Naftalan şəhəri kurort-turizm sahəsinə görə nəinki ölkəmizdə, hətta regionda müqayisəolunmaz şəhərdir. Naftalan şəhərinin adı iqtisadi inkişafına görə son zamanlar dövlət başçısı İlham Əliyev cənablarının prioritet elan etdiyi sahələrin içərisində öncül yerlərdə gəlir. Bir zamanlar sosialist ölkələri içərisində məşhur olan Naftalan şəhəri həm də kurort imkanlarına görə iqtisadiyyatımızın güclənməsində, xalqımızın, dövlətimizin tanıdılmasınada əvəzsiz rola malikdir.

Lakin təəssüflər olsun ki, Naftalanda fəaliyyət göstərən bəzi sanatoriyalarda baş verən xaos ümumilikdə ölkəmizin turizm siyasətinə ciddi mənfi təsir göstərir.

Naftalanda qalmaqallı sanatoriyalardan biri "Sehirli Naftalan"dır. "Sehirli Naftalan" barədə mediada kifayət qədər neqativ yazılar var. Bu müəssisənin qanunsuz tibbi fəaliyyətindən tutmuş, keyfiyyətsiz qidalara, aşağı səviyyəli xidmətə qədər çox yazılıb.

Dövlət Şəhərsalma və Arxitektura Komitəsində fərdi ev kimi qeydiyyata alındığı iddia edilən "Sehirli Naftalan"da neft vannalarının da qeyri-qanuni fəaliyyət göstərdiyi bildirilir.

Maraqlıdır ki, xidmət və qida məsələsinə görə kütləvi narazılıqlar olan bu cür "göydəndüşmə" sanatoriyanın - "Sehirli Naftalan"ın fəaliyyətindəki qüsurları heç bir aidiyyatı rəsmi qurumlar görmür.

Əksinə Azərbaycan Həmkarlar İttifaqı Konfederasiyası, xüsusən də Konfederasiyanın nəzdində olan "Kurort" Turizm İnformasiya Mərkəzi hər il "Sehirli Naftalan"a dövlət hesabına yollayışların (göndərişlərin) sayını daha artırır.

"Minalanmış sanatoriya" - 10 ilə 13-14 ölüm...

"Sehirli Naftalan" sanatoriyası təkcə tibbi xidmətin zəifliyi ilə bağlı müzakirə olunan müəssisələrdən deyil. Bu sanatortiya həm də burada baş verən ölüm hadisələrinə görə tez-tez medianın diqqətinə düşür.

Ötən ay - iyul ayında "Sehirli Naftalan" sanatoriyasında çalışan işçisi təzyiq nəticəsində vəfat etdi. Sağlam bir işçisini 10-15 dəqiqə təcili yardım maşını gələnə qədər qoruyub saxlaya bilməyən "Sehirli Naftalan"ın tibbi xidməti, personalının təcrübəsi yəqin ki artıq hamıya aydndır. Eyni zamanda bu müəssisədə rəhbərliyin işçilərə qarşı çox kobud davrandığı, bəzən onlara qul kimi yanaşdığı da deyilir. Digər bir məlumatda isə "Sehrli Naftalan"ın vəfat edən əməkdaşı bu müəssisədə qeyri-qanuni- əmək müqaviləsi olmadan çalışdığı vurğulanır.

Sosial şəbəkələrdə yayılan məlumatlarda hətta bu müəssisədə odlu silahdan da adam öldüyü iddia edilir. (Ölüm halları ilə bağlı aidiyyəti qurumlarda daha dəqiq məlumat almaq olar).

"Sehirli Naftalan" sanatoriyasının son on ildə olan fəaliyyətini araşdıran olsa burada hər il bir şəxsin müəyyən səbəblərdən öldüyünü aşkarlaya bilər.

Baş verən bu olayı - "Sehirli Naftalan"da qeyri-qanuni çalışdığı deyilən əməkdaşın ölümünü yəqin ki, Əmək və Əhalinin Sosial Müdafisəi nazirliyi, Dövlət Vergilər Xidməti, eyni zamanda hüquq mühafizə orqanları xüsusi nəzarətə götürəcəklər. Buna şübhəmiz yox.

