TƏHSİL NAZİRLİYİNİN DƏRSLİK SİYASƏTİNDƏKİ DƏHŞƏTLİ MƏQAMLAR
DİA.AZ: - Ölkənin təhsil sisteminin bərbadlığı hər zaman ən aktual olan məsələlərdən olub. Və maraqlıdır ki, hələ də bu bərbadlığın memarı sayılan təhsil naziri Misir Mərdanov nəinki vəzifə başında saxlanılır, hətta ünvanına səsləndirilən ittihamların qarşılığında rəqiblərinin üzərinə haqlı imiş kimi yeriməyə belə cəsarət edir.
Söhbət burada təbii ki, Misir Mərdanovun Tələbə Qəbulu üzrə Dövlət Komissiyasının sədri Məleykə Abbaszadənin ittihamları qarşılığında verdiyi reaksiyalardan gedir. Xatırladaq ki, bir neçə gün əvvəl TQDK sədri orta məktəblərdə şagirdlərə təklif olunan dərsliklərin keyfiyyətsizliyinə nəzər salaraq, bu istiqamətdə monitorinq aparacaqlarını bildirmişdi. Və maraqlı orasıdır ki, illərdir qaldırılan dərslik probleminə TQDK rəhbərliyinin də tənqidi mövqe nümayiş etdirməsi Misir Mərdanovu qəzəbləndirməklə yanaşı, onun baş verənlərə kobud reaksiyası ilə də müşaiyət olunmuşdu. В«Hər kəs öz işi ilə məşğul olsunВ» şəklində məsələyə reaksiya verən Misir Mərdanov bəlkə də son olaraq hakimiyyət içində cərəyan edən olaylar fonunda belə bir cəsarətini ortaya qoyur, amma hər kəs yaxşı bilir ki, Misir Mərdanov öz işi ilə məşğul olmadığından, onun hansı məzhəbə və hakimiyyətiçi qüvvəyə sığınması heç bir əhəmiyyət daşımır və bu fakt eyni zamanda onun təhsilimizin başına açdığı müsibətləri ört-basdır etmir. Yəqin ki, məlumatlı oxucularımız məsələnin nə yerdə olduğunun fərqinə vardılar.
Bu istiqamətdə DİA.AZ-ın apardığı araşdırmalar da təsdiqləyir ki, əslində Misir Mərdanovun yürütdüyü dərslik siyasəti yanlışlığının və bərbadlığının nəticəsidir ki, bu gün Məleykə Abbaszadənin rəhbərlik etdiyi dövlət komissiyası ilbəil ali məktəblərə qəbul zamanı keçid ballarını aşağı salmaq zorunda qalır.
Əgər birinci sinif şagirdlərinə mübarək təhsil nazirliyinin qrif verdiyi dərsliklərə Abbas Səhhətin, Abdulla Şaiqin, Mirzə Ələkbər Sabirin və digər tanınmış yazarlarımızın, görkəmli şəxslərin əsərlərinin yerinə hansısa divar qəzeti müxbirinin məhz Misir Mərdanovu təbliğ etdiyinə görə В«sürücüdür mənim anamВ» şeiri salınırsa, ayrı-ayrı kitablardan oxuducu tarixi faktları özünün bərbad Azərbaycan türkcəsi ilə qələmə almağa çalışan və illərdir bu yöndə heç bir uğura imza ata bilməyən Yunus Oğuz kimi fəal Misir Mərdanov təəssübkeşinin В«möhtəşəm əsərləriВ» övladlarımıza məhz В«Məleykə Abbaszadə ərə gedirВ» başlıqlı uydurma və təhqiredici dezinformasiyanın yayımına görə, bir tarixi ədəbiyyat kimi təqdim olunursa, o zaman nədən Məleykə Abbaszadə və ümumiyyətlə, bütün ölkə vətəndaşları MİSİR MƏRDANOVUN İŞİNƏ MÜDAXİLƏ ETMƏMƏLİDİR? Axı hər kəs görür ki, Misir Mərdanov dərslik siyasətini bazara çevirib. Hamı yaxşı bilir ki, bu gün təkcə orta məktəblərin birinci sinif şagirdlərinə eyni adda, eyni məzmun və mahiyyətdə 4 ayrı-ayrı müəllifin kitabları təqdim olunur və dərd orasıdır ki, yalnız birinin istifadə olunmasına rəğmən zorla şagirdlərə satdırılan həmin kitablar təhsil nazirliyi tərəfindən az qala bir həftənin içində dərslik statusu qazanaraq qriflə mükafatlandırılıb. Yəni möhtərəm nazirlik başbilənləri görmürdülərmi iki gün əvvəl eyni statusda bir dərsliyi təsdiqləyiblər? Yəni bu birinci sinifdən şagirdlərə eyni profildən dərslik seçimini yaratmaq hansı mənanı daşıyır?. Təbii ki, bunun arxasında dayanan BAZAR MARAQLARI bizlərə gün kimi aydındır. Amma olmazdımı ki, cəhənnəmə, Misir Mərdanov birinci sinif dərsliklərinin müəllifliyini baha qiymətə - indiki qiymətlə dörd müəllifin qiymətinə sataydı və bizim də övladlarımızın canı bu kitab çeşidliliyindən qurtaraydı? Bilərdik ki, 4 manata yox, 16 manata kitab alırıq, amma bir kitab alırıq. Və bilərdik ki, uşaqlarımız В«sürücüdür mənim anamВ» şerini oxumaq zülmü ilə yetinəcəklər, daha bu zülm 4 qat dozada olmayacaq.
Hər halda, biz bir dövlət, millət olaraq bu gün təhsilimizdə yaşanılan böhranlı duruma müdaxilə etmək zorundayıq. Orta məktəblərdə hicab qadağan olundu, yüzlərlə vətəndaş etiraza qalxdı, onlarla şəxs həbsə atıldı, döyüldü… Amma həmin mübarizəni aparanlarımız da bilmirlər ki, əslində bu gün Misir Mərdanovun yaratdığı eybəcər mühiti aradan qaldırmaq lazımdır. Çünki hicablı, ya hicabsız bu eybəcər mühit övladlarımızın tərbiyəsini korlamaqla məşğuldur. Çünki hər şey dərsliklərdən, kitabdan və bu kitabla şagirdi tanış edən müəllimdən qaynaqlanır. Kiminsə övladının hicab altında bu eybəcərliyi yaşaması heç nəyi dəyişmir. Odur ki, dəyişikliyi tələb edəndə kökündən vurmaq zorundayıq. Yəni bu gün də dəyişməli olanı Misir Mərdanov başda olmaqla, bütün ölkə təhsilidir. Əks halda bizlər övladlarımızı, onların timsalında ölkəmizin gələcəyini təhlükəli təfəkkürlərə təslim etmiş olacağıq. Necə ki, bu gün belədir…
