“HÜRRİYYƏT” QƏZETİ BDU REKTORUNU KORRUPSİYADA İTTİHAM ETDİ
Son günlər Bakı Dövlət Universitetinin rektoru, deputat Abel Məhərrəmov barədə ölkə mediasında ilginc məlumatlar yayılıb. "Hürriyyət" qəzetinin yaydığı məlumatlara görə, bu gün Bakı Dövlət Universitetində yaşanan olaylar əslində bir neçə il öncə Azərbaycan Beynəlxal Universitetində (ABU) baş verən proseslərə bənzəyir. Burada yalnız fərq ondadır ki, son günlər Azərbaycanda mətbuat ulduzuna çevrilən ABU rektoru Elşad Abdullayevdən fərqli olaraq Abel Məhərrəmov vaxtında kürəyini daha möhkəm yerə dayayıb. Digər tərəfdən, E.Abdullayevdən fərqli olaraq A.Məhərrəmov mandat alveri zamanı da daha səxavətli olub, keçmiş həmkarı kimi 500 min manatın davasını aparmayıb. Üstəlik, onu deputat edənləri nəinki 5 ildə bir dəfə – seçkidən seçkiyə, hər zaman yada salıb, öz qazancından ona (onlara) hər zaman pay ayırmağı unutmayıb. Abel Məhərrəmov hətta BDU-nun müəllimləri üçün tikilən binanın ən yaxşı 3 mənzilini yüksək rütbəli məmurlardan birinə hədiyyə edib.
Odur ki, bu gün Abel Məhərrəmovun istər hakim Yeni Azərbaycan Partiyasının (YAP) rəhbərliyində təmsil olunan bir şəxs kimi, istər də Milli Məclisin deputatı kimi “qılınc”ının dalı da kəsir, qabağı da. Məhz bu səbəbdən rektorun Bakı Dövlət Universitetini özünün şəxsi bazarına çevirməsinə, bu təhsil ocağında istədiyi “qanunları” tətbiq etməsinə rəsmi dairələrdən kimsə etiraz etmək cəsarətində bulunmur. BDU-nun daxilində rektora etiraz edənlər isə dərhal “vətən xaini” elan olunaraq universitetdən xaric olunur. Bu zaman həmin şəxsin elmi nailiyyətləri, Azərbaycan elminin inkişafına verdiyi töhfələr və s. qətiyyən nəzərə alınmır. Əslində, bununla A.Məhərrəmov BDU-dakı özbaşınalıqlarla daxilən barışmayan vicdanlı müəllimlərə də bir mesaj çatdırır ki, elm sahəsində ucaldığı zirvədən asılı olmayaraq ona etiraz edən kimsəyə güzəşt olunmayacaq. Məhz bu baxımdan universitetin əksər əməkdaşları işsiz qalmamaq naminə rektorun qanunsuzluqları qarşısında hələlik susmağa üstünlük verirlər.
Rektor müəllimlərdən rüşvət yığdırıb
Hazırda BDU-da Abel Məhərrəmovun ən çox etiraz doğuran əməllərindən biri onun müəllimləri atesstasiyadan keçirməsidir. Məlumat üçün qeyd edək ki, bu proses birbaşa rektorun nəzarəti altında baş verir və bu zaman çoxsaylı qanun pozuntularına yol verilir. Ən böyük qanun pozuntusu testdən keçməyən müəllimlərdən BDU-dakı işlərini itirməməyin qarşılığında 10 min manatdan 30 min manatadək rüşvət alınması olsa da, burada etiraz doğuran digər səbəblər də var. Məsələn, A.Məhərrəmov nəinki Azərbaycanda, o cümlədən dünyanın bir çox inkişaf etmiş ölkələrində tanınan, yüksək elmi dərəcələri olan insanları, əməkdar elm xadimlərini də atesstasiyadan keçməyə məcbur edir. Halbuki, həmin insanların biliyinə qiymət vermək BDU rektorunun və onun yaratdığı test komissiyası üzvlərinin səviyyəsini aşan məsələdir. Lakin A.Məhərrəmov tamamilə elmdən uzaq, təhsil sisteminə yad olan test sualları tətbiq etdirməklə atesstasiyadan keçə bilməyən müəllimləri sındırmaq, onlardan rüşvət toplamaq üçün zəminlər hazırlayır. Qəzetin əldə etdiyi məlumata görə, rektorun bu fırıldağını başa düşən bir qrup müəllim işindən azad edilmək bahasına da olsa, sözügedən imtahanda iştirak etməyib. Bəzi müəllimlər isə imtahanda yüksək bal toplasa da, Abel Məhərrəmovun qanunsuz əməllərinə etiraz əlaməti olaraq BDU-nu könüllü şəkildə tərk ediblər.