Lakin hər il ən azı bir insanın vəfat etdiyi bu müəssisənin fəaliyyətini "Kurort" Turizm İnformasiya Mərkəzi daha diqqətlə incələməlidir.

Ancaq görünən budur ki, "Kurort" Turizm İnformasiya Mərkəzi "Sehirli Naftalan"ın fəaliyyətindəki qüsurları nəinki görür, əksinə nədənsə bu müəssisəyə hər il göndərişlərin sayını daha da artırır. Buna səbəb nədir, axı, hansı amilə, hansı meyarlara əsasən öz sağlam işçisinin həyatını qoruya bilməyən bir müəssisəyə hər il ciddi sağlamlıq problemləri olan vətəndaşlar dövlət hesabına göndərilməlidir? Burada hansı məntiq ola bilər axı?! Yoxsa, "Kurort" Turizm İnformasiya Mərkəzi də bəzi qurumlar kimi öz şəxsi münasibətləri hesabına fəaliyyətini tənzimləyir..?

"Sehirli Naftalan"da ölən insanların bəziləri Həmkarlar İttifaqının hesabına göndərilmiş insanlardır. Ancaq maraqlıdır ki, İttifaqda bunu nəzərə almırlar. Əksinə hər il "dövlət qulluğu", "SOCAR" xətti ilə bu "Sehirli Naftalan"a göndərişlərin sayı daha da artır.

Qeyd edək ki, "Sehirli Naftalan"la sehirli işbirliyində adə ən çox hallanan qurumlardan biri də Dövlət İdarələri və İctimai Xidmət İşçiləri Həmkarlar İttifaqı Respublika Komitəsidir. Komitənin sədri Hikmət Osmanov iyun ayında vəzifəsindən uzaqlaşdırılsa da, onun yerinə gətirilən yeni sədr Hikmət Nəbiyev adaşının "işlərini" davam etdirməkdədir. Belə ki, Dövlət İdarələri və İctimai Xidmət İşçiləri Həmkarlar İttifaqı Respublika Komitəsinin xətti ilə "Sehirli Naftalan"a hələ də çoxsaylı göndərişlər (putyovkalar) verilməkdədir. Yuxarıda da qeyd etdiyimiz kimi tibbi xidməti, təcrübəsi, personal xidməti sıfırın altında olan "Sehirli Naftalan"a Dövlət İdarələri və İctimai Xidmət İşçiləri Həmkarlar İttifaqı Respublika Komitəsinin xətti ilə göndərişlərin sayının göbələk kimi artmasını güman ki, Sahib Məmmədov incələyər...

Sahib Məmmədov Azərbaycan Həmkarlar İttifaqı Konfederasiyasına rəhbər gətirildikdən sonra gözlənilirdi ki, bu qurumun fəaliyyəti şəffaflaşacaq. Lakin proseslər onu göstərir ki, Sahib Məmmədov İttifaqda şəffaflığa nail olmaq üçün hələ çox mücadilələr aparmalı olacaq.

Əlilliyi olan şəxslərin sosial müdafiəsinin gücləndirilməsi, onların tibbi-sosial reabilitasiya imkanlarının genişləndirilməsi möhtərəm cənab Prezident İlham Əliyevin uğurlu sosial siyasətinin mühüm tərkib hissəsidir. Cənab Prezident bu məqsədlə hər il dövlət büdcəsindən yüz milyon manatlarla vəsait ayırır. Ancaq bu vəsaitlərin düzgün, insanların razı qalacağı təqdirdə xərcləmək birbaşa Azərbaycan Həmkarlar İttifaqı Konfederasiyasının, qarşısına şəffaf fəaliyyət göstərmək tələbi qoyulmuş "Kurort" Turizm İnformasiya Mərkəzinin borcudur.

Yəqin ki, rəsmi qurumlar üzərlərinə düşən vəzifə səlahiyyətlərini doğru-düzgün yerinə yetirəcəklər.

Aidiyyatı qurumların mövqelərini dərc etməyə hazırıq.

Poliqon.info