BİRLİK SƏDRİ ÜNVANLARINA SƏSLƏNƏN İTTİHAMLARI SİFARİŞLİ HESAB EDİR
DİA.AZ: - Masallı Rayon İcrav Hakimiyyəti Başçısı Rafil Hüseynovun qanunsuz hərəkətlərindən Masallı Ziyalıları İctimai Birliyinin və ictimaiyyət nümayəndələrinin Prezidentə etdiyi şikayətlərlə bağlı keçirdikləri mətbuat konfransından “guya hiddətlənən” bir neçə nəfər Masallıdan xəbəri olmayan bəzi şəxslərin fikirləri barədə Masallı Ziyalıları İctimai Birliyin sədri Eynullayev Məmmədağa Bəndalı oğlu tərəfindən DİA.AZ-a açıqlama göndərilib.
Həmin açıqlamanın mətnində deyilir: ““Azadlıq” qəzetində və bəzi saytlarda əslən Masallıdan olan Fərahim Sadıqovun, Füzuli Bayatın, Vasif Səmədovun və Q.Fətullayevin fikirləri ilə əlaqədar bildirmək istəyirəm ki, Fərahim müəllim zaman-zaman İcra Hakimiyyəti Başçıları ilə isti münasibətlərə can atan, onlara yarınmaqla özü üçün (deputat olmaq məqsədi ilə), dörd il həbsdə yatan qardaşı Fəxrəddin Sadıqovun vəzifəyə verilməsi məqsədi ilə belə çıxışlarının dəfələrlə şahidi olmuşam. Belə çıxışlarına görə Fərahim müəllim Fəxrəddin Sadıqovu Masallı şəhər ərazi nümayəndəsi, hazırda 3 в„– -li şəhər orta məktəbinin direktoru vəzifəsinə təyin elətdirmişdir. Yəqin ki, indi də o qardaşını layiq olmadığı daha hansısa yüksək vəzifəyə təyin elətdirmək istəyir və ya daha başqa umacağı vardır.
Bizlərin haqqındakı bu qarayaxmalar da oradan qaynaqlanır. Çünki onların fikirlərindən də məlum olur ki, bizim şikayətlərimizin məğzindən xəbərləri yoxdur. Masallıda baş verənlər barədə məlumatlı deyillər. Sadəcə icra başçısının göstərişini yerinə yetirirlər. Biz uzun müddətdir ki, Masalllıda baş verən haqsızlığa, ədalətsizliyə, qanunsuzluğa, dövlətimizin inkişafına, tərəqqisinə mane olanlara qarşı mübarizə aparırıq.
Haqqımızda iftiralar yağdıranlar bizlər mübarizə aparanda başları ya pul yığmağa qarışıb, ya da ki, cəsarətsizliklərindən səslərini çıxara bilməyiblər.
Fərahim müəllimə bir faktı xatırlatmaq istəyirəm. Fərahim müəllim, çox yaxın dostumuz Çingiz Həşimov, oğlu Yavər Həşimov əmlaklarının əlindən alınması məqsədi ilə şərlənərək, bələdiyyə üzvlüyünə namizədlər olmasına baxmayaraq, keçmiş İcra Hakimiyyəti başçısı Qəzənfər Ağayev tərəfindən həbs etdiriləndə heç bir ziyalı kimi səsiniz eşidilmədi, hiss olunmadınız.Nədən? Icra Başçısı Rafil dostunuzdan bu qədər əzizdi sizə? Seyid Sadıq demişkən “ay nömrə” !...
Jurnalist Vasif Səmədovu hər vaxt kölgədə qalmağı üstün tutanlardan hesab edirik. Birdən-birə meydana çıxıb bizləri ziyalı olmamaqda ittiham etməsi bizlərə çox gülməli gəldi. Vasif Səmədova xatırlatmaq istəyirəm ki, 1978-ci ildə mən Azərbaycanın yığma futbol komandası tərkibində, Ukraynanın Dneprepotrovsk şəhərində (o vaxt Vasif Səmədov Dneprepotrovsk vilayətinin partiya komitəsində işləyirdi) keçirilən yarışdan sonra komandanın rəhbərliyinə mən də olmaqla, “Dnepr” restoranında verdiyi qonaqlıq və haqqımdakı yüksək fikirlər yadından çıxmayıb. Məgər ziyalı olmaq üçün Fərahimdən, Vasifdən, yoxsa Füzuli Bayatdan icazə və ya lisenziya almaq lazımdır? Siz necə özünüzü ziyalı hesab edirsiniz ki, haqsızlığa, ədalətsizliyə qarşı çıxan, özünüz etiraf etdiyiniz kimi tanımadığınız insanlara qarşı təhqiramiz ifadələr işlədirsiniz. Budurmu sizin mədəniyyətiniz, ziyalılığınız? Bizlərin narazılıqlarının, etirazlarının nə səbəbdən baş verdiyi barədə heç məlumatlı adama oxşamırsınız. Yəqin göstəriş almısınız ki, onları şərləyin, təhqir edin.Türklər demişkən yazıqlar olsun!
