Babək rayonunun bir neçə kəndində zibil qutularının yığışdırılması ilə bağlı tənqidi məqalədən sonra problem öz həllini tapıb. Bu barədə “Gündəlik Naxçıvan”a yerli sakinlər məlumat veriblər.

Onların sözlərinə görə, problem işıqlandırıldıqdan bir neçə gün sonra həmin kəndlər zibil qutuları ilə təmin olunub:

“Tənqiddən nəticə çıxardılar, gətirib zibil qutularını yerinə qoydular. Bir ilə yaxın idi ki, zibil qabısız qalmışdıq. Antisanitariya kəndləri ağuşuna almışdı. Şikayət etmədiyimiz yer qalmamışdı, heç kim bizi dinləmirdi. Yaxşı ki, mətbuatda yazılandan sonra ictimai qınağı nəzərə alıb problemi həll etdilər.”

Bir müddət öncə bir bələdiyyədə birləşən Xəlilli, Didivar, Nəzərabad, Yuxarı və Aşağı Uzunoba, eləcə də Şıxmahmud kəndlərinin sakinləri “Gündəlik Naxçıvan”a bildirmişdilər ki, kəndlərdə zibil qablarının yığışdırılması ciddi problemlər yaradıb. Onların sözlərinə görə, zibil günlərlə, bəzən isə həftələrlə yığışdırılmır, bu da küçələrdə üfunət iyinin yayılmasına səbəb olur.

Sakinlər bildirirdilər ki, zibil qabları təxminən bir il əvvəl, yeni bələdiyyə sədri təyin edildikdən sonra götürülüb və bir daha geri qaytarılmayıb. Nəticədə insanlar tullantıları küçə və dalanlara atmağa məcbur qalmışdılar.

Bu vəziyyət həm sanitar vəziyyəti ağırlaşdırıb, həm də kənd sakinlərinin gündəlik həyatını çətinləşdirib. Xüsusilə uşaqların zibil yığınlarının arasından keçərək məktəbə getməsi narazılığı daha da artırmışdı.