb etməyib?
-Mən araşdırma aparmışam, konkret şikayətçilərlə görüşmüşəm, onların video çəkilişlərini mənə təqdim ediblər... Mənim üçün də sirdir ki, niyə polis, vergi orqanları onların izinə düşmürlər? Ola bilsin konkret şikayətçi yoxdur... Onu da deyim ki, adı çəkilən MMC-nin məsul işçiləri vətəndaşları aldadaraq dələduzluq etdiklərinə görə yerləşdikləri sonuncu “İSR Plaza”dan da qovulublar. Bu MMC 2008-ci ildə yaradılıb və neft-qaz, həmçinin tikinti şirkətlərini avadanlıqlarla təmin etmək üçün açılıb. Amma 2015-ci ildən etibarən başqa yol tutublar. Guya fəalliyyət sahəsini genişləndiriblər və neft-qaz, tikinti sahəsində yerli kadrlara təlimlər keçməyə, peşəkar kadrlar hazırlamağa, sonradan onları xarici şirkətlərdə işlə təmin etməyə başlayıbdır. Ən dəhşətlisi budur ki, bu MMC-dəkilərin hamısı müəllimlərdir. Məsələn, bu MMC-nin başında duran müəllimlər Vəfa, Ülviyyə, Mətanət müəllimədir... Əsas işləri düzüb-qoşan isə Aydın Hacıyev adlı şəxsdir. O, Ülviyyə Hacıyevanın həyat yoldaşıdır. Amma şikayətçilər mənə dedilər ki, dəstənin başçısı Mətanətdir. Onun da arxasında Aidə adlı bir qadın durur.
-Mirvari xanım, niyə aidiyyəti qurumlara siz müraciət etmirsiniz?
-Mən Əmək və Sosoal Müdafiə Nazirliyi yanında Dövlət Əmək Müfəttişliyinə müraciət etdim... Sonradan öyrəndim ki, Müfəttişliyin əməkdaşları həmin MMC-də olublar, Mətanətlə görüşüblər və... İndi istəyirəm Səlim Müslümova rəsmi müraciət edəm ki, müfəttişliyin bu hərəkətini necə anlamaq olar? Hətta sonradan həmin Mətanət şaiyə buraxıb ki, guya mənə 300 manat rüşvət verib ki, susum və sair... Fikir verirsinizmi, dələduzlar hansı üsullara əl atırlar... Fürsətdən istifadə edib Vergilər Nazirliyinin və bu şirkətə işə qəbulla əlaqədar müraciət edən şəxslərin diqqətinə çatdırıram ki, vergidən yayınmaqda və maliyyə pramidasında şübhəli hesab etdiyimiz “TOPSTAFF LTD” yeni şirkətlər açıb. “TOPSTAFF MARİNE” və “TOPSTAFF CONSTRACTİON”. Hətta MMC-nion rəhbər işçilərindən biri şikayətçi Çingiz Tağıyevə və digərlərinə deyib ki, hara istəyirsiniz şikayət edin, 5 evim var, satıb özümü xilas edəcəyəm. Onlar vətəndaşlardan təlim adı altında rüşvət alırlar. Məsələn, 14000 manat verən Çingiz Tağıyev mənə səsli səsli mesaj göndərib, pulunu tələb edir. Dövlət Əmək Müfəttişliyindəkilərin diqqətinə çatdırıram ki, “Topstaff LTD”nin 7 nəfər işçisi var, bir treninq mərkəzi yaradıblar. 300 nəfərin qol çəkdiyi əmək haqqı cədvəli bizdədir.
Bu dəstənin içində türk vətəndaşı olan Emrə Zorlu da var. Mənə məlumat verilib ki, “TOPSTAFF LTD”nin əməkdaşları sonuncu dəfə təxminən 50-yə yaxın işçi ilə əmək müqaviləsi bağlayıb (müqavilələr də bizdədir). Həmin əmək müqavilələri isə Əmək və Əhalinin Sosial Müdafiəsi Nazirliyinin elektron qeydiyyatından keçməyib. Vəziyyət belədir… “TOPSTAFF LTD” MMC-nin rəhbər işçiləri 800 nəfərdən yuxarı insandan aldığı pulu qaytara bilmir. İşçilərə əmək haqqı da vermirlər. Yanvar ayında 78 nəfər, fevral ayında 300-ə yaxın işçiyə əmək haqqı verilib. Mart ayında əmək haqqı verilməyib (əmək haqqı cədvəli bizdədir, vergidən və sosial ödənişlərdən yayınma var). Onu da deyim ki, bu şirkətdə ikili mühasibatlıq var, əmək müqaviləsində əmək haqqı 200 manat göstərilib, işçiyə isə 500 man verilir və sair… İnanıram ki, tezliklə “Topstaff LTD” MMC müəmmasına aydınlıq gətiriləcək…
“Təzadlar”