Füzuli Bayat professorun Masallıdan olmasını ilk dəfə “Azadlıq” qəzetindən öyrəndim. Mən Masallı rayonunu çox yaxşı tanıyan bir şəxs kimi bu professor haqqında ilk dəfə məlumatlandım. Professorluğunu bilmirik, ancaq bizlər haqqındakı fikirləri və təhqirləri təxəllüsü kimi çox bayatdır. Əslində onun fikirləri necə “zat” olduğunu ortaya qoyur.
Əgər siz özünüzü ziyalı hesab edirsinizsə, (Qardaşı araya gətirməli deyil) sizlərlə Fərahim Sadıqov, Vasif Səmədov Füzuli Bayatla Masallı Ziyalıları İctimai Birliyinin nüməyəndələri ilə təklif etdiyiniz istənilən məkanda, auditoriyada, istər Masallıda, istərsə də Bakı şəhərində görüşməyə hazırıq. İstəsəniz mətbuat nümayəndələrinin iştirakı ilə. Çünki bizlərin məqsədi, məramı apardığımız mübarizənin hədəfləri, məqsədi aydındır. Rayon ictimaiyyəti qarşısında, Allah qarşısında alnımız açıq, vicdanımız təmiz, yaxınlarımız, qohumlarımız arasında vəzifə üçün min cür dona girən, narkotiklə məşğul olan, sərvət qazanmaq ehtirası ilə min cür çirkinliyə bulaşan, digər mənəviyatsız hərəkətlərlə məşğul olan heç bir adamımız yoxdur.
İnanın ki, bizlər Masallını sizlərdən qat-qat çox istəyirik, özü də şəxsi maraqlar baxımından deyil. Qardaş Fətullayevə hələ keçmiş icra başçısı zamanı bizlərə atdığı iftiralara görə mətbuat səhifələrində, son olaraq “Atribut” qəzetində ətraflı cavab vermişəm. Qardaş ağlı kəsəndən, hansı səbəbdən karyerasını qurmağa başlayandan “ştatlı sifarişlə” işləyən olub. İndi öz adını bizlərə qoymaq istəyir. Alınmayıb, heç vaxt alınmayacaq. Onu Ayaz Mütəllibovun dövründə yaranan ölü bir cəmiyyətə sədr təyin ediblər. Nə vaxt bizləri şərləmək, olmazın iftiralarını söylətdirmək lazım gələndə icra başçılarının icazəsi ilə danışır. Qardaşın cəmiyyətinin fəaliyyəti bundan ibarətdir. Əgər Qardaş Fətullayev sağlam düşüncə ilə öz şəxsi həyatındakı və əməllərindəki eybəcərlikləri analiz edərək nəticə çıxararsa, o nəinki ziyalı kimi, həm də bir Masallılı kimi də cəmiyyət arasına çıxmamalıdır.
Qardaş Fətullayev deyir ki, guya bizim ətrafımızdakılar ruhi xəstə və pis imicə malik adamlardır. Əgər bizim ətrafımızdakılar ruhi xəstədirlərsə, nə üçün sənin rəhbərin Rafil bu yaxınlarda onlardan 2 nəfərinə vəzifə verərək ətrafına aparıb. Onda belə çıxır ki, sənin rəhbərin ruhi xəstələrə vəzifə verir. Sən yəni bu qədər yekəlmisən ki, daha öz rəhbərinə daş atırsan.?!
Sizlərin nəzərinə çatdırıram ki, ətrafımızdakılar haqsızlığa, ədalətsizliyə, qanunsuzluğa qarşı cəsarətlə mübarizə aparan əyilməz, satılmaz yaltaqlığı sevməyən,professor olmasalar da sadə ziyalılar və ictimayət nümayəndələridir.
Qaldı ki, pis imic məsələsinə, haqqınızdakı bir çox faktlara istinadən deyə bilərəm ki, bizim rayonda səndən pis imicli adam yoxdur. Mən harda işləməyindən asılı olmayaraq vicdanla, ləyaqətlə işləmişəm. Rayon ictimaiyyəti bu barədə kifayət qədər məlumata malikdir. Eyni zamanda sənə bir faktı xatırlatmaq istəyirəm. 2000-ci il parlament seçkilərində sədri olduğunuz seçki dairəsində yüksək səslə qalib gəlsəm də, 2001-ci ildə YAP-ın Sirus Təbrizlinin iştirak etdiyi rayon konfransında partiyanın idarə heyətindən uzaqlaşdırıldığınıza görə mənim yerimə saxta yolla deputat elədiyin, qəzəbləndiyin, sənə qarşı atılan addımlarda günahkar bildiyin Vəsadət Əzizova konfrans iştirakçılarının hüzurunda, sən deputat deyilsən, sən Məmmədağanın haqqını mənimsəmisən, mənə verdiyin filan qədər pula görə səni deputat elədik etirafın yəqin ki, yadından çıxmayıb.