BDU-da növbəti “Məhəmməd İmanlı”
Oxucuların diqqətinə çatdıraq ki, iki ay öncə BDU-da artıq belə bir imtahan keçirilib və bu zaman keçid balını toplaya bilməyən məllimlərdən külli miqdarda rüşvət toplanıb. Belə ki, universitetdəki etibarlı mənbənin verdiyi məlumata görə, hələ imtahandan öncə rektorun yaxın adamları test suallarının cavablarını satışa çıxarıblar. Bildirilir ki, A.Məhərrəmov bu işi Fizika-riyaziyyat elmləri namizədi, BDU-nin Maddə quruluşu kafedrasının professoru Məmməd Məmmədova həvalə edib: “Abel Məhərrəmovun yaxın qohumu Məhəmməd İmanlı həbs olunandan sonra Məmməd Şıxəli oğlu onun “sağ əli” olub. Test suallarının cavabı da Məmməd Məmmədovun vasitəsilə satılıb”.
Mənbə bildirir ki, bu məsələdə M.Məmmədov tək olmayıb. Onun sözlərinə görə, tədris işləri üzrə prorektorun müavini, dosent İsabal Qurbanov və tədris hissəsinin rəisi, 67 yaşında namizədlik müdafiə edən İbad İbadov da BDU-dakı “rüşvət şəbəkəsi”nin aktiv üzvlərindəndir. “Abel Məhərrəmova verilən rüşvət məhz həmin şəxslərin əlindən keçir”, – deyə mənbə vurğulayır.
Maraqlıdır ki, BDU-da müəllimlərdən yığılan rüşvət də ikipilləli prinsip üzrə həyata keçirilir. Belə ki, hansısa müəllim testdən keçmək üçün öncədən test suallarının cavabını almağın, yaxud da sonradan topladığı balın yüksək yazılmasının qarşılığında verilən rüşvətlə canını qurtarmır. A.Məhərrəmov bu məsələdə dekanlar üçün də “çörək pulu” yeri qoyub. Məlumata görə, testdən keçən müəllim çalışdığı kafedranın dekanına da rüşvət verib belə bir arayış almalıdır ki, həqiqətən də o, BDU-da dərs deməyə layiqdir və bir müəllim kimi heç zaman auditoriyada kənar fəaliyyətlə məşğul olmayıb, dərslərində davamiyyətli olub və s. Rektorun göstərişinə əsasən, belə bir arayış almayan müəllimlərin universitetdə çalışması mümkün deyil.
30 min manata kafedra müdiri
Mənbə onu da bildirdi ki, Abel Məhərrəmov bu yaxınlara qədər Kamal Abdullanın rəhbərlik etdiyi Slavyan Universitetində rektorun köməkçisi kimi çalışan bir xanımı BDU-da kafedra müdiri təyin edib. Həmin xanımın rektorun bu comərdliyinin qarşılığında 30 min AZN ödədiyi qeyd olunur. Hətta bir neçə il öncə Elşad Abdullayevin rəhbərlik etdiyi Azərbaycan Beynəlxalq Universitetindən rüşvət aldığı üçün qovulan Bəylər Hacıyevin də hazırda rüşvət hesabına BDU-da “İngilis dili” kafedrasında çalışdığı qeyd olunur. Yeri gəlmişkən, sözügedən kafedranın müdiri Abbas Abbasovun da daxili nizamnaməyə zidd olaraq artıq 7-ci dəfədir ki, bu vəzifəyə seçildiyi (təyin olunduğu) bildirilir. Məlumata görə, bütün bunlar məhz rüşvət hesabına mümkün olur.
Universitetdə “ailə ansamblı”
Araşdırmamız nəticəsində o da bəlli oldu ki, YAP-ın Siyasi Şura üzvü, Milli Məclisin deputatı olan A.Məhərrəmov rəhbərlik etdiyi universitetdə də 4 vəzifənin sahibidir. O, BDU-nin rektoru olmaqla yanaşı, həm də universitetdə kafedra müdiri, laborant və müəllim kimi fəaliyyət göstərir. Eyni zamanda, onun ailə üzvlərindən, qohum-əqrabasından da BDU-da onlarla şəxsin çalışdığı bildirilir. Məsələn, rektorun qardaşı Amil Məhərrəmovun eyni vaxtda iki vəzifədə – “İqtisadiyyat və idarəetmə” kafedrasının müdiri və “Beynəlxal münasibətlər və hüquq” kafedrasının isə dekan müavini vəzifəsində çalışdığı qeyd olunur.
Məlumata görə, rektor bu yaxınlarda öz qızı üçün Bakı Dövlər Universitetində yeni “Torpaqşünaslıq” kafedrası da yaradıb. Hansı ki, hazırda həmin kafedraya məhz A.Məhərrəmovun qızının rəhbərlik etdiyi vurğulanır. O cümlədən, rektorun baldızının Daşqın adlı kürəkəni, onun həyat yoldaşı və qızlarının da indi BDU-da çalışdığı deyilir.
