"Nazilə Səfərlinin son günlərdə qarşıma çıxan videosu, sözün əsl mənasında, həm təəccüb, həm də dərin bir təəssüf hissi doğurur..." "DİA-AZ" xəbər verir ki, bunu özünün sosial şəbəkə hesabında tanınmış jurnalist Sima Babayeva yazıb.

O daha sonra fikrini belə davam etdirir: "Nazilə xanım kamera qarşısına keçib, sanki toy məclisində bəy tərifi bədahətən söyləyirmiş kimi bir ritmlə, xüsusi bir pafos və ahənglə Səidə Bəkirqızını müdafiə edir.

Dediyi cümlə isə lap "göz oxşayır": "Səidə Bəkirqızını elə xərcləyirsiniz, elə xərcləyirsiniz ki, qəpik kimi..."

​Hörmətli Nazilə xanım, bu obrazlı, amma içi tamamilə boş, heç bir reallığa söykənməyən tənqidiniz və müdafiə cəhdiniz haradan qaynaqlanır?

​Xınayaxdı Ritmilə Ciddi Məsələlərə Şərh Vermək Olmaz!

​Nazilə Səfərlinin danışıq tonuna, jest və mimikalarına baxanda insan elə bilir ki, o, bir media nümayəndəsinin, bir ictimai fiqurun fəaliyyətini analiz etmir, hansısa məclisdə növbəti şeirini və ya qafiyəsini sırımağa çalışır.

Bu cür pafoslu, süni şəkildə bəzədilmiş çıxışlarla, sanki bütün respublika mediası Səidə Bəkirqızına tabe imiş kimi, sanki bu millətin, bu xalqın dərdi-səri ilə gecə-gündüz yalnız bu xanım məşğul olubmuş kimi rəy yaratmaq cəhdi ən yumşaq dildə desək, peşəkarlıqdan uzaqdır.

​Sosial şəbəkələrdə iki-üç populyar videoya baxıb, bir insanın bir-iki manipulyativ çıxışından təsirlənib onun haqqında "fədakar ictimai xadim" obrazı yaratmaq heç bir məntiqə sığmır.

​Nazilə xanıma xatırlatmaq lazımdır ki, jurnalistika, media və ictimai fəaliyyət toy idarə etməyə bənzəmir. Bir insan haqqında rəy bildirməzdən, onu xalqın qəhrəmanı elan etməzdən əvvəl, onun ümumi fəaliyyətinə, keçmişinə, peşəkar trayektoriyasına və cəmiyyətə vurduğu zərərə və ya xeyirə diqqət yetirmək lazımdır.

​ Nazilə Səfərli obyektiv araşdırma aparmadan, sadəcə duyğusal və dostbazlıq zəminində çıxış edərək medianın və ictimaiyyətin haqlı tənqidlərini "insan xərcləmək" kimi qələmə verir.

​ Cəmiyyətin real problemləri, jurnalistlərin üzləşdiyi çətinliklər və medianın həqiqi missiyası ortada ikən, pafoslu təriflərlə kimisə toxunulmaz elan etmək ictimai rəyi formalaşdıran insanlara qarşı hörmətsizlikdir.

Nazilə Səfərli yaxşı olardı ki, öz sahəsi ilə — şeirləri ilə, məclis idarəçiliyi ilə məşğul olsun. Medianın, ictimaiyyətin tənqid süzgəcindən keçən şəxslərə pafoslu şəkildə "vəkillik" etmək, xalqın dərdi ilə nəfəs alan həqiqi ziyalıların və jurnalistlərin əməyinə kölgə salmaqdır.

Şou xatirinə, yaxud ucuz populyarlıq naminə edilən bu çıxışlar heç bir ciddi tənqidə tab gətirmir və yalnız tənqid hədəfi olmağa məhkumdur..."