Təvazökarlıqdan uzaq olsam da özüm haqqında bəzi məlumatları qeyd etmək istəyirəm. Mən həyatım boyu Masallının şərəfini həmişə uca tutmaq üçün heç vaxt səy və bacaracağımı əsirgəməmişəm. Buna nə qədər nail olmuşamsa, bunun qiymətini rayon ictimaiyyəti verə bilər, başqa heç bir fərd verə bilməz.
Ordu sıralarında SSRİ Daxili Qoşunlarının xüsusi rotasında xidmət etmişəm. O illərdə (1973-75) Uzaq Şərq və Sibir zonalarının 3 km kros yarışlarında çempion olmuşam. Adım SSRİ Daxili qoşunlarının fəxri kitabına yazılıb.
Ordudan qayıtdıqdan sonra 1976-cı ildə Xankəndində keçirilən 3 km kros yarışında respublika çempionu olmuşam. Masallı rayonunun şərəfini “Viləş” futbol komandası tərkibində onun kapitanı kimi qorumuşam. 3 dəfə “Qızıl sünbül” kubokunu, bir dəfə Respublika kubokunu almışıq, respublika çempionatında fəxri yerləri tutmuşuq. Azərbaycanın yığma komandası tərkibində respublikanın şərəfini Özbəkistanda, Gürcüstanda, Ermənistanda, Ukraynada qorumuşam. Rayonun ictimai siyasi həyatında fəal iştirak etmişəm. Xalq hərəkatı dövründə rayon cəbhəsinin sədri, eyni zamanda dörd il AXC-nin Ali Məclisinin üzvü olmuşam. Qardaş Fətullayev deyən kimi vəzifəyə görə yox, AXC hakimiyyətinin kadr siyasətinə etiraz olaraq AXC-dən və İcra Hakimiyyətindəki işimdən istefa vermişəm.
O vaxt Masallı Demokratik Qüvvələr Qurumu yaradaraq Əlikram Hümbətovun dövlət əleyhinə yönəlmiş hərəkətlərinə qarşı mübarizənin ön cərgəsində olmuşam. Bölgə ziyalılarının iştirakı ilə AR-nin Prezident Aparatının qarşısında etiraz aksiyaları keçirmişik. O vaxtkı dövlət katibi Lalə xanımla görüşərək onun tapşırığına əsasən Ə.Hümbətovun tərksilah olunmasında MTN-nın zona üzrə sədri Hüseynağa müəllimin rəhbərliyi ilə etiraz mitinqlərinin təşkil edilməsini Masallıdakı dəstəsinin tərksilah edilməsində fəal iştirak etmişəm.
İki dəfə 1995-ci il, 2000-ci ildə AR-nın Milli Məclisinə deputatlığa namizədliyimi verərək, hər iki seçkidə yüksək səslə qalib gəlsəm də, rəsmi protokollar əlimdə olmasına baxmayaraq geri çəkilmək barədə edilən bütün şirnikləndirici təklifləri qəbul etmədiyimdən, yüz cür əsassız səbəblərlə nəticələri ləğv etməklə və saxtalaşdırmaqla mənim deputat seçilməyimin qarşısı alındı. Bu barədə Fərahim Sadıqov, Vasif Səmədov, Qardaş Fətullayev kifayət qədər məlumatlıdırlar.
Görəsən həmin dövrlərdə sonrakı haqsızlıqlar baş verən dövrdə bizim bu “baş ziyalılar” , qardaşlar , fərahimlər, vasiflər, füzulilər harda idilər? Onların nəinki səsləri eşidilmirdi, heç varlıqları hiss olunmurdu. İndi nə hadisə baş verdi ki, icra başçısı Rafil bunları “cinə” döndərdi. Belə ucuz formada icra başçısına yarınmaqla hansı umacağınız vardır?! Yaxınlarınıza hansı vəzifəni, hansı torpaq sahəsini, ticarət obyektləri üçün əraziləri istəyəcəksiniz?
Sizlər nə qədər danışmamışdınız, daha çox hörmətli idiniz. Danışdıqca rayon ictimaiyyəti arasında olan-qalan hörmətinizi də itirəcəksiniz. Çünki bizlər məcbur olacağıq ki, ictimaiyyətə sizlərin, yaxınlarınız haqqındakı ilginc məlumatları açıqlayaq. Biz bunları özümüzə rəva bilmirik, ancaq bizi də buna məcbur etməyin, hörmətli Masallının “baş ziyalıları”.
Çox ayıbdır! Ayılın!”
Yazıda adları çəkilən bütün tərəflərin mövqeyini işıqlandırmağa hazırıq…
